ସୃଷ୍ଟି କଲେ ଉଦାହରଣ: ଅସଦାଚରଣକାରୀ ଠାରୁ ମହିଳାଙ୍କୁ ବଞ୍ଚାଇବା ପାଇଁ ତାଙ୍କ ପ୍ରେମିକ ସାଜିଲେ କ୍ୟାବ୍ ଚାଳକ…
ନୂଆଦିଲ୍ଲୀ : କ୍ୟାବ୍ର ନାଁ ଆସିବା ମାତ୍ରେ ମହିଳାଙ୍କ ସହ କ୍ୟାବ୍ରେ ହେଉଥିବା ଅସଦାଚରଣ କଥା ସାମ୍ନାକୁ ଆସିଥାଏ । କିଛି ଦିନ ତଳେ ବେଙ୍ଗାଲୁରୁରେ ଜଣେ ମହିଳା ଉବର ଚାଳକଙ୍କ ଦ୍ୱାରା ଅସଦାଚରଣର ଶିକାର ହୋଇଥିବା ଖବର ସାମ୍ନାକୁ ଆସିଥିଲା । ମହିଳାଜଣଙ୍କ ନିଜ ସହକର୍ମୀଙ୍କ ସହ ରାତ୍ରି ଭୋଜନ ସାରି ଫେରୁଥିବା ବେଳେ ଚାଳକ ତାଙ୍କୁ ଗାଡ଼ିରୁ ବାହାରି ଯାଅ ନହେଲେ ତୁମ ପୋଷାକ ଚିରି ଦେବି ବୋଲି କହି ଧମକ ଦେଇଥିଲେ । ଏଭଳି ଅନେକ ଦୃଶ୍ୟ ସାମ୍ନାକୁ ଆସି ସାରିଥିବା ବେଳେ ଇଂଲଣ୍ଡର ଜଣେ ଚାଳକ ଯେଉଁ କାମ କରିଛନ୍ତି, ତାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି । ଅସଦାଚରଣକାରୀ ଠାରୁ ମହିଳାଙ୍କୁ ବଞ୍ଚାଇବା ପାଇଁ ଚାଳକ ଜଣଙ୍କ ନିଜକୁ ତାଙ୍କ ପ୍ରେମିକ ବୋଲି ପରିଚୟ ଦେବା ଖବର ଏବେ ଚର୍ଚ୍ଚାର ବିଷୟ ପାଳଟିଛି ।
Sambad is now on WhatsApp
Join and get latest news updates delivered to you via WhatsApp
ଚାଳକ ଗାରେଥ ଗେଲ୍ଙ୍କ ଫେସ୍ବୁକ୍ରେ କରିଥିବା ପୋଷ୍ଟ ଅନୁଯାୟୀ, ଗତ ରାତିରେ ମୋ ପାଖକୁ ଜଣେ ମହିଳାଙ୍କ ବୁକିଂ ଆସିଥିଲା । ମୁଁ ବୁକିଂ ଗ୍ରହଣ କରିବା ପରେ ସେ ମୋତେ ଏକ ମେସେଜ୍ ପଠାଇଥିଲେ । ତୁମେ ମୋତେ ନେବା ପାଇଁ ପହଞ୍ଚିବା ପରେ ଏଠାରେ ମୋର ପ୍ରେମିକ ଭଳି ବ୍ୟବହାର କରିବ କି? ବୋଲି ମୋତେ ମହିଳା ଜଣଙ୍କ ମେସେଜ କରିଥିଲେ । ହଠାତ ମୁଁ କିଛି ବୁଝି ନ ପାରି ତାଙ୍କୁ ପୁଣି ଥରେ ପଚାରିଥିଲି । ତା’ପରେ, ଏବେ ଆପଣଙ୍କ ସାହାଯ୍ୟ ମୋତେ ଦରକାର । ଆପଣ ମୋର କ୍ୟାବ୍ ଚାଳକ ନ ହୋଇ ପ୍ରେମିକ ଭଳି ବ୍ୟବହାର କରିବେ କି? ବୋଲି ଲେଖିିଥିଲେ । ଏହା ଦେଖି ମୁଁ ମୋ କାର୍ରୁ ଉବର ଷ୍ଟିକର ହଟାଇ ଦେଇଥିଲି । ସେଠାରେ ପହଞ୍ଚିବା ପରେ ଜଣେ ମହିଳାଙ୍କ ସହ ଜଣେ ପୁରୁଷ ଠିଆ ହୋଇଥିଲେ । ମୋତେ ଦେଖି ମହିଳା ଜଣଙ୍କ ତାଙ୍କ ପ୍ରେମିକଙ୍କ ଭଳି ବ୍ୟବହାର କରିବା ସହ ଗାଡ଼ିରେ ଆସି ବସିଥିଲେ । ଆମେ ସେଠାରୁ ଆସିବା ପରେ ସେ ମୋତେ ପୂରା କାହାଣୀ ଜଣାଇଥିଲେ ।
ମହିଳାଙ୍କ ଅନୁଯାୟୀ, ସେ ନିଜ ବନ୍ଧୁମାନଙ୍କ ସହ ଏକ ମେଳାକୁ ବୁଲି ଯାଇଥିବା ବେଳେ ସେମାନଙ୍କ ଭିତରୁ ଜଣେ ମହିଳାଙ୍କ ନିକଟତର ହେବାକୁ ଚେଷ୍ଟା କରିଥିଲା । ଏମିତିକି ଘରେ ଛାଡ଼ିଦେବା ପାଇଁ ମଧ୍ୟ ଅଫର ଦେଇଥିଲେ । ମହିଳାଣଙ୍କ ମନା କରିଥିଲେ ମଧ୍ୟ ସେ ତାଙ୍କୁ ଅନୁସରଣ କରି ରାସ୍ତା ଉପରକୁ ଆସିଥିଲେ । ସେଠାରେ କଥା ହେବା ସମୟରେ ଅଭିଯୁକ୍ତ ଯୁବକଜଣଙ୍କ ତାଙ୍କର ନିକଟତର ହେଉଥିବା ଦେଖି ମହିଳା ଜଣଙ୍କ କ୍ୟାବ୍ ଚାଳକଙ୍କୁ ପ୍ରେମିକର ପରିଚୟ ଦେବାକୁ ଚିନ୍ତା କରିଥିଲେ ବୋଲି ଲେଖିଛନ୍ତି । ତେବେ ଗାରେଥ୍ଙ୍କ ଏଭଳି କାମକୁ ଲୋକେ ପ୍ରଶଂସା କରିବାରେ ଲାଗିଛନ୍ତି ।