ବୁଲା କୁକୁରଙ୍କ ଦେହରେ ପୋଷ୍ଟର ଲଗାଇ ନିଜ ପାଇଁ ପ୍ରଚାର କରୁଛନ୍ତି ପ୍ରାର୍ଥୀ
ଲଖନଉ: ନିର୍ବାଚନରେ ଜିତିବା ପାଇଁ ନିରୀହ ଜୀବଙ୍କୁ ବି ବ୍ୟବହାର କରିବାକୁ ପଛାଇଲେ ନାହିଁ ନେତା | ନିଜର ପ୍ରଚାର ପାଇଁ ଓ ନିଜ ସପକ୍ଷରେ ଭୋଟ ଯୋଗାଡ ପାଇଁ କୁକୁରଙ୍କ ଦେହରେ ପୋଷ୍ଟର ଲଗାଇ ଏବେ ନିର୍ବାଚନ ପ୍ରଚାରରେ ଲାଗିପଡିଛନ୍ତି ନେତା | ଏଭଳି ଏକ ଦୃଶ୍ୟ ଉତ୍ତରପ୍ରଦେଶରେ ଦେଖିବାକୁ ମିଳିଛି | ମିଳିଥିବା ସୂଚନା ମୁତାବକ ପଞ୍ଚାୟତ ନିର୍ବାଚନରେ ପ୍ରାର୍ଥୀମାନେ ନିଜର ପ୍ରଚାର ପାଇଁ ବିଭିନ୍ନ କୌଶଳ ଅବଲମ୍ବନ କରୁଛନ୍ତି | ଆଉ ଉତ୍ତରପ୍ରଦେଶର ରାଏବରେଲି ଓ ବାଲିଆ ଜିଲ୍ଲାରେ ଦୁଇଜଣ ପ୍ରାର୍ଥୀ ଏବେ ବୁଲା କୁକୁରଙ୍କ ଶରୀରରେ ନିଜ ପୋଷ୍ଟର ବ୍ୟବହାର କରି ପ୍ରଚାର ଅଭିଯାନ ଚଳାଇଛନ୍ତି |
Sambad is now on WhatsApp
Join and get latest news updates delivered to you via WhatsApp
ଜଣେ ପ୍ରାର୍ଥୀ କହିଛନ୍ତି ଯେ ନିର୍ବାଚନ ଆଦର୍ଶ ଆଚରଣ ବିଧିରେ ଏପରି କୌଣସି ନିୟମ ନାହିଁ, ଯେଉଁଥିରେ ନିର୍ବାଚନ ପ୍ରଚାର ପାଇଁ କୁକୁରଙ୍କୁ ବ୍ୟବହାର କରାଯାଇପାରିବ ନାହିଁ | ପୋଷ୍ଟର ଲଗାଇବା ଦ୍ୱାରା କୁକୁରଙ୍କର କୌଣସି କ୍ଷତି ହେଉନଥିବାବେଳେ ପ୍ରତିଦିନ ଖାଦ୍ୟ ଖାଇବାକୁ ଦେଉଥିବାରୁ ପୋଷ୍ଟର ଲଗାଇବାର ଅଧିକାର ଅଛି ବୋଲି ପ୍ରାର୍ଥୀ ଜଣକ ଯୁକ୍ତି ବାଢ଼ିଛନ୍ତି | ତେବେ ଏହି ଘଟଣା ଭାଇରାଲ ହେବା ପରେ ଏହାକୁ ନେଇ ପଶୁପ୍ରେମୀମାନେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି |
ପଶୁପ୍ରେମୀ କହିଛନ୍ତି ଯେ ଯଦି ଏହି ପୋଷ୍ଟର କୌଣସି ମଣିଷ ଶରୀରରେ ଲଗାଯିବ ତେବେ କିଭଳି ହେବ ? ଯେହେତୁ କୁକୁରମାନେ ପ୍ରତିରୋଧ କରିପାରିବେ ନାହିଁ, ତେଣୁ ସେମାନଙ୍କ ସହ ଏଭଳି ବ୍ୟବହାର କରାଯାଉଛି | ଯେଉଁ ପ୍ରାର୍ଥୀ ଏଭଳି ବାଟ ଆପଣାଇଛନ୍ତି ପୁଲିସ ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ପଶୁପ୍ରେମୀମାନେ ଦାବି କରିଛନ୍ତି |