ମାର୍ଚ୍ଚ ସୁଦ୍ଧା ୩୦୦ଟି ରାଜପଥ ପ୍ରକଳ୍ପ ସାରିବାକୁ ଲକ୍ଷ୍ୟ ରଖିଲା କେନ୍ଦ୍ର , ଓଡ଼ିଶାରେ ଜମି ଅଧିଗ୍ରହଣ ମୁଖ୍ୟ ସମସ୍ୟା
ନୂଆଦିଲ୍ଲୀ : ଦେଶବ୍ୟାପୀ ଚାଲିଥିବା ୩୦୦ଟି ରାଜପଥ ପ୍ରକଳ୍ପକୁ ୨୦୧୯ ମାର୍ଚ୍ଚ ମାସ ସୁଦ୍ଧା ଶେଷ କରିବାକୁ ସଡ଼କ ପରିବହନ ଏବଂ ରାଜପଥ ମନ୍ତ୍ରାଳୟ ଲକ୍ଷ୍ୟ ରଖିଛି । ଏଥିରୁ ପ୍ରାୟ ୧୦୦ ପ୍ରକଳ୍ପ ଚଳିତ ବର୍ଷ ଶେଷ ସୁଦ୍ଧା ଶେଷ କରିବାକୁ ଲକ୍ଷ୍ୟ ରହିଛି ବୋଲି କେନ୍ଦ୍ର ସଡ଼କ ପରିବହନ, ରାଜପଥ, ଜାହାଜ ଚଳାଚଳ ମନ୍ତ୍ରୀ ନୀତିନ ଗଡକରୀ କହିଛନ୍ତି । କିନ୍ତୁ ଜମି ଅଧିଗ୍ରହଣରେ ବିଳମ୍ବ ଯୋଗୁଁ ଓଡ଼ିଶା ଓ ବିହାର ପ୍ରଭୃତି କେତୋଟି ରାଜ୍ୟରେ ଏହି ପ୍ରକଳ୍ପ ଗୁଡ଼ିକ ବିଳମ୍ବିତ ହେଉଛି ବୋଲି ସେ କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଶ୍ରୀ ଗଡକରୀ ୨୦ ରାଜ୍ୟରେ ଚାଲିଥିବା ଏନଏଚ୍ଏଆଇର ୪୨୭ ଏବଂ ଏନଏଚ୍ଆଇଡିସିଏଲ ତଥା ରାଜପଥ ମନ୍ତ୍ରଣାଳୟର ୩୧୧ ଟି ପ୍ରକଳ୍ପର ସମୀକ୍ଷା କରିଥିଲେ । ପୂର୍ବରୁ ୨୦୧୯ ଜୁନ୍ ସୁଦ୍ଧା ଶେଷ ହେବାକୁ ଥିବା ଏନଏଚ୍ଏଆଇର ୧୨୭ଏବଂ ରାଜପଥ ମନ୍ତ୍ରଣାଳୟର ୧୫୩ଟି ପ୍ରକଳ୍ପ କାମକୁ ତ୍ୱରାନ୍ୱିତ କରି ୨୦୧୯ ମାର୍ଚ୍ଚ ସୁଦ୍ଧା ଶେଷ କରିବାକୁ ଲକ୍ଷ୍ୟ ରଖାଯାଇଛି । ଏଥିସହ ୧୦୦ ପ୍ରକଳ୍ପ ୨୦୧୮ ଡିସେମ୍ବର ସୁଦ୍ଧା ଶେଷ କରିବାକୁ ଲକ୍ଷ୍ୟ ରହିଛି । ୨୦୧୮-୧୯ ରେ ଏନ୍ଏଚ୍ଏଆଇର ନିର୍ମାଣ ଲକ୍ଷ୍ୟକୁ ୫୦୫୮ କିଲୋମିଟରରୁ ୬୦୦୦ କିଲୋମିଟରକୁ ବୃଦ୍ଧି କରାଯାଇଛି । ଏହି ଲକ୍ଷ୍ୟ ମନ୍ତ୍ରଣାଳୟ ନିଶ୍ଚିତ ହାସଲ କରିପାରିବ ବୋଲି ମନ୍ତ୍ରୀ ଆଶା ପ୍ରକଟ କରିଛନ୍ତି । ମହାରାଷ୍ଟ୍ର ଏବଂ ଉତ୍ତର-ପୂର୍ବାଞ୍ଚଳ ରାଜ୍ୟରେ ଚାଲିଥିବା ପ୍ରକଳ୍ପ ଗୁଡ଼ିକର ସମୀକ୍ଷା ତୁରନ୍ତ କରାଯିବ ବୋଲି ମନ୍ତ୍ରୀ ସୂଚନା ଦେଇଥିଲେ ।
ଜମି ଅଧିଗ୍ରହଣ, ପରିବେଶ ଅନୁମତି, ଗଛ କାଟିବାକୁ ଅନୁମତି ଆଦି ରାଜପଥ ପ୍ରକଳ୍ପ ବିଳମ୍ବ ହେବାର ମୁଖ୍ୟ କାରଣ ଭାବେ ଚିହ୍ନଟ କରାଯାଇଛି। ଏ ସବୁ ସମସ୍ୟା ସମାଧାନ କରିବା ପ୍ରକଳ୍ପକୁ ଆଗେଇ ନେବାରେ ଉତ୍ତର ପ୍ରଦେଶ, ତାମିଲନାଡ଼ୁ, ମହାରାଷ୍ଟ୍ର, ଗୁଜରାଟ, ଆନ୍ଧ୍ରପ୍ରଦେଶର ପ୍ରଚେଷ୍ଟାକୁ କେନ୍ଦ୍ରମନ୍ତ୍ରୀ ପ୍ରଶଂସା କରିଥିଲେ । ଏ ଦିଗରେ ବିହାର ଏବଂ ଓଡ଼ିଶାକୁ ଅଧିକ ଉଦ୍ୟମ କରିବାକୁ ପଡ଼ିବ ବୋଲି ସେ କହିଥିଲେ । ଦେଶବ୍ୟାପୀ ଏ ସବୁ ପ୍ରତିବନ୍ଧକ ଦୂର କରିବା ଦିଗରେ ନିୟମିତ ସମୀକ୍ଷା ହେବା ଦରକାର ବୋଲି ସେ କହିଥିଲେ ।