ଭାରତୀୟ ତୀର୍ଥଯାତ୍ରୀଙ୍କୁ ନେଇ ନେପାଳରୁ ଫେରୁଥିବା ବସ୍‌ ଦୁର୍ଘଟଣାଗ୍ରସ୍ତ, ୬୦ରୁ ଅଧିକ ଆହତ

ନୂଆଦିଲ୍ଲୀ: ଭାରତୀୟ ତୀର୍ଥଯାତ୍ରୀଙ୍କୁ ନେଇ ନେପାଳରୁ ଫେରୁଥିବା ଏକ ତୀର୍ଥଯାତ୍ରୀ ବସ୍‌ ଶନିବାର ଅପରାହ୍ନରେ ଦୁର୍ଘଟଣାଗ୍ରସ୍ତ ହେବା ଫଳରେ ଏଥିରେ ଥିବା ୬୦ରୁ ଅଧିକ ତୀର୍ଥଯାତ୍ରୀ ଆହତ ହୋଇଛନ୍ତି।

ହସ୍ତଗତ ହୋଇଥିବା ରିପୋର୍ଟରୁ ପ୍ରକାଶ, ନେପାଳର ତ୍ରିବେନିରୁ ଭାରତୀୟ ତୀର୍ଥଯାତ୍ରୀଙ୍କୁ ଧରି ଫେରୁଥିବା ଏକ ତୀର୍ଥଯାତ୍ରୀ ବସ୍‌ ନିୟନ୍ତ୍ରଣ ହରାଇ ଏକ ଖାତରେ ଓଲଟି ପଡିବାରୁ ଏହି ଦୁର୍ଘଟଣା ଘଟିଥିଲା। ଏହି ଦୁର୍ଘଟଣାରେ ଅତି କମରେ ୬୦ ଜଣ ତୀର୍ଥଯାତ୍ରୀ ଆହତ ହୋଇଥିଲେ।

ଦୁର୍ଘଟଣାଗ୍ରସ୍ତ ହୋଇଥିବା ତୀର୍ଥଯାତ୍ରୀ ବସରେ ଉତ୍ତରପ୍ରଦେଶ ଗୋରଖପୁର ଜିଲ୍ଲାର ପିପିଗଞ୍ଜ ଏବଂ କ୍ୟାମ୍ପିରଗଞ୍ଜରୁ ୭୦ ଜଣ ଭକ୍ତ ଥିଲେ, ଯେଉଁମାନେ ନେପାଳର ତ୍ରିବେଣୀ ଧାମରୁ ଫେରୁଥିଲେ।

ଫେରିବା ବାଟରେ ଥୁଥିବାରୀ ସୀମାଠାରୁ ୫୦୦ ମିଟର ଦୂରରେ ଥିବା ଭାରତ-ନେପାଳ ସୀମାରେ ଏହି ଦୁର୍ଘଟଣା ଘଟିଛି। ନେପାଳ ପୁଲିସର ଅଧିକାରୀମାନେ ଘଟଣାସ୍ଥଳରେ ପହଞ୍ଚି ଆହତ ଯାତ୍ରୀମାନଙ୍କୁ ନେପାଳର ନଓ୍ଵାଲ ପାରାସି ଜିଲ୍ଲାର ପୃଥ୍ଵୀଚାନ୍ଦ ଜିଲ୍ଲା ଡାକ୍ତରଖାନାକୁ ଚିକିତ୍ସା ପାଇଁ ନେଇଥିଲେ।

ଉତ୍ତରପ୍ରଦେଶର ମହାରାଜଗଞ୍ଜର ଜିଲ୍ଲା ମାଜିଷ୍ଟ୍ରେଟ ନେପାଳର ଅଧିକାରୀଙ୍କ ସହ କଥା ହୋଇ ଘଟଣା ସଂପର୍କରେ ବୁଝିଥିବା ବେଳେ ଆହତମାନଙ୍କୁ ସାହାଯ୍ୟ କରିବା ପାଇଁ ଅଧିକାରୀମାନଙ୍କୁ ନେପାଳ ପଠାଯାଇଛି।