କରୋନାରେ ପ୍ରାଣ ହରାଉଥିବା ଦମ୍ପତ୍ତିଙ୍କ ପିଲାମାନଙ୍କ ପାଠପଢା ଖର୍ଚ୍ଚ ସମ୍ପୂର୍ଣ୍ଣ ବହନ କରିବେ ଛତିଶଗଡ଼ ସରକାର
ରାୟପୁର: କରୋନା ବିରୋଧରେ ଲଢେଇ ସମୟରେ ଛତିଶଗଡ ସରକାର ଏପରି ଏକ ନିଷ୍ପତ୍ତି ନେଇଛନ୍ତି ଯାହା କୋଭିଡ ପୀଡିତଙ୍କ କିଛି ଲୁହ ପୋଛିଦେବାକୁ ସମର୍ଥ ହେବ | ଛତିଶଗଡ ସରକାର ଆଜି ଘୋଷଣା କରିଛନ୍ତି ଯେ ଯେଉଁ ପିଲାମାନଙ୍କର ବାପା-ମା କରୋନା ଯୋଗୁଁ ପ୍ରାଣ ହରାଇଛନ୍ତି ସେମାନଙ୍କ ସମ୍ପୂର୍ଣ୍ଣ ଦାୟିତ୍ୱ ରାଜ୍ୟ ସରକାର ନେବେ | ରାଜ୍ୟ ସରକାର କେବଳ ସେମାନଙ୍କ ମାଗଣା ଶିକ୍ଷାଦାନ କଥା ବୁଝିବେ ନାହିଁ ବରଂ ସେମାନଙ୍କ ଭବିଷ୍ୟତ ଗଠନ ପାଇଁ ଯଥାସମ୍ଭବ ଚେଷ୍ଟା କରିବେ ।
Sambad is now on WhatsApp
Join and get latest news updates delivered to you via WhatsApp
ସରକାରଙ୍କ ଏହି ପଦକ୍ଷେପ ଛତିଶଗଡ ମହାତରି ଦୁଲାର ସ୍କିମ୍ ମାଧ୍ୟମରେ କାର୍ଯ୍ୟକାରୀ ହେବ। ଏହି ଆର୍ଥିକ ବର୍ଷରୁ ଏହି ଯୋଜନା କାର୍ଯ୍ୟକାରୀ ହେବ। ଛତିଶଗଡ ସରକାରଙ୍କ ଘୋଷଣା ମୁତାବକ କରୋନା କାରଣରୁ ପିତାମାତା ହରାଇଥିବା ପିଲାମାନଙ୍କ ଶିକ୍ଷାର ସମ୍ପୂର୍ଣ୍ଣ ଖର୍ଚ୍ଚ ରାଜ୍ୟ ସରକାର ବହନ କରିବେ। ଏହା ବ୍ୟତୀତ ରାଜ୍ୟ ସରକାର ପ୍ରଥମରୁ ଅଷ୍ଟମ ପର୍ଯ୍ୟନ୍ତ ଏହିପରି ପିଲାମାନଙ୍କୁ ମାସିକ ୫୦୦ ଟଙ୍କା ଏବଂ ନବମରୁ ଦ୍ୱାଦଶ ପର୍ଯ୍ୟନ୍ତ ପିଲାମାନଙ୍କୁ ୧୦୦୦ ଟଙ୍କା ଛାତ୍ରବୃତ୍ତି ପ୍ରଦାନ କରିବେ।
କୌଣସି ସରକାରୀ କିମ୍ବା ବେସରକାରୀ ବିଦ୍ୟାଳୟରେ ପଢିବା ପାଇଁ ଏହି ପିଲାମାନେ ଏହି ଛାତ୍ରବୃତ୍ତି ପାଇବାକୁ ଯୋଗ୍ୟ ହେବେ। ସେହିପରି ଯଦି ଏହି ପିଲାମାନେ ରାଜ୍ୟରେ ଆରମ୍ଭ ହୋଇଥିବା ସ୍ୱାମୀ ଆତ୍ମାନନ୍ଦ ଇଂରାଜୀ ମାଧ୍ୟମ ବିଦ୍ୟାଳୟରେ ଆଡମିଶନ ପାଇଁ ଆବେଦନ କରନ୍ତି, ତେବେ ସେମାନଙ୍କୁ ପ୍ରାଥମିକତା ଭାବେ ଆଡମିଶନ ଦିଆଯିବ ଏବଂ ସେମାନଙ୍କଠାରୁ କୌଣସି ଶୁଳ୍କ ଆଦାୟ କରାଯିବ ନାହିଁ |