ଅହମ୍ମଦାବାଦ: ପରିବହନ କାର୍ଯ୍ୟାଳୟରୁ ନିଜର କାରକୁ ମୁକୁଳାଇବା ପାଇଁ କାର ମାଲିକ ଦେଲେ ୨୭ ଲକ୍ଷ ୬୮ ହଜାର ଟଙ୍କାର ଜରିମାନା | ଏହା ପରେ ହିଁ ନିଜର ଦାମୀ କାରକୁ ଫେରିପାଇଛନ୍ତି ମାଲିକ | ନଭେମ୍ବର ମାସରେ କାରର ନମ୍ବର ପ୍ଲେଟ ନ ଥିବା ସହ ବୈଧ କାଗଜପତ୍ର ନଥିବାରୁ ଟ୍ରାଫିକ ପୁଲିସ ରାସ୍ତା ଉପରୁ ଏହି କାରକୁ ଉଠାଇନେଇଥିଲେ | ଏହା ପରେ ଅହମ୍ମଦାବାଦ ଟ୍ରାଫିକ ପୁଲିସ କାର୍ଯ୍ୟାଳୟରେ ଏହି କାରକୁ ରଖାଯାଇଥିଲା | ଶେଷରେ ଆଜି ପରିବହନ କାର୍ଯ୍ୟାଳୟରେ ପାଖାପାଖି ୨୮ ଲକ୍ଷ ଟଙ୍କା ଦେଇ କାର ମାଲିକ ରଂଜିତ ଦେଶାଇ ଏହି କାରକୁ ମୁକୁଳାଇଛନ୍ତି | ବଳକା ଥିବା ପରିବହନ ଟିକସ ଓ ଜରିମାନା ଅର୍ଥ ମିଶାଇ ଏତେ ପରିମାଣର ଟଙ୍କା ଦେବାକୁ ପଡିଛି ତାଙ୍କୁ।
Sambad is now on WhatsApp
Join and get latest news updates delivered to you via WhatsApp
ଏଠାରେ ସୂଚନା ଥାଉ କି ନଭେମ୍ବର ୩୦ ତାରିଖରେ ନିୟମ ଉଲ୍ଲଂଘନ କରିଥିବାରୁ କାର ମାଲିକଙ୍କ ନାମରେ ୯ ଲକ୍ଷ ୮୦ ହଜାର ଟଙ୍କାର ଚାଲାଣ କଟାଯାଇଥିଲା । ସେତେବେଳେ ଟ୍ରାଫିକ ପୁଲିସ ଅଧିକାରୀ କାରକୁ ଜବତ କରିଥିଲେ ଓ ମୋଟର ବାହନ ଅଧିନିୟମ ଅନୁଯାୟୀ ଆରଟିଓ ମେମୋ ଜାରି କରାଯାଇଥିଲା | ଅର୍ଥାତ ଆରଟିଓଙ୍କ ପାଖକୁ ଆସି କାର ମାଲିକଙ୍କୁ ଜରିମାନା ଦେବାକୁ ହେବ ଓ ଗାଡି ମୁକୁଳାଇବାକୁ ହେବ। ଏଥିସହ ପୁଲିସ ପାଖକୁ ଯାଇ ଜରିମାନାର ରସିଦ ଦେବାକୁ ହେବ |
ଏଠାରେ ସୂଚନା ଥାଉ କି କାର ମାଲିକ ଜଣକ କାର ଚଳାଇଲା ବେଳେ ସିଟ ବେଲ୍ଟ ବାନ୍ଧି ନ ଥିଲେ କି ତାଙ୍କ ପାଖରେ ଡ୍ରାଇଭିଂ ଲାଇସେନ୍ସ ଓ ଗାଡିର କାଗଜପତ୍ର ନ ଥିଲା । ଯେଉଁ ଗାଡିର ଚାଲାଣ କଟିଥିଲା, ତାହା ହେଉଛି ପୋରସ୍କେ କମ୍ପାନୀର ସବୁଠାରୁ ଦାମୀ ଗାଡି । ବଜାରରେ ଏହି ଗାଡିର ଦାମ୍ ପାଖାପାଖି ସାଢେ ଦୁଇ କୋଟି ଟଙ୍କା ହେବ । ଅହମଦାବାଦ ପୁଲିସ ପକ୍ଷରୁ ଆରଟିଓର ଏହି ଚାଲାଣ ଓ ରସିଦକୁ ଟ୍ୱିଟ କରାଯାଇଛି | ଅହମଦାବାଦ ପୁଲିସ ପକ୍ଷରୁ କୁହାଯାଇଛି ଯେ ୨୭ ଲକ୍ଷ ଜରିମାନା ଭାରତର ସବୁଠାରୁ ଅଧିକ ଜରିମାନା |