ନୂଆଦିଲ୍ଲୀ : ଜାତୀୟ ଶିଶୁ ସୁରକ୍ଷା ଅଧିକାର ଆୟୋଗରେ ଗତ ୫ ବର୍ଷରେ ପଞ୍ଜୀକୃତ ଓଡ଼ିଶାର ସମୁଦାୟ ୪ ହଜାର ୨୭୬ ମାମଲା ମଧ୍ୟରୁ କେବଳ ଏକ ହଜାର ୪୦ଟି ମାମଲାର ଫୈସଲା ହୋଇଛି। ଆଜି ରାଜ୍ୟସଭାରେ ବିଜେଡି ସାଂସଦ ପ୍ରସନ୍ନ ଆଚାର୍ଯ୍ୟଙ୍କ ଅଣତାରକା ପ୍ରଶ୍ନର ଉତ୍ତରରେ ଏହି ସୂଚନା ଦେଇଛନ୍ତି କେନ୍ଦ୍ର ମହିଳା ଓ ଶିଶୁ କଲ୍ୟାଣ ମନ୍ତ୍ରୀ ସ୍ମୃତି ଇରାନୀ।
Sambad is now on WhatsApp
Join and get latest news updates delivered to you via WhatsApp
ଜାତୀୟ ଶିଶୁ ସୁରକ୍ଷା ଅଧିକାର ଆୟୋଗ ଦ୍ବାରା ପ୍ରଦତ୍ତ ସୂଚନା ଅନୁସାରେ ଓଡ଼ିଶାରେ ୨୦୧୬-୧୭ରେ ପଞ୍ଜୀକୃତ ୬୧ଟି ମାମଲାରୁ ୫୫ଟି ମାମଲାର ଫୈସଲା ହୋଇଛି । ସେହିଭଳି ୨୦୧୭-୧୮ରେ ପଞ୍ଜୀକୃତ ୭୫ଟି ମାମଲା ମଧ୍ୟରୁ ୫୨ଟି ମାମଲାର ଫୈସଲା ହୋଇଥିଲା। ୨୦୧୮-୧୯ରେ ୧୨୫ଟି ମାମଲା ପଞ୍ଜୀକୃତ ହୋଇଥିବା ବେଳେ ସେଥିରୁ ୮୫ଟି ମାମଲା ଫୈସଲା ହୋଇଛି। ୨୦୧୯-୨୦ରେ ସର୍ବାଧିକ ୩ ହଜାର ୮୯୯ ମାମଲା ପଞ୍ଜୀକୃତ ହୋଇଥିବା ବେଳେ ସେଥିରୁ କେବଳ ୬୫ଟି ମାମଲାର ଫୈସଲା ହୋଇଛି।
ଅପରପକ୍ଷେ ୨୦୨୦-୨୧ରେ ପଞ୍ଜୀକୃତ ମାମଲା ସଂଖ୍ୟା ୧୬୬ ଥିବା ବେଳେ ଫୈସଲା ହୋଇଛି ୭୮୩। ୩୭ଟି ରାଜ୍ୟ ଓ କେନ୍ଦ୍ର ଶାସିତ ଅଂଚଳରେ ଗତ ୫ ବର୍ଷରେ ସମୁଦାୟ ୫ ହଜାର ୮୫ଟି ପଞ୍ଜୀକୃତ ମାମଲାରୁ ୨ ହଜାର ୮୩ଟି ଫୈସଲା ହୋଇଥିବା କେନ୍ଦ୍ର ମନ୍ତ୍ରୀଙ୍କ ଉତ୍ତରରେ କୁହାଯାଇଛି। କେବଳ ଜମ୍ମୁ-କାଶ୍ମୀର ଓ ଲଦାଖ କେନ୍ଦ୍ର ଶାସିତ ଅଂଚଳକୁ ବାଦ ଦେଲେ ଦେଶର ସବୁ ରାଜ୍ୟ ଓ କେନ୍ଦ୍ର ଶାସିତ ଅଂଚଳରେ ରାଜ୍ୟ ଶିଶୁ ସୁରକ୍ଷା ଅଧିକାର ଆୟୋଗ ସ୍ଥାପନ ହୋଇଥିବା ଉତ୍ତରରେ ସୂଚନା ଦିଆଯାଇଛି।