ଖନନ କାମ ଦେଖିବାକୁ ଯିବା ଡିଏସପିଙ୍କର ନଥିଲା, ହତ୍ୟା ପଛରେ ଏସଏଚଓଙ୍କ ହାତ ଅଛି: ମୃତ ଡିଏସପିଙ୍କ ଭାଇ
ନୁହ(ହରିୟାଣା): ଗତକାଲି ହରିୟାଣାର ନୁହ ଜିଲ୍ଲାରେ ଖଣି ମାଫିଆଙ୍କ ଦବଙ୍ଗଗିରି ଦେଖିବାକୁ ମିଳିଥିଲା। ଡିଏସପିଙ୍କୁ ଟ୍ରକ ଚଢ଼ାଇ ମାରିଦେଇଥିଲେ ଖଣି ମାଫିଆ। ବେଆଇନ ଖନନ ହେଉଥିବାର ସୂଚନା ପାଇ ଯାଞ୍ଚ ପାଇଁ ଯାଇଥିବା ଡିଏସପି ସୁରେନ୍ଦ୍ର ସିଂହ ବିଷ୍ଣୋଇଙ୍କ ଉପରେ ପଥର ବୋଝେଇ ଟ୍ରକ ଚଢ଼ାଇ ଖଣି ମାଫିଆମାନେ ତାଙ୍କୁ ହତ୍ୟା କରିଥିଲେ। ଘଟଣାସ୍ଥଳରେ ହିଁ ସୁରେନ୍ଦ୍ର ସିଂହଙ୍କ ମୃତ୍ୟୁ ହୋଇଥିବା ବେଳେ ଏବେ ତାଙ୍କୁ ହତ୍ୟା କରିବା ପାଇଁ ପୂର୍ବରୁ ଷଡ଼ଯନ୍ତ୍ର ହୋଇଥିଲା ବୋଲି କହିଛନ୍ତି ସୁରେନ୍ଦ୍ର ସିଂହଙ୍କ ଭାଇ ମଖନ ସିଂହ।
Sambad is now on WhatsApp
Join and get latest news updates delivered to you via WhatsApp
ମଖନ ସିଂ ସେହି ଅଞ୍ଚଳର ଖଣି ବିଭାଗ ଏବଂ ଷ୍ଟେସନ ହାଉସ ଅଫିସର (ଏସଏଚଓ)ଙ୍କ ବିରୋଧରେ ସିବିଆଇ ତଦନ୍ତ କରିବା ପାଇଁ ଦାବି କରିଛନ୍ତି।ତାଙ୍କ କହିବା ମୁତାବକ, ଖନନ କାମ ଦେଖିବା ପାଇଁ ଖଣିକୁ ଯିବା ମୋ ଭାଇର କାମ ନଥିଲା। ତାଙ୍କ ପାଖକୁ ଏକ କଲ ଆସିବା ପରେ ସେ ସେଠାକୁ ଯାଇଥିଲେ। କିନ୍ତୁ ମୋ ଭାଇଙ୍କ ପରିବର୍ତ୍ତେ ଏସଏଚଓ ସେଠାକୁ ଯିବାର ଥିଲା। ଏହା ପଛରେ ଏକ ବିରାଟ ଷଡଯନ୍ତ୍ର ରହିଛି। ଏସଏଚଓ ଏବଂ ଖଣି ବିଭାଗକୁ ଅନୁସନ୍ଧାନର ପରିସରଭୁକ୍ତ କରାଯିବା ଉଚିତ୍। ମୋ ଭାଇଙ୍କ ପାଖକୁ ଆସିଥିବା କଲକୁ ଟ୍ରେସ କରାଯିବା ଉଚିତ୍।
ଉଲ୍ଲେଖଯୋଗ୍ୟ, ଘଟଣାଟି ନୁହ ଜିଲ୍ଲାର ତାବଡୁ ପୁଲିସ ଷ୍ଟେସନ ଅଞ୍ଚଳରେ ଥିବା ଗାଁ ପଚଗାଓଁରେ ଘଟିଥିଲା। ଡିଏସପି ସୁରେନ୍ଦ୍ର ସିଂ ଗ୍ରାମକୁ ଲାଗିଥିବା ଅରବାଲି ପାହାଡରେ ବେଆଇନ ଖଣି ଖନନ ସମ୍ପର୍କରେ ସୂଚନା ପାଇଥିଲେ। ଏହା ପରେ ସେ ମଙ୍ଗଳବାର ଦିନ ୧୧ଟା ସମୟରେ ତାଙ୍କ ଟିମ ସହ ସେଠାରେ ପହଞ୍ଚିଥିଲେ। ପୁଲିସ୍ ଟିମ୍ ଦେଖି ଟ୍ରକ ଡ୍ରାଇଭର ଏବଂ ଖଣି କାର୍ଯ୍ୟରେ ନିୟୋଜିତ ଲୋକମାନେ ପାହାଡ ନିକଟରେ ଠିଆ ହୋଇଥିବା ଟ୍ରକ ନେଇ ଖସି ଯିବାକୁ ଚେଷ୍ଟା କରିଥିଲେ। ଗାଡି ଅଟକାଇବା ପାଇଁ ଡିଏସପି ଆଗକୁ ଆସିବା ପରେ ଟ୍ରକ ଡ୍ରାଇଭର ତାଙ୍କ ଉପରେ ଗାଡ଼ି ଚଢ଼ାଇ ଘଟଣାସ୍ଥଳରୁ ଖସି ପଳାଇଥିଲେ। ଫଳରେ ଟ୍ରକର ଚକା ତଳେ ଚାପି ହୋଇଯିବାରୁ ଡିଏସପିଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା।