ଅହମଦାବାଦରେ ପହଞ୍ଚିଲେ ବୋଇଂ ଟିମ୍‌, ଏଏଆଇବି ଅଧିକାରୀ

ଅହମଦାବାଦ: ଏୟାର ଇଣ୍ଡିଆ ବିମାନ ଦୁର୍ଘଟଣା ସ୍ଥଳ ଯାଞ୍ଚ କରିବା ପାଇଁ ବୋଇଂର ଏକ ଟିମ୍ ଏବଂ ବିମାନ ଦୁର୍ଘଟଣା ତଦନ୍ତ ବ୍ୟୁରୋ (ଏଏଆଇବି)ର ଅଧିକାରୀମାନେ ସୋମବାର ଅହମଦାବାଦରେ ପହଞ୍ଚିଛନ୍ତି। କେଉଁ କାରଣରୁ ଏହି ଦୁଃଖଦ ଘଟଣା ଘଟିଲା ତାହାର ତଦନ୍ତ ଚାଲିଛି। ଜୁନ୍ ୧୨ରେ ସର୍ଦ୍ଦାର ବଲ୍ଲଭଭାଇ ପଟେଲ ଅନ୍ତର୍ଜାତୀୟ ବିମାନବନ୍ଦରରୁ ଉଡ଼ାଣ ଭରିବାର କିଛି ସମୟ ପରେ ଲଣ୍ଡନ ଅଭିମୁଖେ ଯାଉଥିବା ବୋଇଂ ୭୮୭-୮ ଡ୍ରିମ୍‌ଲାଇନର୍‌ ବିମାନ ଏକ ହଷ୍ଟେଲ ଉପରେ ଖସି ପଡ଼ିଥିଲା, ଯେଉଁଥିରେ ଗୁଜରାଟର ପୂର୍ବତନ ମୁଖ୍ୟମନ୍ତ୍ରୀ ବିଜୟ ରୂପାନୀଙ୍କ ସମେତ ୨୪୧ ଜଣ ଯାତ୍ରୀ ଓ କର୍ମଚାରୀଙ୍କ ମୃତ୍ୟୁ ଘଟିଥିଲା।

ଆଜି ଅହମଦାବାଦସ୍ଥିତ ଏୟାର୍ ଇଣ୍ଡିଆ ବିମାନ ଦୁର୍ଘଟଣାସ୍ଥଳରେ ପହଞ୍ଚି ଯାଞ୍ଚ କରିଥିବା ବ୍ରିଟେନର ଜଣେ ବିଶେଷଜ୍ଞ କହିଛନ୍ତି, ତଦନ୍ତ ପରେ ଦୁର୍ଘଟଣାର କାରଣ ଜଣାପଡ଼ିବ। ଅନ୍ୟପକ୍ଷରେ ଅହମଦାବାଦର ସିଭିଲ ହସ୍ପିଟାଲର ଡାକ୍ତର ରଜନୀଶ ପଟେଲ ଗଣମାଧ୍ୟମକୁ କହିଛନ୍ତି ଯେ ବର୍ତ୍ତମାନ ସୁଦ୍ଧା ୪୭ଟି ମୃତଦେହ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି। ଏହି ଦୁର୍ଘଟଣାରେ ବିମାନରେ ଥିବା ୨୪୨ ଜଣଙ୍କ ମଧ୍ୟରୁ ୨୪୧ ଜଣଙ୍କ ମୃତ୍ୟୁ ଘଟିଥିବା ବେଳେ ଏକମାତ୍ର ବଞ୍ଚିଥିବା ଭାରତୀୟ ବଂଶୋଦ୍ଭବ ବ୍ରିଟିସ ନାଗରିକ ବିଶ୍ୱାସ କୁମାର ରମେଶ ଏବେ ଚିକିତ୍ସାଧୀନ ଅଛନ୍ତି। ବିମାନର ୨୪୧ଜଣଙ୍କ ବ୍ୟତୀତ ବା‌ହାରେ ୩୩ ଜଣଙ୍କର ମୃତ୍ୟୁ ହୋଇଛି।