ମୋଦିଙ୍କଠାରୁ ଶିଖିଲା ଚୀନ: ସ୍ୱଚ୍ଛତା ଅଭିଯାନ ଉପରେ ଗୁରୁତ୍ୱ
ବେଜିଂ: ମନେହେଉଛି ମୋଦିଙ୍କ ସ୍ୱଚ୍ଛ ଭାରତ ଅଭିଯାନରୁ ଶିକ୍ଷା ଲାଭ କରିଛି ଚୀନ । ମୋଦିଙ୍କ ପରି ଚୀନ ରାଷ୍ଟ୍ରପତି ଜି ଜିନ୍ପିଙ୍ଗ୍ ବି ପରିମଳ ଉପରେ ଗୁରୁତ୍ୱ ଆରୋପ କରିବା ସହ ଗ୍ରାମାଞ୍ଚଳରେ ଅଧିକରୁ ଅଧିକ ଶୌଚାଳୟ ନିର୍ମାଣ ପାଇଁ ନିର୍ଦ୍ଦେଶ ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗତ ୨୦୧୫ରେ ରାଷ୍ଟ୍ରପତି ଜି ଏହି ଶୌଚାଳୟ ଅଭିଯାନର ପ୍ରଥମ ପର୍ଯ୍ୟାୟ ଆରମ୍ଭ କରିଥିଲେ ଯେଉଁଥିରେ ପର୍ଯ୍ୟଟନସ୍ଥଳୀଗୁଡ଼ିକରେ ଥିବା ଶୌଚାଳୟଗୁଡ଼ିକର ଉନ୍ନତି ପାଇଁ ପଦକ୍ଷେପ ନିଆଯାଇଥିଲା । ଅକ୍ଟୋବର ସୁଦ୍ଧା ଚୀନର ପର୍ଯ୍ୟଟନ ବିଭାଗ ପକ୍ଷରୁ ପ୍ରାୟ ୬୮ ହଜାର ଶୌଚାଳୟ ନିର୍ମାଣ କରାଯାଇଛି । ୨୦୧୮ରୁ ୨୦୨୦ ମଧ୍ୟରେ ଆଉ ୬୪ ହଜାର ଶୌଚାଳୟ ନିର୍ମାଣ ପାଇଁ ବିଭାଗ ଲକ୍ଷ୍ୟ ରଖିଛି ।
ଏବେ ଜି ଏହି ଅଭିଯାନର ୨ୟ ପର୍ଯ୍ୟାୟ ଆରମ୍ଭ କରିବାକୁ ଯାଉଛନ୍ତି ଯେଉଁଥିରେ ଗ୍ରାମାଞ୍ଚଳରେ ଅଧିକରୁ ଅଧିକ ଶୌଚାଳୟ ନିର୍ମାଣ କରାଯିବା ଉପରେ ଗୁରୁତ୍ୱ ଦିଆଯିବ ।
ଚୀନର ଗ୍ରାମାଞ୍ଚଳରେ ଲୋକମାନେ ଏବେ ବି ଶୌଚାଳୟର ସୁବିଧା ଠିକ ଭାବେ ପାଇପାରିନାହାନ୍ତି । ଅନେକ ଗାଁରେ ଲୋକମାନେ ଅର୍ଥ ଅଭାବରୁ ବାହାରକୁ ଶୌଚ ପାଇଁ ଯାଉଛନ୍ତି ବା ଉଠା ପାଇଖାନା ବ୍ୟବହାର କରୁଛନ୍ତି । ଲୋକମାନଙ୍କ ଏହି ପରିସ୍ଥିତିରେ ଉନ୍ନତି ଆଣିବାକୁ ଉଦ୍ୟମ କରୁଛନ୍ତି ଜି ।
ସେ କହିଛନ୍ତି ନୂଆ ବିକଶିତ ଚୀନ ଗଢିବାକୁ ହେଲେ ଆମକୁ ଏ କ୍ଷେତ୍ରରେ ମଧ୍ୟ ଉନ୍ନତି କରିବାକୁ ହେବ । ଦେଶର ସାଧାରଣ ଜନତାଙ୍କ ଜୀବନ ଧାରଣ ମାନରେ ଉନ୍ନତି କରି ହିଁ ଆମେ ବିକାଶ ପଥରେ ଆଗେଇ ପାରିବା ।
ଚୀନର ସମ୍ବାଦ ସରବରାହ ସଂସ୍ଥା ଜିନ୍ହୁଆର ଏକ ଖବର ଅନୁସାରେ ଜି କିଛିଦିନ ତଳେ ଗ୍ରାମାଞ୍ଚଳ ଗସ୍ତରେ ଯାଇଥିବାବେଳେ ଲୋକମାନଙ୍କୁ ସେମାନଙ୍କର ଶୌଚାଳୟର ଅବସ୍ଥା ସଂପର୍କରେ ପଚାରିଥିଲେ । ଏକ ସ୍ୱଚ୍ଛ ପାଇଖାନା ଦ୍ୱାରା ଗ୍ରାମୀଣ ଚୀନର ବିକାଶ ସମ୍ଭବ ବୋଲି ସେ ଲୋକମାନଙ୍କୁ ପରାମର୍ଶ ଦେଇଥିଲେ ।
ପ୍ରଧାନମନ୍ତ୍ରୀ ମୋଦି ଗତ ୨୦୧୪ରେ ଭାରତରେ ସ୍ୱଚ୍ଛ ଭାରତ ଅଭିଯାନ ଆରମ୍ଭ କରିଥିଲେ ।