ଠକାମିର ଶିକାର ହେଲେ ପଞ୍ଜାବର ମୁଖ୍ୟମନ୍ତ୍ରୀ ଅମ୍ରିନ୍ଦର ସିଂହଙ୍କ ପତ୍ନୀ, ଆକାଉଣ୍ଟରୁ ଚାଲିଗଲା ୨୩ଲକ୍ଷ ଟଙ୍କା
ନୂଆଦିଲ୍ଲୀ : ପଞ୍ଜାବରେ ସାଇବର କ୍ରାଇମ୍କୁ ନେଇ ଏକ ବଡ଼ ମାମଲା ସାମ୍ନାକୁ ଆସିଛି । ଅପରାଧୀମାନଙ୍କ ସାହାସ ଦିନକୁ ଦିନ ବଢ଼ିବାକୁ ଲାଗୁଥିବା ଦେଖା ଯାଇଛି । ପୂର୍ବରୁ ସାଧାରଣ ଲୋକ ଠକାମିର ଶିକାର ହେଉଥିବା ଖବର ମିଳୁଥିଲା । ଏବେ ପଞ୍ଜାବର ମୁଖ୍ୟମନ୍ତ୍ରୀ ଅମ୍ରିନ୍ଦର ସିଂହଙ୍କ ପତ୍ନୀ ତଥା ସାଂସଦ ପରଣୀତ କୌର୍ ଠକାମିର ଶିକାର ହୋଇଥିବା ଜଣା ପଡ଼ିଛି । ସାଂସଦ ପରଣୀତ କୌର୍ ୨୩ଲକ୍ଷ ଟଙ୍କାର ଅନ୍ଲାଇନ ଠକାମିର ଶିକାର ହୋଇଥିବା ଜଣା ପଡ଼ିଛି । ଭାରତୀୟ ଷ୍ଟେଟ୍ ବ୍ୟାଙ୍କର ମ୍ୟାନେଜର ବୋଲି କହି ଫୋନ କରିବା ସହ ଦରମା ପଠାଯିବ ବୋଲି କହି ଆକାଉଣ୍ଟ ନମ୍ବର ମାଗିଥିଲେ । ଯାହାର କିଛି ସମୟ ପରେ ପରଣୀତ କୌର୍ଙ୍କ ଆକାଉଣ୍ଟରୁ ୨୩ଲକ୍ଷ ଟଙ୍କା ଉଡ଼ି ଯାଇଥିବା ଜଣା ପଡ଼ିଛି । ତେବେ ଘଟଣାଟି ମୁଖ୍ୟମନ୍ତ୍ରୀଙ୍କ ପତ୍ନୀଙ୍କ ସହ ଘଟିଥିବାରୁ ପୁଲିସ ତୁରନ୍ତ ଯାଞ୍ଚ କରି ଅଭିଯୁକ୍ତକୁ ଗିରଫ କରି ନେଇଛି । କିନ୍ତୁ ଜଣେ ମୁଖ୍ୟମନ୍ତ୍ରୀଙ୍କ ପତ୍ନୀ ଓ ସାଂସଦଙ୍କ ସହ ଏଭଳି ହେବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଗତ ସପ୍ତାହରେ ପରଣୀତ୍ଙ୍କ ପାଖକୁ ଏକ ଫୋନ କଲ ଆସିବା ସହ ଯୁବକଜଣଙ୍କ ଷ୍ଟେଟ୍ ବ୍ୟାଙ୍କର ମ୍ୟାନେଜର ବୋଲି ପରିଚୟ ଦେଇଥିଲେ । ଆକାଉଣ୍ଟକୁ ଦରମା ପଠାଇବାରେ ଅଛି, ସେଥିପାଇଁ ଏଟିଏମ୍ ନମ୍ବର ଓ ପଛରେ ଲେଖାଥିବା ସିଭିଭି ନମ୍ବର ଦିଅନ୍ତୁ । ବିଳମ୍ବ ହେଲେ ଦରମା ପହଞ୍ଚି ପାରିବ ନାହିଁ ବୋଲି କହିଥିଲେ ଅଭିଯୁକ୍ତ । ସବୁ ବିବରଣୀ ଦେବା ପରେ ଆପଣଙ୍କ ଫୋନକୁ ଏକ ଓଟିପି ଯିବ, ତାକୁ ମୋତେ ଦିଅନ୍ତୁ ବୋଲି କହିଥିଲେ ଅଭିଯୁକ୍ତ । ପରଣୀତ୍ ଓଟିପି ଦେବା ପରେ ଫୋନ କଟିଯିବା ସହ ତାଙ୍କ ଆକାଉଣ୍ଟରୁ ୨୩ଲକ୍ଷ ଟଙ୍କା ଉଡ଼ି ଯାଇଥିଲା । ତୁରନ୍ତ ପରଣୀତ୍ ଏ ନେଇ ପୁଲିସକୁ ସୂଚନା ଦେବା ପରେ ପୁଲିସ ଯାଞ୍ଚ କରି ଅଭିଯୁକ୍ତକୁ ଗିରଫ କରିଛି ।