ଭୋପାଳ: ଦେଶ ସ୍ବାଧୀନ ହେବାର ୭ ଦଶନ୍ଧି ବିତିଯାଇଥିଲେ ବି କେତେକ ସମାଜରେ ଅତି କଠୋର ଜାତିଭେଦ ବଜାୟ ରହିଛି । ଏହାର ଏକ ଦୁଃଖଦ ଚିତ୍ର ଦେଖିବାକୁ ମିଳିଛି ମଧ୍ୟପ୍ରଦେଶରେ । ରାଜ୍ୟର ଛତରପୁରରେ ଜଣେ ଦଳିତ ବର ଘୋଡ଼ୀ ଚଢ଼ି ଯାଉଥିବା ବେଳେ ଉଚ୍ଚ ଜାତିର ଲୋକମାନେ ତାଙ୍କ ବିବାହ ଶୋଭାଯାତ୍ରା ଉପରେ ପଥର ଫିଙ୍ଗିଥିଲେ ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ, ସୋମବାର ସନ୍ଧ୍ୟାରେ ଛତ୍ରପୁର ବକ୍ସୱାହା ଥାନା ଅନ୍ତର୍ଗତ ଚୌରାଇ ଗାଁରେ ଏହି ଅଭାବନୀୟ ଘଟଣା ଘଟିଛି । ଚୌରାଇ ଗାଁରୁ ରିତେଶ ଅହିରୱାରଙ୍କ ବିବାହ ଶୋଭାଯାତ୍ରା ସାଗର ଜିଲ୍ଲାର ଶାହଗଡ଼ ଅଭିମୁଖେ ଯାଉଥିଲା। ଏହା ପୂର୍ବରୁ ଶୋଭାଯାତ୍ରା ଗାଁରେ କିଛି ସମୟ ବୁଲିଥିଲା । କିନ୍ତୁ ଦଳିତ ବରକୁ ଘୋଡ଼ୀ ଉପରେ ଦେଖିବା ପରେ ଗ୍ରାମର ଉଚ୍ଚଜାତିର ଲୋକମାନେ ରାଗି ଯାଇଥିଲେ ଓ ଏହାକୁ ନେଇ ପ୍ରଥମେ ଯୁକ୍ତିତର୍କ ଓ ପରେ ଏକ ବଡ଼ ବିବାଦ ସୃଷ୍ଟି ହୋଇଥିଲା । ଏହାପରେ ଶୋଭାଯାତ୍ରା ଉପରକୁ ସେମାନେ ପଥର ଫିଙ୍ଗିଥିଲେ। ବିବାହ ଶୋଭାଯାତ୍ରାରେ ପ୍ରାୟ ୪୦ରୁ ୫୦ ଜଣ ବରଯାତ୍ରୀ ସାମିଲ ହୋଇଥିଲେ। ଏହି ପଥର ମାଡ଼ରେ ୩ ଜଣ ପୁଲିସ କର୍ମଚାରୀ ଆହତ ହୋଇଛନ୍ତି। ଏହି ଘଟଣାରେ ପୁଲିସ ୫୦ ଜଣଙ୍କ ବିରୋଧରେ ମାମଲା ରୁଜୁ କରିଥିବା ବେଳେ ଏଥିରେ ୨୦ ଜଣଙ୍କୁ ମୁଖ୍ୟ ଅଭିଯୁକ୍ତ ଭାବେ ଦର୍ଶାଯାଇଛି ।