ମୁମ୍ବାଇ: ମହାରାଷ୍ଟ୍ରର ମହାମେଣ୍ଟ ସରକାରରେ ସାମିଲ ଥିବା ଏନସିପିର ଘର କଳି ପଦାରେ ପଡ଼ିଛି। ଦଳର ବଡ ଓବିସି ନେତା ଛଗନ ଭୁଜବଳ ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନାରେ ଯୋଗ ଦେଇଥିବାର ଖବର ନେଇ ରାଜନୈତିକ ମହଲରେ ଚର୍ଚ୍ଚା ଜାରି ରହିଛି। ଅଜିତ ପାୱାରଙ୍କ ଉପରେ ଛଗନ ଅସନ୍ତୁଷ୍ଟ ଥିବା ଅନୁମାନ କରାଯାଉଛି। ବର୍ତ୍ତମାନ, ଅସନ୍ତୋଷକୁ ନେଇ ରାଜନୈତିକ ମହଲରେ କଳ୍ପନାଜଳ୍ପନା ଜାରି ରହିଛି। ଏକ ଖବର ମଧ୍ୟ ପ୍ରଚାର ହେଉଛି ୟୁବିଟିର ଜଣେ ବରିଷ୍ଠ ନେତା ଗତ ସପ୍ତାହରେ ଛଗନ ଭୁଜବଳଙ୍କୁ ଭେଟିଥିଲେ।

Advertisment

୨୦୨୪ ଲୋକସଭା ନିର୍ବାଚନ ପୂର୍ବରୁ ମରାଠା ସଂରକ୍ଷଣ ଆନ୍ଦୋଳନ ସମୟରେ, ଆନ୍ଦୋଳନର ନେତା ମନୋଜ ଜରାଙ୍ଗେ ମରାଠାଙ୍କୁ ଓବିସି ସଂରକ୍ଷଣର କିଛି ଅଂଶ ଦେବାକୁ ଦାବି କରିଥିଲେ। ସଂରକ୍ଷଣ ପ୍ରସଙ୍ଗରେ ମୁଖ୍ୟମନ୍ତ୍ରୀ ଏକନାଥ ସିନ୍ଦେଙ୍କ ସହ ଚୁକ୍ତି କରିବା ପରେ ସେ ଏହି ଦାବି କରିଥିଲେ। ଏହା ପରେ ଓବିସି ନେତା ଲକ୍ଷ୍ମଣ ହାକେ ମଧ୍ୟ ଗତ ଏକ ସପ୍ତାହ ଧରି ଉପବାସରେ ବସିଛନ୍ତି। ସେ ଓବିସି ସଂରକ୍ଷଣରେ ଅନିୟମିତତା ହୋଇଥିବାକୁ ବିରୋଧ କରୁଛନ୍ତି। ଫଳରେ ମନ୍ତ୍ରୀ ଛଗନ ଭୁଜବଳଙ୍କ ଦ୍ୱାରା ସିନ୍ଦେ ସରକାରଙ୍କ ସମସ୍ୟା ବୃଦ୍ଧି ପାଇଛି। କାରଣ ଛଗନ ମଧ୍ୟ ସରକାରଙ୍କୁ ଧମକ ଦେଇଛନ୍ତି ଯେ ଯଦି ଓବିସି ସଂରକ୍ଷଣକୁ ବଦଳାଇ ଦିଆଯାଏ ତେବେ ସେ ମନ୍ତ୍ରୀ ପଦରୁ ଇସ୍ତଫା ଦେବେ ଏବଂ ଏହି ଆନ୍ଦୋଳନରେ ଯୋଗଦେବେ।

ରାଜ୍ୟସଭାକୁ ପଠା ନ ଯିବାରୁ ଛଗନ ମଧ୍ୟ ଅସନ୍ତୁଷ୍ଟ ଅଛନ୍ତି। ନିକଟରେ ଅଜିତ ପାୱାର ତାଙ୍କ ପତ୍ନୀ ସୁନେତ୍ରାଙ୍କୁ ରାଜ୍ୟସଭା ପଠାଇବାକୁ ନିଷ୍ପତ୍ତି ନେଇଥିଲେ। ସେ ତାଙ୍କ ପତ୍ନୀଙ୍କୁ ବିଜେପି ସହାୟତାରେ ରାଜ୍ୟସଭାକୁ ପଠାଇବାକୁ ଚାହୁଁଛନ୍ତି। ତାଙ୍କ ପତ୍ନୀ ମଧ୍ୟ ଏଥିପାଇଁ ନାମାଙ୍କନପତ୍ର ଦାଖଲ କରିଛନ୍ତି। ସୁନେତ୍ରା ନାମାଙ୍କନ ଦାଖଲ କରିବା ପରେ ଗଣମାଧ୍ୟମ ସହ କଥାବାର୍ତ୍ତା ବେଳେ ଛଗନ କହିଛନ୍ତି ତାଙ୍କର ଇଚ୍ଛା ରାଜ୍ୟସଭାକୁ ଯିବା କିନ୍ତୁ ଦଳ ସର୍ବସମ୍ମତି କ୍ରମେ ସୁନେତ୍ରାଙ୍କୁ ରାଜ୍ୟସଭାକୁ ପଠାଇବାକୁ ନିଷ୍ପତ୍ତି ନେଇଛି। ଏହି ସମୟରେ ସେ କହିଥିଲେ ଯେ ସେ ଅସନ୍ତୁଷ୍ଟ ନାହାନ୍ତି।

ତେବେ ସମସ୍ତ ସମ୍ଭାବନାକୁ ଅଣଦେଖା କରି ସେ କହିଛନ୍ତି ଯେ ମୋର ଅସନ୍ତୋଷ ବିଷୟରେ ଗଣମାଧ୍ୟମ ଅଧିକ ଖବର ପ୍ରସାରଣ କରୁଛି। ମୁଁ କାହା ଉପରେ ଅସନ୍ତୁଷ୍ଟ ନାହିଁ। ଏହି ସମୟରେ ଶିବସେନା ସାଂସଦ ସଞ୍ଜୟ ରାଉତ ତାଙ୍କ ଉପରେ ଏକ କଟାକ୍ଷପୂର୍ଣ୍ଣ ମନ୍ତବ୍ୟ ପ୍ରଦାନ କରି କହିଥିଲେ ଶିବସେନାରୁ ବାହାରୁଥିବା ଲୋକମାନେ ପ୍ରେତାତ୍ମା ଭଳି ଘୁରି ବୁଲୁଛନ୍ତି। ଏହି ବିବୃତ୍ତିର ବାହାନା କରି ସେ ଏକନାଥ ସିନ୍ଦେ ଏବଂ ନାରାୟଣ ରାଣେଙ୍କୁ ଟାର୍ଗେଟ କରିଥିଲେ।