୩ବର୍ଷରେ ପାଖାପାଖି ୧୦୦ ଘରେ ନିଆଁ ଲଗାଇଲେଣି ବିଲେଇ
ସିଓଲ: ଗତ ୩ ବର୍ଷ ମଧ୍ୟରେ ଦକ୍ଷିଣ କୋରିଆରେ ରହସ୍ୟମୟ ଭାବରେ ପାଖାପାଖି ୧୦୦ ଘରେ ଅଗ୍ନିକାଣ୍ଡ ଘଟିଛି | ଯେତେବେଳେ ପୁଲିସ ଏହି ସବୁ ମାମଲା ବାବଦରେ ଗଭୀର ଅନୁସନ୍ଧାନ କରିଥିଲା, ଅଗ୍ନିକାଣ୍ଡର କାରଣ ଜାଣି ସେମାନେ ଆଶ୍ଚର୍ଯ୍ୟ ହୋଇଗଲେ | ପୁଲିସର ସୂଚନାନୁସାରେ, ଘରେ ନିଆଁ ଲଗାଇବା ପାଇଁ ବିଲେଇ ଛଡା ଆଉ କେହି ଦାୟୀ ନୁହଁନ୍ତି। ପୁଲିସ କହିଛି ଯେ ଯେଉଁ ଘରେ ନିଆଁ ଲାଗିଥିଲା, ସେହି ଘରେ ବିଲେଇମାନେ ରହୁଥିଲେ ବା ନିୟମିତ ଭାବେ ଆସୁଥିଲେ। ଅନୁସନ୍ଧାନରୁ ଜଣାପଡିଛି ଯେ ବିଲେଇମାନେ ଘରେ ଜଳୁଥିବା ମହମବତୀକୁ ଫୋପାଡି ଥିବାରୁ ନିଆଁ ଲାଗିଥିଲା |
ଏହା ସହ ବିଲେଇମାନେ ଖେଳୁ ଖେଳୁ ରୋଷେଇ ଘରେ ଥିବା ଗ୍ୟାସ ଷ୍ଟୋଭ ନିକଟରେ କିଛି କାଗଜ କିମ୍ବା କପଡା ପକାଇଥିଲେ, ଯାହା ଫଳରେ ଘରେ ନିଆଁ ଲାଗିଯାଇଥିଲା | ବୈଦ୍ୟୁତିକ ତାରକୁ କାମୁଡି ଛିଡ଼ାଇବା ଦ୍ୱାରା କେତେକ ଘରେ ସର୍ଟସର୍କିଟ ଯୋଗୁଁ ନିଆଁ ଲାଗିଯାଇଥିଲା | ସୂଚନା ମୁତାବକ ଜାନୁୟାରୀ ୨୦୧୯ରୁ ନଭେମ୍ବର ୨୦୨୧ ମଧ୍ୟରେ ଦେଶରେ ୧୦୭ଟି ରହସ୍ୟମୟ ଅଗ୍ନିକାଣ୍ଡ ଘଟିଥିବା ସିଓଲ୍ ଅଗ୍ନିଶମ ବିଭାଗ ଗୁରୁବାର ଦିନ ଘୋଷଣା କରିଛି।
ବିଲେଇମାନଙ୍କ ଯୋଗୁଁ ଏହି ସମସ୍ତ ଘଟଣା ଘଟିଥିଲା | ବିଭାଗ ଅନୁଯାୟୀ, ଏହି ୧୦୭ ଘଟଣାରୁ ଅଧାରୁ ଅଧିକ ଘଟଣା ସେତେବେଳେ ଘଟିଥିଲା ଯେତେବେଳେ ଘର ମାଲିକ ଘରେ ନଥିଲେ । ବିଲେଇଙ୍କ ଯୋଗୁଁ ହୋଇଥିବା ଏହି ଅଗ୍ନିକାଣ୍ଡରେ ୪ ଜଣ ଆହତ ମଧ୍ୟ ହୋଇଥିଲେ। ଏହି ଘଟଣାକୁ ନେଇ ଦକ୍ଷିଣ କୋରିଆ ସରକାର ଲୋକଙ୍କୁ ପରାମର୍ଶ ଦେଇଛନ୍ତି ଯେ ଯେତେବେଳେ ଆପଣ ଘର ବାହାରକୁ ଯାଆନ୍ତି, ସେତେବେଳେ ଗ୍ୟାସ୍ ଚୁଲାକୁ ବନ୍ଦ ରଖନ୍ତୁ ବା ଢାଙ୍କିଦିଅନ୍ତୁ |
