୨୦୨୨ରେ ଚନ୍ଦ୍ରଯାନ-୩ର ଉତକ୍ଷେପଣ କରିବ ଇସ୍ରୋ: କେ ଶିବନ
ନୂଆଦିଲ୍ଲୀ: ଜୁଲାଇ ୨୦୧୯ ରେ ଚନ୍ଦ୍ରଯାନ ୨ର ଉତକ୍ଷେପଣ ପରେ ୨୦୨୦ ଏପ୍ରିଲରେ ଚନ୍ଦ୍ରଯାନ-୩ର ଉତକ୍ଷେପଣ କରିବା ନେଇ ଯୋଜନା କରିଥିଲା ଭାରତୀୟ ମହାକାଶ ଗବେଷଣା କେନ୍ଦ୍ର (ଇସ୍ରୋ)। ହେଲେ କରୋନା ମହାମାରୀ ପାଇଁ ଏହା ସମ୍ଭବ ହୋଇପାରିନଥିଲା। ଏବେ ଭାରତର ଚନ୍ଦ୍ରକୁ ଯିବାର ତୃତୀୟ ମିଶନ ଚନ୍ଦ୍ରଯାନ-୩ ୨୦୨୨ରେ ଲଞ୍ଚ କରାଯିବାର ସମ୍ଭାବନା ରହିଛି ବୋଲି କହିଛନ୍ତି ଇସ୍ରୋ ମୁଖ୍ୟ କେ.ଶିବନ। କରୋନା ଲକଡାଉନ୍ ପାଇଁ ଇସ୍ରୋର ଚନ୍ଦ୍ରଯାନ-୩ ସମେତ ୨୦୨୦ର ଶେଷ ଭାଗରେ ଉତକ୍ଷେପଣ ହେବାର ଯୋଜନା ଥିବା ଦେଶର ପ୍ରଥମ ମାନବରହିତ ମହାକାଶ ଅଭିଯାନ ଗଗନଯାନର ଉତକ୍ଷେପଣ କାମ ମଧ୍ୟ ଅଟକି ରହିଛି।
Sambad is now on WhatsApp
Join and get latest news updates delivered to you via WhatsApp
ଇସ୍ରୋ ମୁଖ୍ୟ କେ.ଶିବନଙ୍କ ମୁତାବକ, “ଆମେ ଏହା ଉପରେ କାର୍ଯ୍ୟ କରୁଛୁ। ଚନ୍ଦ୍ରଯାନ-୨ ଭଳି ଚନ୍ଦ୍ରଯାନ-୩ରେ ଲ୍ୟାଣ୍ଡର ଏବଂ ରୋଭର ରହିବ। ଚନ୍ଦ୍ରଯାନ-୨ ଭଳି ଚନ୍ଦ୍ରଯାନ-୩ର ମଧ୍ୟ ସୂକ୍ଷ୍ମ ଅବତରଣ ଉଦ୍ୟମ କରାଯିବ। ହେଲେ ଚନ୍ଦ୍ରଯାନ-୩ର କକ୍ଷପଥ ରହିବ ନାହିଁ। ଚନ୍ଦ୍ରଯାନ-୨ ସମୟରେ ଲଞ୍ଚ କରାଯାଇଥିବା କକ୍ଷପଥ ଚନ୍ଦ୍ରଯାନ-୩ ପାଇଁ ବ୍ୟବହୃତ ହେବ। ଚନ୍ଦ୍ରଯାନ-୩କୁ ପ୍ରାୟତଃ ୨୦୨୨ରେ ଉତକ୍ଷେପଣ କରାଯିବ ବୋଲି କେ.ଶିବନ କହିଛନ୍ତି।
ଏହା ସହ ଆସନ୍ତା ଡିସେମ୍ବରରେ ମାନବରହିତ ମହାକାଶ ଅଭିଯାନ ଗଗନଯାନର ଉତକ୍ଷେପଣ ପାଇଁ ଇସ୍ରୋ ପ୍ରସ୍ତୁତ ହେଉଥିବା କହିଛନ୍ତି କେ.ଶିବନ।