ନୂଆଦିଲ୍ଲୀ: ଜମ୍ମୁ କାଶ୍ମୀର ପୁଞ୍ଚ୍ ଜିଲ୍ଲାର ମେନ୍ଧର ସେକ୍ଟରରେ ପାକିସ୍ତାନ ସେନା ଅସ୍ତ୍ରବିରତି ଉଲ୍ଲଂଘନ କରିବା ସହ ପ୍ରବଳ ଗୁଳିଗୋଳା ମାଡ଼ କରୁଥିବା ନେଇ ଖବର ପ୍ରସାରିତ ହୋଇଥିବା ବେଳେ ଭାରତୀୟ ସେନା ଏହାକୁ ଖଣ୍ଡନ କରିଛି। ଭାରତୀୟ ସେନା ପକ୍ଷରୁ ଏକ ବିବୃତି ଜାରି କରି କୁହାଯାଇଛି ଯେ ଉଭୟ ରାଷ୍ଟ୍ରର ସେନା ମଧ୍ୟରେ ହୋଇଥିବା ବୁଝାମଣା ଅନୁଯାୟୀ ଏଲ୍ଓସି ନିକଟରେ ଅସ୍ତ୍ରବିରତି ବଜାୟ ରହିଛି। ଏଲ୍ଓସି ନିକଟରେ ପାକ୍ ସେନା ଦ୍ବାରା ପ୍ରବଳ ଗୁଳିଗୋଳା ମାଡ଼ ହୋଇଥିବା ରିପୋର୍ଟକୁ ଭାରତୀୟ ସେନା ଖଣ୍ଡନ କରିଛନ୍ତି।
ଗୁଳିଗୋଳା ବର୍ଷା ରିପୋର୍ଟକୁ ଖଣ୍ଡନ
ସେନା ଦ୍ବାରା ଜାରି ହୋଇଥିବା ବିବୃତିରେ ସ୍ପଷ୍ଟ କରାଯାଇଛି ଯେ ନିୟନ୍ତ୍ରଣ ରେଖା ନିକଟରେ ସୀମାପାର ଗୁଳିଚାଳନା ଏବଂ ଆଇଇଡି ବିସ୍ଫୋରଣ ସହ ମୁକାବିଲା କରାଯାଉଛି। କିନ୍ତୁ ପାକ୍ ସେନା ଦ୍ବାରା ପ୍ରବଳ ଗୁଳିଗୋଳା ମାଡ଼ ହୋଇନାହିଁ। ଏଲ୍ଓସି ନିକଟରେ ସାମାନ୍ୟ ଘଟଣା ଘଟିବା ଅପ୍ରତ୍ୟାଶିତ ନୁହେଁ। ଏଲ୍ଓସି ନିକଟରେ ସ୍ଥିତି ସ୍ଥିର ରହିଛି ଏବଂ ସ୍ଥିତିକୁ ଭଲଭାବେ ଯାଞ୍ଚ କରାଯାଉଛି ବୋଲି ଭାରତୀୟ ସେନା ସ୍ପଷ୍ଟ କରିଛି। ୨୦୨୧ ଫେବ୍ରୁଆରି ୨୫ ତାରିଖରେ ଭାରତ ଏବଂ ପାକିସ୍ତାନ ଅସ୍ତ୍ରବିରତି ଚୁକ୍ତିକୁ ନବୀକରଣ କରିବା ପରଠାରୁ ଏଲ୍ଓସି ନିକଟରେ ଖୁବ୍ କମ୍ ସମୟରେ ଅସ୍ତ୍ରବିରତି ଉଲ୍ଲଂଘନ ହୋଇଛି।