ନାମାଙ୍କନ ପାଇଁ ବଳଦଗାଡ଼ିରେ ପହଞ୍ଚିଲେ ପ୍ରାର୍ଥୀ: ଭିଡ଼ିଓ ଭାଇରାଲ
ଜୈନପୁର: ଜୈନପୁରରେ ଲୋକସଭା ନିର୍ବାଚନ ପାଇଁ ନାମାଙ୍କନ ପ୍ରକ୍ରିୟା ଆରମ୍ଭ ହୋଇଛି। ବୁଧବାର ଦିନ ଜଣେ ପ୍ରାର୍ଥୀ ତାଙ୍କ ନାମାଙ୍କନ ଦାଖଲ କରିବା ପାଇଁ ଏକ ବଳଦଗାଡ଼ିରେ ପହଞ୍ଚିଥିଲେ। କୃଷକ ପରି ପୋଷାକ ପରିଧାନ କରି ଆଖୁ ଧରି ଆସିଥିବା ପ୍ରାର୍ଥୀ ଜଣକ ଆକର୍ଷଣର କେନ୍ଦ୍ର ପାଲଟିଥିଲେ। ମିଳିଥିବା ସୂଚନା ଅନୁଯାୟୀ, ସମାଜ ବିକାଶ ରାଷ୍ଟ୍ରୀୟ ସଭାପତି ତଥା ଜୈନପୁର ସଦର ଲୋକସଭା ଆସନରୁ ପ୍ରାର୍ଥୀ ଅଶୋକ ସିଂ ବୁଧବାର ଦୁଇ ସେଟ ନାମାଙ୍କନପତ୍ର ଦାଖଲ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ରିଟର୍ଣ୍ଣିଂ ଅଫିସରଙ୍କ ଆଗରେ ନାମାଙ୍କନ ଦାଖଲ କରିବା ପରେ ଅଶୋକ ସିଂ କହିଛନ୍ତି ଯେ ଏହି ଆସନରୁ ପ୍ରତିଦ୍ୱନ୍ଦ୍ୱିତା କରୁଥିବା ପ୍ରାର୍ଥୀଙ୍କ ବିରୋଧରେ ମାମଲା କୋର୍ଟରେ ରହିଛି। ଯେହେତୁ ମୁଁ ଏହି ଜିଲ୍ଲାର ବାସିନ୍ଦା ଏବଂ ବହୁ ବର୍ଷ ଧରି ଲୋକଙ୍କ ପାଇଁ ସେବା କାର୍ଯ୍ୟ କରିଆସୁଛି । ଏଭଳି ପରିସ୍ଥିତିରେ ଯଦି ମୁଁ ନିର୍ବାଚନରେ ଜିତେ, ତେବେ ମୁଁ ମୋ ଦଳର ମନିଫେଷ୍ଟୋ ଅନୁଯାୟୀ କାର୍ଯ୍ୟ କରିବି।
ଅଶୋକ ସିଂ କହିଛନ୍ତି ଯେ ବିଶେଷ କରି କୃଷକମାନଙ୍କ ପାଇଁ ମୋର ଦଳର ସମର୍ଥନ ରହିଛି। କୃଷକମାନଙ୍କର ଦାବି ମୋ ଦଳ ପୂରଣ କରିବ। ମୁଦ୍ରାସ୍ଫୀତି ଚରମ ସୀମାରେ ଥିବାବେଳେ ବିଏସପି, କଂଗ୍ରେସ ଏବଂ ବିଜେପି ସର୍ବଦା ନିଜ ଭୋଟରଙ୍କୁ ଭ୍ରମିତ କରି ନିଜ ଫାଇଦା ପାଇଁ କାର୍ଯ୍ୟ କରିଥିଲେ ବୋଲି ସେ କହିଛନ୍ତି।
ଅଶୋକ ସିଂ ଜୈନପୁର ଜିଲ୍ଲାର ମାଡିୟାହୁଁ ତହସିଲର ଚର୍ତୁଭୂଜପୁର ଗାଁର ବାସିନ୍ଦା। ସେ ମୁମ୍ବାଇରେ ବ୍ୟବସାୟ କରନ୍ତି। ସେ ଦୀର୍ଘ ବର୍ଷ ଧରି ବିଏସପି ସହିତ ଜଡିତ ରହିଥିଲେ। ୨୦୧୪ରେ ମୁମ୍ବାଇ ପଶ୍ଚିମ ଲୋକସଭାରୁ ବିଏସପି ଟିକେଟରେ ପ୍ରତିଦ୍ୱନ୍ଦ୍ୱିତା କରିଥିଲେ। ୨୦୧୭ ମସିହାରେ ସେ ପ୍ରତାପଗଡ ଜିଲ୍ଲାର ରାମପୁର ଖାସ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ ମଧ୍ୟ ଜିତିପାରି ନ ଥିଲେ। ୨୦୧୯ ମସିହାରେ ସେ ଜଣେ ସ୍ୱାଧୀନ ପ୍ରାର୍ଥୀ ଭାବରେ ଜୈନପୁର ଲୋକସଭା ଆସନରେ ପ୍ରତିଦ୍ୱନ୍ଦ୍ୱିତା କରିଥିଲେ। ସେ ନିଜ ଦଳ ସମାଜ ବିକାଶ କ୍ରାନ୍ତି ପାର୍ଟିର ଟିକେଟରେ ୨୦୨୪ ରେ ନିର୍ବାଚନ ଲଢୁଛନ୍ତି। ତାଙ୍କ ଦଳର ନିର୍ବାଚନୀ ଚିହ୍ନ ହେଉଛି ଆଖୁ ଚାଷୀ। ସେ ୨୦୨୨ ମସିହାରେ ବିହାର ନେତା ମୁକେଶ ସାହନିଙ୍କ ପାର୍ଟି ଭିଆଇପିରୁ ମାଡିୟାହୁଁ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ।