ଭାରତ ବିରୋଧୀ ବ୍ରିଟିସ ସାଂସଦଙ୍କୁ ନୂଆଦିଲ୍ଲୀ ଏୟାରପୋର୍ଟରୁ ଫେରାଇ ଦିଆଗଲା
ନୂଆଦିଲ୍ଲୀ : ନିଜର ଭାରତ ବିରୋଧୀ ଅଭିମୁଖ୍ୟ ପାଇଁ ପରିଚିତ ବ୍ରିଟିଶ ଲେବର ପାର୍ଟିର ସାଂସଦ ଡେବି ଆବ୍ରାହମଙ୍କୁ ଆଜି ନୂଆଦିଲ୍ଲୀର ଇନ୍ଦିରା ଗାନ୍ଧି ଅନ୍ତର୍ଜାତୀୟ ଏୟାରପୋର୍ଟରେ ହଟହଟା ହେବାକୁ ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସେ ଏକ ବୈଧ ଭିସା ନେଇ ଭାରତକୁ ଦୁଇଦିନିଆ ବ୍ୟକ୍ତିଗତ ଗସ୍ତରେ ଆସିଥିବାବେଳେ ତାଙ୍କ ଭିସାକୁ ଭାରତ ସରକାର ହଠାତ ରଦ୍ଦ କରିଦେବା ସହ ତାଙ୍କୁ ଏୟାରପୋର୍ଟରୁ ହିଁ ଦୁବାଇ ପଠାଇଦିଆଯାଇଛି । ଭାରତ ସରକାର କୌଣସି କାରଣ ନ ଦର୍ଶାଇ ଏହି ଭିସାକୁ ରଦ୍ଦ କରିଦେଇଥିଲେ ବୋଲି ତାଙ୍କ ସହ ଆସିଥିବା ହରପ୍ରିତ ଉପଲ କହିଛନ୍ତି । ତେବେ ଭାରତର ବୈଦେଶିକ ମନ୍ତ୍ରାଳୟ ଏ ସଂପର୍କରେ ଏପର୍ଯ୍ୟନ୍ତ କୌଣସି ମନ୍ତବ୍ୟ ଦେଇନାହିଁ ।
୨୦୧୧ରୁ ସାଂସଦ ଥିବା ଆବ୍ରାହମ କଶ୍ମୀର ସଂପର୍କିତ ଏକ ବ୍ରିଟିଶ ସଂସଦୀୟ କମିଟିର ଅଧ୍ୟକ୍ଷ ଅଛନ୍ତି । ଭାରତର କଶ୍ମୀର ନୀତିକୁ ନେଇ ସେ ସବୁବେଳେ ଭାରତକୁ ସମାଲୋଚନା କରିଆସିଛନ୍ତି । ଗତ ବର୍ଷ ଅଗଷ୍ଟ ମାସରେ ଭାରତ ସରକାର କଶ୍ମୀରରୁ ଧାରା ୩୭୦ ପ୍ରତ୍ୟାହାର କରିବା ଓ ଜମ୍ମୁ ଓ କଶ୍ମୀରର ରାଜ୍ୟମାନ୍ୟତା ପ୍ରତ୍ୟାହାର କରିବା ପରେ ସେ ଭାରତକୁ ତୀବ୍ର ସମାଲୋଚନା କରିଥିଲେ । ଭାରତର ଏହି ନିଷ୍ପତ୍ତି ପରେ ସେ ଲଣ୍ଡନସ୍ଥିତ ଭାରତୀୟ ହାଇ କମିଶନରଙ୍କୁ ଏକ ପତ୍ର ଲେଖି ଦର୍ଶାଇଥିଲେ ଯେ ଭାରତ କଶ୍ମୀରବାସୀଙ୍କ ସହ ବିଶ୍ୱାସଘାତକତା କରିଛନ୍ତି ।