ଘଣ୍ଟାଏ ଭିତରେ ଦିଲ୍ଲୀରୁ ଆମେରିକା ଯାଇହେବ? ମସ୍କଙ୍କ ସ୍ପେସ୍ଏକ୍ସ ଏହାକୁ ଖୁବ୍‌ଶୀଘ୍ର ସମ୍ଭବ କରିପାରେ

ନୂଆଦିଲ୍ଲୀ: ନିକଟ ଭବିଷ୍ୟତରେ ଦିଲ୍ଲୀରୁ ସାନ୍ ଫ୍ରାନ୍ସିସ୍କୋ, ଟୋକିଓରୁ ଦିଲ୍ଲୀ ଓ ଦିଲ୍ଲୀରୁ ୱାସିଂଟନକୁ ଏକ ଘଣ୍ଟାରୁ କମ୍ ସମୟ ମଧ୍ୟରେ ଯାଇହେବ। ବିଶ୍ୱର ସବୁଠାରୁ ଧନୀ ବ୍ୟକ୍ତି ତଥା ରକେଟ୍ ଉତ୍ପାଦନକାରୀ କମ୍ପାନି ସ୍ପେସ୍ଏକ୍ସର ପ୍ରତିଷ୍ଠାତା ଏଲନ୍ ମସ୍କ ଏହାକୁ ବାସ୍ତବରେ ପରିଣତ କରିପାରନ୍ତି। ତାଙ୍କ ମହାକାଶଯାନରେ ଜଣେ ବ୍ୟକ୍ତି ଏକ ଘଣ୍ଟା କିମ୍ବା ତା’ଠାରୁ କମ୍ ସମୟ ମଧ୍ୟରେ ପୃଥିବୀର ଯେକୌଣସି ସ୍ଥାନକୁ ଯାଇପାରିବ।

ଏକ୍ସରେ ଏଲନ୍ ମସ୍କ ସେୟାର କରିଥିବା ଏକ ଭିଡିଓ ଉପରେ ଜଣେ ୟୁଜର ପ୍ରତିକ୍ରିୟା ରଖିବା ପରେ ଏହି ଧାରଣା ସୋସିଆଲ ମିଡିଆରେ ଦୃଷ୍ଟି ଆକର୍ଷଣ କରିଥିଲା, ଯେଉଁଥିରେ ସ୍ପେସ୍‌ଏକ୍ସର ମହାକାଶଯାନ କିପରି ଏହି ମହତ୍ତ୍ୱାକାଂକ୍ଷୀ ଯୋଜନାକୁ କାର୍ଯ୍ୟକାରୀ କରିବ ତାହା ଦର୍ଶାଯାଇଥିଲା। ଏହି ଭିଡିଓ ଉପରେ ପ୍ରତିକ୍ରିୟା ରଖି ଏଲନ୍ ମସ୍କ କହିଛନ୍ତି, ଏବେ ଏହା ସମ୍ଭବ। ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ବିତୀୟ ପାଳି ସମୟରେ ଏହି ପ୍ରକଳ୍ପକୁ ଫେଡେରାଲ ଏଭିଏସନ୍ ଆଡମିନିଷ୍ଟ୍ରେସନ୍ (ଏଫ୍ଏଏ)ର ଅନୁମୋଦନ ମିଳିପାରେ ବୋଲି ଏହି ପୋଷ୍ଟରେ କୁହାଯାଇଛି। 

ସୂଚନାଯୋଗ୍ୟ, ପୃଥିବୀରୁ ପୃଥିବୀ କିମ୍ବା ଅନ୍ତର୍ଗ୍ରହୀୟ ଯାତ୍ରା ହେଉଛି ଏକ ଧାରଣା ଯାହାକୁ ସ୍ପେସ୍ଏକ୍ସର ଷ୍ଟାର୍‌ସିପ୍ ମହାକାଶଯାନ ହାସଲ କରିବାକୁ ଲକ୍ଷ୍ୟ ରଖିଛି। ସ୍ପେସ୍ଏକ୍ସ ୱେବ୍‌ସାଇଟ୍‌ ଅନୁଯାୟୀ ଷ୍ଟାର୍‌ସିପ୍ ମହାକାଶଯାନ ଓ ସୁପର ହେଭି ରକେଟ୍ - ଯାହାକୁ ମିଳିତ ଭାବରେ ଷ୍ଟାର୍‌ସିପ୍ କୁହାଯାଏ - ଏକ ସମ୍ପୂର୍ଣ୍ଣ ପୁନଃବ୍ୟବହାରଯୋଗ୍ୟ ପରିବହନ ବ୍ୟବସ୍ଥାର ପ୍ରତିନିଧିତ୍ୱ କରେ, ଯାହା ଉଭୟ କ୍ରୁ ଓ କାର୍ଗୋକୁ ପୃଥିବୀ କକ୍ଷପଥ, ଚନ୍ଦ୍ର, ମଙ୍ଗଳ ଓ ଏହା ବାହାରେ ପରିବହନ କରିବା ପାଇଁ ଡିଜାଇନ୍ କରାଯାଇଛି। ବିଶ୍ୱର ସବୁଠାରୁ ଶକ୍ତିଶାଳୀ ଉତ୍‌କ୍ଷେପଣ ଯାନ ଷ୍ଟାର୍‌ସିପ୍ ଅନ୍ତର୍ଗ୍ରହୀୟ ଉଡ଼ାଣରେ ୧୦୦ ଜଣଙ୍କୁ ପରିବହନ କରିବାରେ ସକ୍ଷମ ହେବ ବୋଲି ସ୍ପେସ୍ଏକ୍ସ ଦାବି କରିଛି। ଏହା ମଧ୍ୟ ସାଟେଲାଇଟ୍ ଡେଲିଭରି, ଚନ୍ଦ୍ର ଘାଟି (ବେସ୍)ର ବିକାଶ ଏବଂ ପୃଥିବୀରେ ପଏଣ୍ଟ-ଟୁ-ପଏଣ୍ଟ ପରିବହନକୁ ସକ୍ଷମ କରିବାରେ ସାହାଯ୍ୟ କରିବ। ମସ୍କ ଛାଡ଼ିଥିବା ଭିଡିଓ ଅନୁଯାୟୀ, ଷ୍ଟାର୍‌ସିପ୍ ୨୪ ମିନିଟ୍‌ରେ ଲସ୍ ଏଞ୍ଜେଲସରୁ ଟରଣ୍ଟୋ, ଲଣ୍ଡନରୁ ନ୍ୟୁୟର୍କକୁ ୨୯ ମିନିଟ୍‌ରେ, ଦିଲ୍ଲୀରୁ ସାନ୍ ଫ୍ରାନ୍ସିସ୍କୋକୁ ୩୦ ମିନିଟ୍‌ରେ, ଟୋକିଓରୁ ଦିଲ୍ଲୀକୁ ୩୦ ମିନିଟ୍‌ରେ ଏବଂ ନ୍ୟୁୟର୍କରୁ ସାଂଘାଇକୁ ୩୯ ମିନିଟ୍‌ରେ ଲୋକଙ୍କୁ ନେଇଯାଇପାରିବ।