ଆମେରିକାଠାରୁ ରିପର ଡ୍ରୋନ କିଣିବା ସମ୍ପର୍କରେ କୌଣସି ନିଷ୍ପତ୍ତି ନେଇନାହିଁ ଭାରତୀୟ ପ୍ରତିରକ୍ଷା ମନ୍ତ୍ରାଳୟ
ନୂଆଦିଲ୍ଲୀ : ଚୀନ ଓ ପାକିସ୍ତାନ ସହ ଭାରତର ଉତ୍ତେଜନା ବୃଦ୍ଧି ପାଉଥିବାରୁ ଭାରତ ଆମେରିକାଠାରୁ ଲଢୁଆ ଡ୍ରୋନ କିଣିବାକୁ ଗତ କିଛି ବର୍ଷ ହେଲା ଯୋଜନା କରୁଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ଏଥିଲାଗି ଗତ ବର୍ଷଠାରୁ ଅନୁମତି ଦେଇସାରିଛନ୍ତି । କିନ୍ତୁ ଏସବୁ ଡ୍ରୋନ କିଣିବା ବାବଦରେ ଭାରତର ପ୍ରତିରକ୍ଷା ମନ୍ତ୍ରାଳୟ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନେଇନଥିବା ଜଣାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଗତ ବର୍ଷ ଏପ୍ରିଲ ମାସରେ ଆମେରିକା ନିଜର ସାମରିକ ରପ୍ତାନି ନୀତିରେ ସଂଶୋଧନ କରି ଭାରତକୁ ଡ୍ରୋନ ରପ୍ତାନି ପାଇଁ ପଥ ପରିଷ୍କାର କରିଥିଲା । ଭାରତକୁ ପ୍ରାୟ ୩ ବିଲିୟନ ଡଲାର ବିନିମୟରେ ୩୦ଟି ଏମକ୍ୟୁ-୯ ରିପର ଡ୍ରୋନ ବିକ୍ରି ପାଇଁ ଆମେରିକା ପ୍ରସ୍ତାବ ଦେଇଥିଲା । ଜେନେରାଲ ଆଟମିକ୍ସ କମ୍ପାନି ଏସବୁ ଡ୍ରୋନଗୁଡ଼ିକର ନିର୍ମାଣ କରିଥାଏ ।
ମାତ୍ର ଭାରତୀୟ ଭୌଗୋଳିକ ପରିସ୍ଥିତିରେ ଆମେରିକୀୟ ଡ୍ରୋନଗୁଡ଼ିକର ଉପଯୋଗିତା ସମ୍ପର୍କରେ ଭାରତୀୟ ବାୟୁସେନା ସନ୍ଦିହାନ ଥିବାରୁ ଏହି କ୍ରୟ ସମ୍ପର୍କରେ ପ୍ରତିରକ୍ଷା ମନ୍ତ୍ରାଳୟ କୌଣସି ନିଷ୍ପତ୍ତି ନେଇପାରୁନାହିଁ । ଲଦାଖ ଓ ଅନ୍ୟ ହିମାଳୟ କ୍ଷେତ୍ରରେ ଏସବୁ ଡ୍ରୋନଗୁଡ଼ିକର କାର୍ଯ୍ୟକାରିତାକୁ ନେଇ ବାୟୁସେନା ସନ୍ଦେହରେ ଅଛି । ଏଣୁ ତରବର ହୋଇ ଡ୍ରୋନ କିଣିବା ଅପେକ୍ଷା ବ୍ୟାପକ ଅଧ୍ୟୟନ ଓ ବିଚାର ବିମର୍ଷ ପରେ ଆମେରିକାରୁ ଡ୍ରୋନ କିଣିବାକୁ ବାୟୁସେନା ଚାହୁଁଛି ।