ଆମେରିକୀୟ ଔଷଧର ପରୀକ୍ଷାମୂଳକ ପ୍ରୟୋଗ ପରେ ପ୍ରଥମ ଥର ପାଇଁ ରୋଗୀମାନଙ୍କ ଦେହରୁ ଉଭେଇ ଗଲା କର୍କଟ ରୋଗ
ନୂଆଦିଲ୍ଲୀ: ଯୁକ୍ତରାଷ୍ଟ୍ର ଆମେରିକାର ମାନ୍ହଟନ୍ସ୍ଥିତ ‘ମେମୋରିଆଲ୍ ସ୍ଲୋଆନ୍ କେଟ୍ଟରିଙ୍ଗ୍ କ୍ୟାନ୍ସର୍ ସେଣ୍ଟର୍’ରେ କର୍କଟ ରୋଗାକ୍ରାନ୍ତ ରୋଗୀଙ୍କୁ ପରୀକ୍ଷାମୂଳକ ଭାବେ ଏକ ଔଷଧ ଦିଆଯିବା ପରେ ସେମାନେ କର୍କଟ ରୋଗ ମୁକ୍ତ ହୋଇଛନ୍ତି ବୋଲି ‘ଦି ନ୍ୟୁୟର୍କ ଟାଇମ୍ସ୍’ ରିପୋର୍ଟ କରିଛି।
Sambad is now on WhatsApp
Join and get latest news updates delivered to you via WhatsApp
ଏହା କର୍କଟ ରୋଗ ଚିକିତ୍ସା କ୍ଷେତ୍ରରେ ପ୍ରଥମ ଘଟଣା ବୋଲି କୁହାଯାଉଛି। ଏହି ପରୀକ୍ଷାମୂଳକ ଚିକିତ୍ସା ଛୋଟଧରଣର ହୋଇଥିଲେ ବି, ଦୀର୍ଘ ତଥା ଯନ୍ତ୍ରଣାଦାୟକ ‘କେମୋଥେରାପି’ ଚିକିତ୍ସା ଅଥବା ଅସ୍ତ୍ରୋପଚାର ଭଳି ଦୀର୍ଘ ତଥା ଯନ୍ତ୍ରଣାଦାୟକ ଉପଚାରରୁ ମୁକ୍ତି ଦେଇ କର୍କଟ ରୋଗରୁ ମାନବକୁ ସୁସ୍ଥ କରିବ ବୋଲି ଆଶା ଉଦ୍ରେକ ହୋଇଛି।
‘ଦି ନ୍ୟୁୟର୍କ ଟାଇମ୍ସ୍’ ରିପୋର୍ଟ ଅନୁସାରେ, ମଳଦ୍ବାର କର୍କଟ ରୋଗରେ ଆକ୍ରାନ୍ତ ହୋଇଥିବା ୧୮ଜଣଙ୍କୁ ‘ଡଷ୍ଟାର୍ଲିମାବ୍’ ନାମକ ଔଷଧ ଦିଆଯାଇଥିଲା। ଶାରୀରିକ ପରୀକ୍ଷା, ଏଣ୍ଡୋସ୍କୋପି, ‘ପିଇଟି’ ଏବଂ ‘ଏମ୍ଆର୍ଆଇ’ରେ ଉକ୍ତ ରୋଗୀମାନଙ୍କ ଦେହରେ କର୍କଟ ରୋଗ ଥିବାର ଆଭାସ ମିଳୁ ନ ଥିବାରୁ ସେମାନେ ସମ୍ପୂର୍ଣ୍ଣ ଆରୋଗ୍ୟ ହୋଇଯାଇଛନ୍ତି ବୋଲି ମନେହେଉଛି।
ଏହି ପରୀକ୍ଷାମୂଳକ ଔଷଧ ପ୍ରୟୋଗର ଫଳାଫଳ ଆଶ୍ଚର୍ଯ୍ୟଜନକ ଏବଂ ବିଶ୍ବବ୍ୟାପୀ କୋଟି କୋଟି କର୍କଟ ରୋଗୀଙ୍କ ପାଇଁ ଜୀବନର ଆଶା ସଞ୍ଚାର କରିଛି। ବିଶ୍ବ ସ୍ବାସ୍ଥ୍ୟ ସଙ୍ଗଠନ ରିପୋର୍ଟ ଅନୁସାରେ, ୨୦୨୦ରେ କର୍କଟ ରୋଗରେ ଆକ୍ରାନ୍ତ ହୋଇ ପ୍ରାୟ ୧୦ ନିୟୁତ ଲୋକ ପ୍ରାଣ ହରାଇ ଥିଲେ। ସେହି ହିସାବରେ, ପ୍ରତି ୬ ମୃତ୍ୟୁରେ ପ୍ରାୟ ଗୋଟିଏ ମୃତ୍ୟୁ ପାଇଁ କର୍କଟ ରୋଗ ଦାୟୀ।