ଦୁଇଚକିଆ କିଣିବା ବେଳେ ଦୁଇଟି ହେଲମେଟ୍ କିଣିବା ଜରୁରୀ, ନ ହେଲେ ହୋଇପାରିବନି ପଞ୍ଜିକରଣ
ମୁମ୍ବାଇ: ଏଣିକି ଦୁଇଚକିଆ ଗାଡି ସହ ହେଲମେଟ କିଣିବା ବାଧ୍ୟତାମୂଳକ ହେବ । ପୁଣି ଗୋଟିଏ ନୁହେଁ ଦୁଇଟି କିଣିବାକୁ ପଡ଼ିବ । ଯଦି ଆପଣ ଦୁଇଚକିଆ ଗାଡ଼ି କିଣୁଛନ୍ତି ତେବେ ସାଥିରେ ଆପଣଙ୍କୁ କିଣିବାକୁ ପଡିବ ଦୁଇ ଦୁଇଟି ହେଲମେଟ୍ । ନଚେତ ଆପଣଙ୍କ ଗାଡିର ରେଜିଷ୍ଟ୍ରେସନ ହେବ ନାହିଁ । ତେବେ ଉଭୟ ଚାଳକ ଏବଂ ସହଯାତ୍ରୀଙ୍କ ସୁରକ୍ଷାକୁ ନଜରରେ ରଖି ଏଭଳି ନିଷ୍ପତ୍ତି ନେଇଛନ୍ତି ମହାରାଷ୍ଟ୍ର ସରକାର ।
Sambad is now on WhatsApp
Join and get latest news updates delivered to you via WhatsApp
ଗାଡି ପଂଜିକରଣ କରିବା ପୂର୍ବରୁ ଆବେଦନକାରୀଙ୍କ ନିକଟରେ ଦୁଇଟି ହେଲମେଟ ଅଛି କି ନାହିଁ , ତାର ପ୍ରମାଣ ମଧ୍ୟ ଦେଖାଇବାକୁ ପଡିବ । ତେବେ ଦୁଇଚକିଆ ଗାଡି କିଣିବା ସମୟରେ ଦୁଇଟି ହେଲମେଟର ପୂରା ତଥ୍ୟ ଗାଡି ସହ ଦିଆଯାଇଥିବା ସମସ୍ତ ଦସ୍ତାବିଜ ସହ ସଂଯୁକ୍ତ କରାଯିବ । ଫଳରେ ଗାଡି ବିକ୍ରି ସମୟରେ ଡିଲର ଗ୍ରାହକଙ୍କୁ ଦୁଇଟି ହେଲମେଟ ଉପଲବ୍ଧ କରାଇବେ। ତେବେ ଦୁଇଟି ହେଲମେଟର ରସିଦକୁ ଗାଡିର ରେଜିଷ୍ଟ୍ରେସନ ସମୟରେ ଆରଟିଓରେ ଦେଖାଇବା ପରେ ହିଁ ଯାଇ ଗାଡିର ରେଜିଷ୍ଟ୍ରେସନ ହୋଇପାରିବ ବୋଲି କହିଛନ୍ତି ମହାରାଷ୍ଟ୍ର ସରକାର । ସେହିଭଳି କେନ୍ଦ୍ରୀୟ ମୋଟର ଯାନ ଆଇନ, ୧୯୮୯ର ଧାରା ୧୩୮ (୪)(ଏଫ) ଅନୁସାରେ ଦୁଇ ଚକିଆ ଗାଡି କିଣିବା ସମୟରେ ଗ୍ରାହକଙ୍କୁ କଂପାନି ପକ୍ଷରୁ ଏକ ସୁରକ୍ଷାତ୍ମକ ହେଲମେଟ୍ ତଥା ବିଏସଆଇମାନକ ଯୁକ୍ତ ହେଲମେଟ୍ ଦେବା ବାଧ୍ୟତାମୂଳକ କରାଯାଇଛି । ଆଉ ଏହି ନିୟମକୁ ବର୍ତ୍ତମାନ ରାଜ୍ୟରେ କଡାକଡି ଭାବେ ଲାଗୁ କରିବାକୁ ନିର୍ଦ୍ଦେଶ ଦେଇଛନ୍ତି ମହାରାଷ୍ଟ୍ର ସରକାର ।
