କେଜ୍ରିୱାଲଙ୍କ ସ୍ୱପ୍ନର ଯୋଜନା ‘ଘରେ ଘରେ ରାସନ’ରେ ରୋକ ଲଗାଇଲେ କେନ୍ଦ୍ର ସରକାର, ଚିହିଁକି ଉଠିଲା ଆପ

ନୂଆଦିଲ୍ଲୀ: କେଜ୍ରିୱାଲ ସରକାରଙ୍କ ‘ଘରେ-ଘରେ ରାସନ’ ଯୋଜନା ଉପରେ କେନ୍ଦ୍ର ସରକାର ରୋକ ଲଗାଇଛନ୍ତି । ଏହି ଯୋଜନା ପ୍ରସ୍ତୁତ କରିବା ପୂର୍ବରୁ ଏହାର ଅନୁମୋଦନ ନିଆଯାଇ ନାହିଁ ବୋଲି କେନ୍ଦ୍ର କହିଛି। ସେଥିପାଇଁ ଏହାକୁ ବନ୍ଦ କରିଦିଆଯାଇଛି | ସୂଚନା ଥାଉ କି ଯେ କେଜ୍ରିୱାଲ ସରକାର ଦିଲ୍ଲୀର ୭୨ ଲକ୍ଷ ଲୋକଙ୍କ ଘରେ ରାସନ ବିତରଣ କରିବାକୁ ଯୋଜନା କରିଥିଲେ। ଏକ ସପ୍ତାହ ପରେ ଏହି ଯୋଜନା କାର୍ଯ୍ୟକାରୀ ହୋଇଥାନ୍ତା | ଏଥିପାଇଁ ଦିଲ୍ଲୀ ସରକାର ସମସ୍ତ ପ୍ରସ୍ତୁତି ଶେଷ କରିସାରିଛନ୍ତି।

ଏହାପୂର୍ବରୁ ମଧ୍ୟ ଏହି ଯୋଜନା ବନ୍ଦ କରିବାକୁ କେନ୍ଦ୍ର ସରକାର ନିର୍ଦ୍ଦେଶ ଦେଇଥିଲେ । ତେବେ ବର୍ତ୍ତମାନ କେନ୍ଦ୍ର ଏହି ଯୋଜନାକୁ ସମ୍ପୂର୍ଣ୍ଣ ଭାବେ ବନ୍ଦ କରିଥିବାରୁ ଏହାକୁ ନେଇ ଆମ୍ ଆଦମୀ ପାର୍ଟି ଚିହିଁକି ଉଠିଛି । ଆମ୍ ଆଦମୀ ପାର୍ଟି ପକ୍ଷରୁ ଟ୍ୱିଟ୍ କରି କୁହାଯାଇଛି ଯେ ‘ପ୍ରଧାନମନ୍ତ୍ରୀ, ‘ରାସନ୍ ମାଫିଆ’ଙ୍କ ସହିତ ଆପଣଙ୍କର ସମ୍ପର୍କ କ’ଣ? କେଜ୍ରିୱାଲ ସରକାରଙ୍କ ‘ଘରେ ଘରେ ରାସନ ସ୍କିମ’କୁ ଆପଣ କାହିଁକି ଅଟକାଇଛନ୍ତି’?

ସୂଚନା ଥାଉ କି ଯେ ଦିଲ୍ଲୀର ଲୋକଙ୍କୁ ରାସନ ମାଫିଆଙ୍କ କବଳରୁ ରକ୍ଷା କରିବା ଏବଂ ଘରେ ସମସ୍ତ ସାମଗ୍ରୀ ବିତରଣ କରିବା ପାଇଁ କେଜ୍ରିୱାଲ ସରକାର ଏହି ଯୋଜନା ପ୍ରସ୍ତୁତ କରିଛନ୍ତି। ଏହାପୂର୍ବରୁ ଏହି ଯୋଜନାକୁ ‘ମୁଖ୍ୟମନ୍ତ୍ରୀ ଘରେ ଘରେ-ରାସନ ଯୋଜନା’ ରଖାଯାଇଥିଲା, କିନ୍ତୁ କେନ୍ଦ୍ର ସରକାର ଏହାକୁ ବିରୋଧ କରିଥିଲେ। ସିଏମ କେଜ୍ରିୱାଲଙ୍କ କହିବାନୁସାରେ, କେନ୍ଦ୍ର ଏହି ଯୋଜନାର ନାମକୁ ବିରୋଧ କରି କହିଛି ଯେ ଏହାର ନାମ ‘ମୁଖ୍ୟମନ୍ତ୍ରୀ ଘରେ ଘରେ-ରାସନ ଯୋଜନା’ ନ ରଖାଯିବା ଆବଶ୍ୟକ |