ନୂଆଦିଲ୍ଲୀ : କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଏବେ ଏକ ଅଜବ ମାମଲାର ତଦନ୍ତ କରୁଛି । ରାଜସ୍ଥାନର କରୌଲିରେ ଥିବା ଏକ ଷ୍ଟେଟ ବ୍ୟାଙ୍କ ଶାଖାରୁ ପ୍ରାୟ ୧୧ କୋଟି ଟଙ୍କାର ଖୁଚୁରା ପଇସା (କଏନ) ଗାଏବ ହୋଇଯାଇଛି । ଏସବୁ କଏନ କୁଆଡେ ଗଲା ତାହା ସିବିଆଇ ଖୋଜୁଛି । ଏହି ମାମଲାରେ ସିବିଆଇ ଆଜି ଦିଲ୍ଲୀ ଓ ରାଜସ୍ଥାନର ୨୫ଟି ସ୍ଥାନରେ ଚଢଉ କରି ଖାନତଲାସି କରିଛି । ୧୫ ଜଣ ପୂର୍ବତନ ବ୍ୟାଙ୍କ କର୍ମଚାରୀଙ୍କ ଘରେ ଏସବୁ ଚଢଉ କରାଯାଇଛି । ରାଜସ୍ଥାନ ହାଇକୋର୍ଟଙ୍କ ନିର୍ଦ୍ଦେଶ କ୍ରମେ ଗତ ଏପ୍ରିଲ ୧୩ରେ ସିବିଆଇ ଏକ ମାମଲା ରୁଜ୍ଜୁ କରି ତଦନ୍ତ ଚଳାଇଛି ।
Sambad is now on WhatsApp
Join and get latest news updates delivered to you via WhatsApp
ମାମଲାଟି ଏହିପରି…
ଗତ ୨୦୨୧ ଅଗଷ୍ଟ ମାସରେ ଷ୍ଟେଟ ବ୍ୟାଙ୍କ କରୌଲି ଶାଖା ତରଫରୁ ନିଜ ପାଖରେ ମହଜୁଦ ଥିବା କଏନ ଗୁଡ଼ିକର ଗଣତି କଲା ବେଳେ କିଛି କଏନ ଗାଏବ ଥିବା ଜଣାପଡ଼ିଥିଲା । ପରେ ଏକ ଏକ ଘରୋଇ ସଂସ୍ଥାକୁ ଗଣତି ଦାୟିତ୍ବ ଦେଇ ଗଣତି କରିବାରେ ଜଣାଗଲା ଯେ ପ୍ରାୟ ୧୧ କୋଟି ଟଙ୍କା ମୂଲ୍ୟର କଏନ ଗାଏବ ହୋଇଯାଇଛି । ଶାଖାରେ ଥିବା ୨ କୋଟି ଟଙ୍କା ମୂଲ୍ୟର ମୋଟ ୩ ହଜାରଟି କଏନ ବସ୍ତା ରିଜର୍ଭ ବ୍ୟାଙ୍କକୁ ହସ୍ତାନ୍ତର କରାଯାଇଥିଲା । ପରେ ମାମଲା କୋର୍ଟରେ ପହଞ୍ଚିଥିଲା ଓ କୋର୍ଟଙ୍କ ନିର୍ଦ୍ଦେଶକ୍ରମେ ତଦନ୍ତ ସିବିଆଇ ପାଖକୁ ଆସିଥିଲା ।