ଦେଓଘର: ଦେଓଘରର ତ୍ରିକୂଟ ପର୍ବତରେ ଦୁଇଟି ରୋପ୍‌ୱେ କାର ଭିତରେ ଦୁର୍ଘଟଣା ଘଟିବା ଯୋଗୁ ୩ ଜଣ ମୃତ୍ୟୁ ହେବା ସହ ଦୀର୍ଘ ୨୦ ଘଣ୍ଟାରୁ ଅଧିକ କାଳ ୪୮ ଜଣ ପର୍ଯ୍ୟଟକ ରୋପ୍‌ୱେରେ ଫସି ରହିଥିଲେ। ସ୍ଥାନୀୟ ବାସିନ୍ଦା, ପ୍ରଶାସନ, ସେନା ଓ ଏନ୍‌ଡିଆର୍‌ଏଫ୍‌(ନ୍ୟାସନାଲ ଡିଜାଷ୍ଟର ରେସ୍ପନ୍ସ ଫୋର୍ସ) ଟିମ୍ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଏହି ଦୁର୍ଘଟଣାରେ ଅନେକ ଲୋକ ଆହତ ହୋଇ ଦେଓଘର ସଦର ହସ୍ପିଟାଲରେ ଚିକିତ୍ସିତ ହେଉଛନ୍ତି। ତେବେ ନିର୍ଦ୍ଦିଷ୍ଟ କାରଣ ଜଣାପଡ଼ି ନ ଥିଲେ ମଧ୍ୟ କୌଣସି ବୈଷୟିକ ତ୍ରୁଟି ଯୋଗୁ ଦୁର୍ଘଟଣା ଘଟିଲା ବୋଲି ପ୍ରଶାସନ ପକ୍ଷରୁ କୁହାଯାଇଛି।

Advertisment

ଏ ପର୍ଯ୍ୟନ୍ତ ପ୍ରାୟ ୩୪ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଆହୁରି ୧୩ ଜଣ ଫସି ରହିଥିବା ଜଣାପଡ଼ିଛି। ଡ୍ରୋନ୍ ସାହାଯ୍ୟରେ ସେମାନଙ୍କ ପାଖକୁ ଖାଦ୍ୟ ଓ ପାନୀୟ ପଠାଯାଉଛି। ଅଟକି ରହିଥିବା ଲୋକଙ୍କ ଭିତରେ ଅନେକ ମହିଳା ଓ ପିଲା ବି ଅଛନ୍ତି। ଯେଉଁମାନେ ଅଟକି ରହିଛନ୍ତି ସେମାନେ ନିରାପଦ ଅଛନ୍ତି ଓ ଉଦ୍ଧାର ପ୍ରକ୍ରିୟା ଜାରି ରହିଛି ବୋଲି ଆଇଟିବିପି (ଇଣ୍ଡୋ-ତିବ୍ବତୀୟ ସୀମା ପୁଲିସ)ର ଜନସମ୍ପର୍କ ଅଧିକାରୀ ବିବେକ କୁମାର ପାଣ୍ଡେ ସୂଚନା ଦେଇଛନ୍ତି। ବାୟୁସେନାର ଦୁଇଟି ଏମ୍‌ଆଇ-୧୭ ହେଲିକପ୍ଟର ଉଦ୍ଧାର କାର୍ଯ୍ୟରେ ନିୟୋଜିତ ହୋଇଛନ୍ତି। ଝାଡ଼ଖଣ୍ଟ ଟୁରିଜିମ୍‌ର ସୂଚନା ଅନୁସାରେ ତ୍ରିକୂଟ ରୋପ୍‌ୱେ ହେଉଛି ଭାରତର ଉଚ୍ଚତମ ତୀଖ ରୋପ୍‌ୱେ ଯାହାର ସର୍ବାଧିକ ଲେନ୍ସ ଆଙ୍ଗଲ ହେଉଛି ୪୪ ଡିଗ୍ରି। ଏହି ରୋପ୍‌ୱେ ବାବା ବୈଦ୍ୟନାଥ ମନ୍ଦିରଠାରୁ ପ୍ରାୟ ୨୦ କିମି ଦୂରରେ ଅବସ୍ଥିତ। ଏହା ପ୍ରାୟ ୭୬୬ ମିଟର ଦୀର୍ଘ ଓ ପାହାଡ଼ର ଉଚ୍ଚତା ହେଉଛି ୩୯୨ ମିଟର।