ପୁଣି ଜେଲ ଯିବେ କି ଲାଲୁ ?
ନୂଆଦିଲ୍ଲୀ : ପୁଣି ଫସିଗଲେ ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବ । ରେଳବାଇ ଚାକିରି ଦୁର୍ନୀତିରେ ଆରଜେଡି ମୁଖ୍ୟ ତଥା ପୂର୍ବତନ ରେଳମନ୍ତ୍ରୀ ଲାଲୁ ପ୍ରସାଦଙ୍କ ବିରୋଧରେ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଚାର୍ଜସିଟ୍ ଦାଖଲ କରିଛି ।
Sambad is now on WhatsApp
Join and get latest news updates delivered to you via WhatsApp
ସ୍ୱତନ୍ତ୍ର ସିବିଆଇ କୋର୍ଟରେ ଦାଖଲ କରିଥିବା ଚାର୍ଜସିଟରେ ସିବିଆଇ ପ୍ରସାଦଙ୍କ ପତ୍ନୀ ରାବ୍ରି ଦେବୀ, ମିସା ଭାରତୀ ଏବଂ ଅନ୍ୟ ୧୩ ଜଣଙ୍କୁ ନିକଟରେ ଏକ ଅଭିଯୁକ୍ତ ଭାବେ ଦର୍ଶାଇଛି ।
ଏହି ମାମଲାରେ ଗତ ମାସରେ ସିବିଆଇ ପକ୍ଷରୁ ବିଭିନ୍ନ ସ୍ଥାନରେ ଚଢଉ କରାଯାଇଥିଲା । ବିଶେଷକରି ଆରଜେଡି ନେତାମାନଙ୍କ ଘରେ ଓ ଅଫିସରେ ଚଢଉ କରାଯାଇଥିଲା ।
ଆରଜେଡିର ବହୁ ବରିଷ୍ଠ ନେତାଙ୍କ ସମେତ ଏମଏଲସି ସୁନୀଲ ସିଂ, ରାଜ୍ୟସଭା ସାଂସଦ ଆଶଫାକ କରିମ ଏବଂ ଫାୟାଜ ଅହମ୍ମଦ ଏବଂ ପୂର୍ବତନ ଏମଏଲସି ସୁବୋଧ ରାୟଙ୍କ ଘରେ ଓ ଅଫିସରେ ଚଢଉ କରାଯାଇଥିଲା ।
୨୦୦୪ରୁ ୨୦୦୯ ପର୍ଯ୍ୟନ୍ତ କ୍ଷମତାରେ ଥିବା ୟୁପିଏ-୧ ସରକାରରେ ଲାଲୁ ରେଳମନ୍ତ୍ରୀ ଥିଲେ । ଏହି ସମୟରେ ରେଳବାଇରେ ଚାକିରି ପାଇଁ ଏକ ବଡ଼ ଧରଣର ଦୁର୍ନୀତି ହୋଇଥିଲା । ପ୍ରାର୍ଥୀମାନଙ୍କଠାରୁ ଜମି ବଦଳରେ ଚାକିରି ଦିଆଯାଉଥିଲା । ଲାଲୁଙ୍କ ପରିବାର, କେତେକ ଆରଜେଡି ନେତା ଏହି ଦୁର୍ନୀତିରେ ସଂପୃକ୍ତ ବୋଲି ଅଭିଯୋଗ ଉଠିବା ପରେ ମାମଲା ସିବିଆଇ ନିକଟକୁ ଯାଇଥିଲା । କିନ୍ତୁ ଆରଜେଡି ଏହାକୁ ଅସ୍ବୀକାର କରୁଛି ।