ବାପା ଚଲାଉଥିଲେ ଅଟୋ, ଜୋତା କିଣିବାକୁ ପାଖରେ ନ ଥିଲା ଟଙ୍କା; ଏବେ ଆଇପିଏଲରେ ଚମତ୍କାର ଖେଳୁଛନ୍ତି ଚେତନ ସକରିୟା

ନୂଆଦିଲ୍ଲୀ: ସଫଳତା ସେମାନଙ୍କୁ ମିଳିଥାଏ, ଯାହାଙ୍କ ମନରେ ଭରପୂର ଇଚ୍ଛା ଶକ୍ତି ରହିଥାଏ । ଯଦି କିଛି କରି ଦେଖାଇବାର ଇଚ୍ଛା ଥାଏ, ନିଜ ଉପରେ ଭରସା ଓ ଆତ୍ମବିଶ୍ୱାସ ରହିଥାଏ ତେବେ ସବୁ କିଛି ସମ୍ଭବ ହୋଇଥାଏ । ଏଭଳି ନିଜ ସ୍ୱପ୍ନକୁ ପୂରଣ କରିଛନ୍ତି ରାଜସ୍ଥାନ ରୟାଲ୍ସର ପେସ୍ ବୋଲର ଚେତନ ସକରିୟା । ଏବେ ସଂଘର୍ଷ ପରେ ସଫଳତାର ସ୍ୱାଦ ଚାଖିଛନ୍ତି ଚେତନ । ଥରେ କି ଦୁଇ ଥର ନୁହେଁ, ଏଭଳି ଅନେକ ଥର ନିଜ ଜୀବନରେ ସଂଘର୍ଷକୁ ସେ ସାମ୍ନା କରିଛନ୍ତି ।

ଚେତନ ସକରିୟାଙ୍କ ଜନ୍ମ ଗୁଜୁରାଟର ଭାବ ନଗରରେ । ବୟସ ମାତ୍ର ୨୩ ବର୍ଷ । କ୍ରିକେଟ ଖେଳିବା ପାଇଁ ତାଙ୍କ ଆଗ୍ରହ ତାଙ୍କୁ ଆଜି ବହୁତ ଆଗକୁ ନେଇଯାଇଛି । ହେଲେ ଗରିବ ଗଳିରୁ ବାହାରି କ୍ରିକେଟ ମୈଦାନକୁ ଆସିବାକୁ ତାଙ୍କୁ ଅନେକ କଷ୍ଟ କରିବାକୁ ପଡିଛି।

ପିଲା ବେଳୁ ଅନେକ ଅଭାବ ଅସୁବିଧାରେ ବଢିଛନ୍ତି ଚେତନ । ଚେତନଙ୍କ ବାପା ଜଣେ ଅଟୋ ଡ୍ରାଇଭର । ଅଟୋ ଚଲାଇ ନିଜ ପରିବାର ଚଳାନ୍ତି । ହେଲେ ୨-୩ ଥର ଦୁର୍ଘଟଣା ହେବା ପରେ ଅଟୋ ଚଲାଇବା ଛାଡିଦେଇଥିଲେ ଚେତନଙ୍କ ବାପା । ଏହା ପରେ ପରିବାରର ଭାର ଚେତନଙ୍କ ଉପରକୁ ଚାଲି ଆସିଥିଲା । ମାମୁଙ୍କ ଦୋକାନରେ ରହି କାମ କରିବା ସହ କ୍ରିକେଟ ମଧ୍ୟ ଖେଳୁଥିଲେ । ହେଲେ ଚେତନଙ୍କ ବାପା କ୍ରିକେଟ ଖେଳକୁ ପସନ୍ଦ କରୁ ନଥିଲେ । ସେ କହୁଥିଲେ କ୍ରିକେଟ ହେଉଛି ଧନୀମାନଙ୍କ ଖେଳ । ହେଲେ ଚେତନ ନିଜ ସ୍ୱପ୍ନକୁ କେବେ ବି ଛାଡି ନଥିଲେ ।