ବସରେ ନିଆଁ ଲାଗି ୨୨ ଜଣ ଯାତ୍ରୀ ପୋଡିଯିବା ଘଟଣା: ଡ୍ରାଇଭର ଓ ମାଲିକଙ୍କୁ ଦଶବର୍ଷ କାରାଦଣ୍ଡରେ ଦଣ୍ଡିତ କଲେ କୋର୍ଟ
ଭୋପାଳ: ମଧ୍ୟପ୍ରଦେଶର ପାନ୍ନାରେ ୨୦୧୫ ମସିହାରେ ଘଟିଥିବା ବହୁ ଚର୍ଚ୍ଚିତ ବସ୍ ଦୁର୍ଘଟଣାରେ ସ୍ୱତନ୍ତ୍ର ଜଜ୍ ଆରପି ସୋନକରଙ୍କ ଖଣ୍ଡପୀଠ ବସ୍ ଡ୍ରାଇଭର ଏବଂ ବସ୍ ମାଲିକଙ୍କୁ ଦୋଷୀ ସାବ୍ୟସ୍ତ କରି ସେମାନଙ୍କୁ ଦଶ ବର୍ଷ କାରାଦଣ୍ଡରେ ଦଣ୍ଡିତ କରିଛନ୍ତି। ଏହି ଭୟଙ୍କର ଦୁର୍ଘଟଣାରେ ୨୨ ଜଣ ଲୋକ ଜୀବନ୍ତ ଦଗ୍ଧ ହୋଇଥିଲେ | ଡ୍ରାଇଭରଙ୍କ ଅବହେଳା ଯୋଗୁଁ ବସ୍ ଓଲଟି ପଡିଥିଲା ଏବଂ ବସରେ ନିଆଁ ଲାଗିଯାଇଥିଲା | ମେ ୪, ୨୦୧୫ ଦିନ ଅପରାହ୍ନ ୨.୩୦ ସମୟରେ ଏହି ଘଟଣା ଘଟିଥିଲା | ବମିଥାଠାରୁ ପାନ୍ନାକୁ ଯିବା ପାଇଁ ଯାତ୍ରୀମାନେ ଅନୁପ ବସ୍ ସର୍ଭିସ (ଏମପି୧୯ପି ୦୫୩୩) ରେ ଯାତ୍ରୀମାନେ ଯାଉଥିଲେ | ତେବେ ବସ ଡ୍ରାଇଭର ମହମ୍ମଦ ସାମସୁଦ୍ଦିନ୍ ଦ୍ରୁତ ଗତିରେ ବେପରୁଆ ଭାବେ ଗାଡି ଚଳାଉଥିଲେ |
ଗାଡି ଧୀରେ ଚଳାଇବାକୁ ଯାତ୍ରୀମାନେ କହିଥିଲେ ବି ସେ ଶୁଣିନଥିଲେ | ଆଉ ପାଣ୍ଡବ ଜଳପ୍ରପାତ ନିକଟରେ ଥିବା ଏକ ଛୋଟ କଲଭର୍ଟ ଉପରେ ବସ୍ ଓଲଟି ପଡିଥିଲା। ବସ୍ ଓଲଟି ପଡ଼ିବା ପରେ ଏଥିରେ ନିଆଁ ଲାଗିଯାଇଥିଲା | କିଛି ଯାତ୍ରୀ ବସରୁ ବାହାରିବାକୁ ସକ୍ଷମ ହୋଇଥିଲେ ବି ଅଧିକାଂଶ ବସରୁ ବାହାରିପାରିନଥିଲେ | ଆଉ ବସ୍ରେ ଥିବା ପ୍ରାୟ ୨୨ଜଣ ଲୋକ ଜୀବନ୍ତ ଦଗ୍ଧ ହୋଇଯାଇଥିଲେ | ଏହା ପରେ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ବ୍ୟବଛେଦ ପାଇଁ ପଠାଇଥିଲା |
ଅନୁସନ୍ଧାନ ପରେ ଅଭିଯୁକ୍ତ ଡ୍ରାଇଭର ମହମ୍ମଦ ସାମସୁଦ୍ଦିନଙ୍କ ନାମରେ ଧାରା ୨୭୯, ୩୩୭, ୩୦୪ଏ, ୩୩୮, ୩୦୪ ଅନୁଯାୟୀ ମାମଲା ରୁଜୁ କରାଯାଇଥିଲା। । ସେହିପରି ବସ ମାଲିକଙ୍କ ନାମରେ ୩୩୮, ୩୦୪, ୩୪, ୨୮୭ ଏବଂ ଧାରା ୧୯୧ ମୋଟର ଯାନ ଅଧିନିୟମ ଅନୁଯାୟୀ ଗିରଫ କରାଯାଇଥିଲା | ସମସ୍ତ ପ୍ରମାଣ ଏବଂ ଶୁଣାଣି ପରେ କୋର୍ଟ ଡ୍ରାଇଭର ମହମ୍ମଦ ସାମସୁଦ୍ଦିନ ଏବଂ ବସ୍ ମାଲିକ ଜ୍ଞାନେନ୍ଦ୍ର ପାଣ୍ଡେଙ୍କୁ ଦୋଷୀ ସାବ୍ୟସ୍ତ କରି ଦଣ୍ଡ ଶୁଣାଇଥିଲେ |
