ଚନ୍ଦ୍ରବାବୁ ନାଇଡୁ ଆଧୁନିକ ଯୁଗର ରାବଣ : ଜଗନ

ଶ୍ରୀକାକୁଲମ୍ : ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଓ୍ବାଇଏସ ଜଗନମୋହନ ରେଡ୍ଡୀ ତେଲୁଗୁ ଦେଶମ ପାର୍ଟି (ଟିଡିପି) ସଭାପତି ଏନ ଚନ୍ଦ୍ରବାବୁ ନାଇଡୁଙ୍କୁ ତୀବ୍ର ସମାଲୋଚନା କରିବା ସହ ତାଙ୍କୁ ଆଧୁନିକ ଯୁଗର ରାବଣ ବୋଲି କହିଛନ୍ତି ।

ଶ୍ରୀକାକୁଲମରେ ଏକ ସାଧାରଣ ସଭାକୁ ସମ୍ବୋଧିତ କରିବା ସମୟରେ ପୂର୍ବତନ ମୁଖ୍ୟମନ୍ତ୍ରୀ ଚନ୍ଦ୍ରବାବୁଙ୍କୁ ଟାର୍ଗେଟ କରିଥିଲେ । ସେ କହିଥିଲେ ଯେ ‘ବାବୁଙ୍କୁ ବିଦାୟ’ କହିବାର ସମୟ ଆସିଛି ।

ଚନ୍ଦ୍ରବାବୁ ନାଇଡୁ କିପରି ଏନଟିଆରକୁ ପଛରେ ପକାଇ କ୍ଷମତା ଦଖଲ କରିଥିଲେ ସେ ବିଷୟରେ ଲୋକଙ୍କୁ ସ୍ମରଣ କରାଇ ଜଗନ କହିଥିଲେ ଯେ “ଯେଉଁମାନେ ସେମାନଙ୍କର କଠିନ ପରିଶ୍ରମ ଏବଂ ପ୍ରତିବଦ୍ଧତା ଦ୍ୱାରା କ୍ଷମତାକୁ ଆସନ୍ତି ସେମାନଙ୍କୁ ଏନଟିଆର, ଏମଜିଆର ଏବଂ ଜଗନ କୁହାଯାଏ । ଅପରପକ୍ଷରେ ବିଶ୍ୱାସଘାତକତା କରି କ୍ଷମତାକୁ ଆସୁଥିବା ଲୋକଙ୍କୁ ଚନ୍ଦ୍ରବାବୁ କୁହାଯାଏ” ।

ସେ ଆହୁରି ମଧ୍ୟ କହିଥିଲେ ଯେ, ଚନ୍ଦ୍ରବାବୁଙ୍କ ପୋଷ୍ୟ ପୁତ୍ର ଉଡ୍ଡନମ କିଡନୀ ପୀଡିତଙ୍କୁ ଦେଖା କରିଥିଲେ । କିନ୍ତୁ ଟିଡିପି ସରକାର କ୍ଷମତାରେ ଥିବା ବେଳେ କିଡନୀ ରୋଗୀଙ୍କ ପାଇଁ ପ୍ରକୃତରେ କ’ଣ କରିଥିଲେ ବୋଲି ଜଗନମୋହନ ରେଡ୍ଡୀ ପ୍ରଶ୍ନ କରିଛନ୍ତି ।

ୱାଇଏସଆରସିପି ନେତା କହିଛନ୍ତି ଯେ ଯଦି ଲୋକମାନେ ତାଙ୍କ ସରକାରଙ୍କ ଦ୍ବାରା ଉପକୃତ ହୋଇଥାନ୍ତି, ତେବେ ତାଙ୍କୁ ଭୋଟ ଦେଇ ପୁଣି କ୍ଷମତାକୁ ଆଣନ୍ତୁ ।