ଅଶାନ୍ତ ଜମ୍ମୁ- କଶ୍ମୀରରେ ଶାନ୍ତି ବାହାଲ ସହ ନିର୍ବାଚନ କରାଇବା ପାଇଁ ରୁଦ୍ଧଦ୍ୱାର ବୈଠକରେ ଆଲୋଚନା କଲେ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା
ନୂଆଦିଲ୍ଲୀ: ଦେଶର ନୂତନ ସ୍ୱରାଷ୍ଟ୍ର ମନ୍ତ୍ରୀ ରୂପେ ଦାୟିତ୍ୱ ଗ୍ରହଣ କରିବା ପରେ ଅଶାନ୍ତ ଜମ୍ମୁ- କଶ୍ମୀରରେ ଶାନ୍ତି ବାହାଲ କରିବା ପାଇଁ ପ୍ରାଥମିକତା ସହ ସର୍ବାଧିକ ଗୁରୁତ୍ୱ ଆରୋପ କରିଛନ୍ତି ନୂତନ ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା। ଏହି ପରିପ୍ରେକ୍ଷୀରେ ଆଜି (ମଙ୍ଗଳବାର) କେନ୍ଦ୍ର ଗୃହ ମନ୍ତ୍ରାଳୟରେ ଏକ ରୁଦ୍ଧଦ୍ୱାର ବୈଠକର ଆୟୋଜନ କରିବା ସହ ଜମ୍ମୁ- କଶ୍ମୀର ସ୍ଥିତିର ସମୀକ୍ଷା କରିଛନ୍ତି ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଶାହା। ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଶାହାଙ୍କ ଅଧ୍ୟକ୍ଷତାରେ ଆୟୋଜିତ ହୋଇଥିବା ଏହି ରୁଦ୍ଧଦ୍ୱାର ବୈଠକରେ ଜମ୍ମୁ- କଶ୍ମୀର ରାଜ୍ୟପାଳ ସତ୍ୟପାଲ୍ ମଲ୍ଲିକ୍, ଗୁଇନ୍ଦା ବିଭାଗ ମୁଖ୍ୟ ଓ ଗୃହ ସଚିବ ଉପସ୍ଥିତ ରହି ଜମ୍ମୁ- କଶ୍ମୀରର ତାଜା ସ୍ଥିତି ସଂପର୍କରେ ସବିଶେଷ ତଥ୍ୟ ସ୍ୱରାଷ୍ଟ୍ର ମନ୍ତ୍ରୀଙ୍କୁ ପ୍ରଦାନ କରିଥିବା ଜାଣିବାକୁ ମିଳିଛି।
Sambad is now on WhatsApp
Join and get latest news updates delivered to you via WhatsApp
ଏହି ରୁଦ୍ଧଦ୍ୱାର ବୈଠକ ସଂପର୍କରେ ବିଶ୍ୱସ୍ତ ସୂତ୍ରରୁ ହସ୍ତଗତ ହୋଇଥିବା ରିପୋର୍ଟରୁ ଜାଣିବାକୁ ମିଳିଛି ଯେ ଜମ୍ମୁ- କଶ୍ମୀରରେ ମେହବୁବା ମୁଫ୍ତିଙ୍କ ସରକାରର ପତନ ପରେ ଏବେ ରାଷ୍ଟ୍ରପତି ଶାସନ ଅଧୀନରେ ରହିଥିବା ଜମ୍ମୁ- କଶ୍ମୀରକୁ ଆଉ ଅଧିକକାଳ ପାଇଁ ରାଷ୍ଟ୍ରପତି ଶାସନ ଅଧୀନରେ ରଖିବାକୁ ଚାହୁଁ ନାହାନ୍ତି ନୂତନ ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଶାହା। ସେଥିପାଇଁ ଜମ୍ମୁ- କଶ୍ମୀରରେ ଜାରି ଥିବା ରାଷ୍ଟ୍ରପତି ଶାସନକୁ ଉଠାଇନେଇ ସେଠାରେ ଏକ ନିର୍ବାଚିତ ସରକାର ପ୍ରତିଷ୍ଠା କରାଇବା ସପକ୍ଷରେ ରହିଛନ୍ତି ଶ୍ରୀ ଶାହା।
ତେବେ, ଜମ୍ମୁ- କଶ୍ମୀରରେ ନୂତନ ନିର୍ବାଚନ ପୂର୍ବରୁ ଜମ୍ମୁ- କଶ୍ମୀର ନିର୍ବାଚନ ଓ ଲୋକ ପ୍ରତିନିଧି ଆଇନ୍ରେ ପରିବର୍ତ୍ତନ ସହ ନିର୍ବାଚନ ମଣ୍ଡଳୀର ପୁନର୍ଗଠନ କରିବାକୁ ଚାହୁଛନ୍ତି ସ୍ୱରାଷ୍ଟ୍ର ମନ୍ତ୍ରୀ ଶ୍ରୀ ଶାହା। ପ୍ରସଙ୍ଗକ୍ରମେ ଉଲ୍ଲେଖଯୋଗ୍ୟ, ସ୍ୱାଧୀନତା ପ୍ରାପ୍ତି ପୂର୍ବରୁ ବିଗତ ୧୯୩୯ରେ ଗଠିତ ହୋଇଥିଲା ଜମ୍ମୁ- କଶ୍ମୀର ବିଧାନସଭା। ସେତେବେଳର ଶେଖ୍ ଅବଦୁଲ୍ଲାଙ୍କ ସରକାରରେ କଶ୍ମୀରରେ ୪୩, ଜମ୍ମୁରେ ୩୦ ଓ ଲଦାଖ ଅଞ୍ଚଳରେ ୨ଟି ଆସନ ଥିଲା। ଏବେ ଅବଶ୍ୟ ଆସନ ସଂଖ୍ୟା ବୃଦ୍ଧି ପାଇ କଶ୍ମୀରରେ ୪୬, ଜମ୍ମୁରେ ୩୭ ଓ ଲଦାଖ ଅଞ୍ଚଳରେ ୪ଟି ଆସନ ରହିଛି। କିନ୍ତୁ, ଏସବୁ ବିଧାନସଭା ଆସନର ସୀମା ନିର୍ଦ୍ଧାରଣ ହୋଇ ନାହିଁ। ତେଣୁ, ଜମ୍ମୁ- କଶ୍ମୀରରେ ଆସନ୍ତା ନିର୍ବାଚନ ନିର୍ବାଚନ ପୂର୍ବରୁ ଏଥିରେ ପରିବର୍ତ୍ତନ ଆଣିବାକୁ ଚାହୁଁଛନ୍ତି ଦେଶର ନୂତନ ସ୍ୱରାଷ୍ଟ୍ର ମନ୍ତ୍ରୀ ଶ୍ୀ ଶାହା।