ବଜେଟ୍ LIVE : ବଦଳିଲାନି ଆୟକର ଛାଡ଼ସୀମା, ମହଙ୍ଗା ହେବ ମୋବାଇଲ ଫୋନ, ଟିଭି
ନୂଆଦିଲ୍ଲୀ: ବଜେଟରେ ସାଧାରଣ ଆୟକର ଦାତାଙ୍କ ପାଇଁ ଆୟକର ଛାଡ ସୀମା ବଢିବ ବୋଲି ଆଶା କରାଯାଉଥିଲା । କିନ୍ତୁ ଏ କ୍ଷେତ୍ରରେ ନିରାଶ କରିଛନ୍ତି ଅର୍ଥମନ୍ତ୍ରୀ ଜେଟଲୀ । ୨୦୧୮-୧୯ ବଜେଟରେ ଆୟକର ଛାଡ଼ସୀମାରେ କୌଣସି ପରିବର୍ତ୍ତନ କରାଯାଇନାହିଁ । ଅର୍ଥାତ୍ ଆୟକର ଛାଡସୀମା ୨.୫ ଲକ୍ଷ ଟଙ୍କା ବଜାୟ ରହିବ । ତେବେ ବେତନଭୋଗୀ କର୍ମଚାରୀଙ୍କ ପାଇଁ ୪୦ ହଜାର ଟଙ୍କାର ଷ୍ଟାଣ୍ଡାର୍ଡ ଡିଡକ୍ସନ ଘୋଷଣା କରାଯାଇଛି । ଆହୁରି ମଧ୍ୟ ବରିଷ୍ଠ ନାଗରିକଙ୍କ ପାଇଁ ଆୟକର କ୍ଷେତ୍ରରେ କେତେକ ରିହାତି ଘୋଷଣା କରାଯାଇଛି । ବରିଷ୍ଠ ନାଗରିକମାନେ ବ୍ୟାଙ୍କ ଜମା ଉପରେ କରୁଥିବା ଆୟ ଉପରେ ରିହାତି ସୀମାକୁ ୫୦ ହଜାର ଟଙ୍କାକୁ ବୃଦ୍ଧି କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ପରୋକ୍ଷ ଟିକସ ବ୍ୟବସ୍ଥା ଏବେ ମୁଖ୍ୟତଃ ଜିଏସଟି ଅଧିନକୁ ଚାଲିଯାଇଥିବାରୁ ଜେଟଲୀ କେବଳ ସୀମା ଶୁଳ୍କ କ୍ଷେତ୍ରରେ କେତେକ ପରିବର୍ତ୍ତନ କରିଛନ୍ତି । ମୋବାଇଲ ଫୋନ ଓ ଟିଭି ଉପରେ ସୀମା ଶୁଳକ ବୃଦ୍ଧି କରାଯାଇଥିବାରୁ ଏଗୁଡ଼ିକ ମହଙ୍ଗା ହେବାର ସମ୍ଭାବନା ରହିଛି । ଅନ୍ୟପକ୍ଷରେ କ୍ଷୁଦ୍ର ଓ ମଧ୍ୟମ ଶିଳ୍ପ ସଂସ୍ଥାଙ୍କ ପାଇଁ ମଧ୍ୟ ସରକାର ଟିକସ ବୋଝକୁ ଟିକିଏ କମାଇଦେଇଛନ୍ତି । ଏବେ ବାର୍ଷିକ ୨୫୦ କୋଟି ଟଙ୍କାରୁ କମ କାରବାର କରୁଥିବା କମ୍ପାନିମାନେ ୨୫ ପ୍ରତିଶତ ଟିକସ ଦେବେ ।