ଟିକାକରଣ ଅଭିଯାନ ବିସ୍ତାର କରିବା ପୂର୍ବରୁ ଟିକାର ଷ୍ଟକ ଉପରେ ଧ୍ୟାନ ଦେଇନଥିଲେ କେନ୍ଦ୍ର ସରକାର: ଏସଆଇଆଇର ସହ ନିର୍ଦ୍ଦେଶକ
ନୂଆଦିଲ୍ଲୀ: କରୋନା ବିରୋଧୀ ଟିକାକରଣକୁ ନେଇ ପୁଣେର ଟିକା ନିର୍ମାତା କମ୍ପାନି ସେରମ ଇନଷ୍ଟିଚ୍ୟୁଟର ସହ ନିର୍ଦ୍ଦେଶକ ସୁରେଶ ଯାଦବ କହିଛନ୍ତି କି ସରକାର ଟିକାକରଣ ଅଭିଯାନ ବିସ୍ତାର କରିବା ପୂର୍ବରୁ ଟିକାର ଷ୍ଟକ ଓ ବିଶ୍ୱ ସ୍ୱାସ୍ଥ୍ୟ ସଂଗଠନର ଗାଇଡଲାଇନକୁ ଧ୍ୟାନ ଦେଇ ନାହାନ୍ତି । ତାଙ୍କର ଏହି ବୟାନ ଏଭଳି ସମୟରେ ଆସିଛି, ଯେତେବେଳେ ଦେଶରେ ଟିକାର ଅଭାବ ଦେଖାଦେଇଛି ଓ ରାଜ୍ୟ ସରକାରମାନେ ଟିକା ଯୋଗାଇ ଦେବାକୁ କେନ୍ଦ୍ର ପାଖରେ ଦାବି କରୁଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଏକ କାର୍ଯ୍ୟକ୍ରମରେ ଯାଦବ କହିଛନ୍ତି କି, ଭାରତ ସରକାର ବିଶ୍ୱ ସ୍ୱାସ୍ଥ୍ୟ ସଂଗଠନର ଗାଇଡଲାଇନକୁ ଧ୍ୟାନରେ ରଖି ଦେଶରେ କେଉଁ ବୟସ ଓ କେଉଁ ବୃତ୍ତିର ଲୋକଙ୍କୁ ପ୍ରାଥମିକତା ଆଧାରରେ ପ୍ରଥମେ ଟିକା ଦେବା ଆବଶ୍ୟକ ତାହା ନିର୍ଣ୍ଣୟ କରିବା କଥା । ହେଲେ ସରକାର ୧୮ ବର୍ଷରୁ ଅଧିକ ବୟସ୍କ ଲୋକଙ୍କୁ ଟିକାଦେବାକୁ ଘୋଷଣା କରିଦେଲେ । ମାତ୍ର ସରକାର ଜାଣିଥିଲେ କି ଟିକା ନିର୍ମାତା କମ୍ପାନିମାନଙ୍କ ପାଖରେ ଏତେ ପରିମାଣର ଟିକା ଷ୍ଟକ ନାହିଁ ।
ଯାଦବ ଆହୁରି ମଧ୍ୟ କହିଛନ୍ତି ଯେ, ଲୋକଙ୍କ ପାଇଁ ଟିକାର ଆବଶ୍ୟକତା ରହିଛି । ମାତ୍ର ଟିକାର ୨ଟି ଯାକ ଡୋଜ ନେବା ପରେ ବି ଲୋକମାନେ ସଂକ୍ରମିତ ହେଉଛନ୍ତି । ତେଣୁ କରୋନାରୁ ରକ୍ଷା ପାଇବାକୁ ହେଲେ ଟିକା ନେବା ପୂର୍ବରୁ ଓ ଟିକା ନେବା ପରେ ବି ସଚେତନ ରହିବା ଜରୁରୀ । ଏହାସହ କରୋନା ଭୂତାଣୁର ବିଭିନ୍ନ ଭାରିଏଣ୍ଟ ଟିକା ଉତ୍ପାଦନରେ ବାଧା ସୃଷ୍ଟି କରିପାରେ ବୋଲି ସେ ଅନୁମାନ କରିଛନ୍ତି ।