ଦୁଇ ମାସ ହେଲା ଖାଲି ରହିଛି ସିଡିଏସ ପଦ, ମିଲିଟାରୀ ଥିଏଟର କମାଣ୍ଡ ଗଠନ ପ୍ରଭାବିତ

ନୂଆଦିଲ୍ଲୀ : ହେଲିକପ୍ଟର ଦୁର୍ଘଟଣାରେ ଦେଶର ପ୍ରଥମ ସିଡିଏସ ଜେନେରାଲ ବିପିନ ରାଓ୍ବତଙ୍କ ମୃତ୍ୟୁ ହେବାର ଇତି ମଧ୍ୟରେ ୨ ମାସରୁ ଅଧିକ ସମୟ ବିତିଯାଇଥିଲେ ବି କେନ୍ଦ୍ର ସରକାର ନୂଆ ସିଡିଏସ ବା ଚିଫ ଅଫ୍ ଡିଫେନ୍ସ ଷ୍ଟାଫ ନିଯୁକ୍ତ କରିପାରିନାହାନ୍ତି । ସିଡିଏସ୍ ପଦ ଖାଲି ଥିବାରୁ ତିନି ବାହିନୀର ଆଧୁନିକୀକରଣ ଓ ସମନ୍ବୟ କାର୍ଯ୍ୟ ଗୁରୁତରଭାବେ ବାଧାପ୍ରାପ୍ତ ହେବା ସହ ପଛେଇ ଯାଇଛି ।

ଜେନେରାଲ ବିପିନ ରାଓ୍ବତ ତିନି ସେନାର ଥିଏଟର କମାଣ୍ଡ ଗଠନ ଉପରେ କାର୍ଯ୍ୟକରୁଥିଲେ । ଏବେ ଭାରତୀୟ ସେନା, ବାୟୁସେନା ଓ ନୌସେନାର ମୋଟ ୧୭ଟି କମାଣ୍ଡ ରହିଛି । ଭାରତ ସରକାରଙ୍କ ଯୋଜନା ଅନୁସାରେ ଏଗୁଡ଼ିକୁ ମିଶାଇ ମୋଟ ୪ଟି ଇଣ୍ଟିଗ୍ରେଟେଡ ଥିଏଟର କମାଣ୍ଡ ଗଠନ କରାଯିବ । ଏହା ମଧ୍ୟରେ ଗୋଟିଏ ହେଉଛି ମାରିଟାଇମ ଥିଏଟର କମାଣ୍ଡ, ଗୋଟିଏ ଏୟାର ଡିଫେନସ କମାଣ୍ଡ ଓ ୨ଟି ସ୍ଥଳଭାଗ ଭିତ୍ତିକ ପୂର୍ବାଞ୍ଚଳ ଓ ପଶ୍ଚିମାଞ୍ଚଳ ଥିଏଟର କମାଣ୍ଡ । ଗତ ସପ୍ତାହରେ ଲକ୍ଷ୍ନୌଠାରେ ତିନି ସେନାପକ୍ଷରୁ ଏକ ମିଳିତ ବୈଠକ ଅନୁଷ୍ଠିତ ହୋଇ ଏ ସମ୍ପର୍କରେ ଆଲୋଚନା ହୋଇଥିଲା ।

ଗତ ଡିସେମ୍ବର ୮ରେ ତାମିଲନାଡୁର କୁନ୍ନୁରରେ ଦୁର୍ଘଟଣାଗ୍ରସ୍ତ ଏମଆଇ-୧୭ ହେଲିକପ୍ଟରରେ ସିଡିଏସ ବିପିନ ରାଓ୍ବତଙ୍କ ସମେତ ମୋଟ ୧୪ ଜଣ ଥିଲେ । ସେମାନଙ୍କ ମଧ୍ୟରୁ ୧୩ ଜଣ ସେହିଦିନ ପ୍ରାଣ ହରାଇଥିବାବେଳେ କେବଳ ଗ୍ରୁପ କ୍ୟାପଟେନ ବରୁଣ ସିଂ କିଛି ଦିନ ମୃତ୍ୟୁ ସହ ଲଢେଇ କରିବା ପରେ ଡିସେମ୍ବର ୧୫ରେ ମୃତ୍ୟୁବରଣ କରିଥିଲେ । ଏହି ଦୁର୍ଘଟଣା ପରେ ସିଡିଏସ ପଦଟି ହଠାତ ଖାଲି ହୋଇଯାଇଥିଲା ।

 

ସମ୍ବନ୍ଧିତ ଖବର