ମଧ୍ୟାହ୍ନ ଭୋଜନରେ ଅଣ୍ଡା ସହ ମିଳିବ ଚିକେନ, ଏହି ରାଜ୍ୟରେ ଆରମ୍ଭ ହେବ ବ୍ୟବସ୍ଥା

କୋଲକାତା: ଚଳିତ ବର୍ଷ ପଶ୍ଚିମବଙ୍ଗରେ ପଞ୍ଚାୟତ ନିର୍ବାଚନ ହେବାକୁ ଥିବାବେଳେ ଏହା ପୂର୍ବରୁ ରାଜ୍ୟ ସରକାର ଏକ ବଡ ନିଷ୍ପତ୍ତି ନେଇଛନ୍ତି | ବାସ୍ତବରେ ପଶ୍ଚିମବଙ୍ଗ ସରକାର ଜାନୁଆରୀରୁ ଏପ୍ରିଲ ମଧ୍ୟରେ ମଧ୍ୟାହ୍ନ ଭୋଜନରେ ଚିକେନ୍ ଏବଂ ଋତୁକାଳୀନ ଫଳ ଅନ୍ତର୍ଭୁକ୍ତ କରିବା ପାଇଁ ଶିକ୍ଷା ବିଭାଗକୁ ନିର୍ଦ୍ଦେଶ ଦେଇଛନ୍ତି | ଏଥିପାଇଁ ପଶ୍ଚିମବଙ୍ଗ ସରକାର ୩୭୧ କୋଟି ଟଙ୍କା ଶିକ୍ଷା ବିଭାଗକୁ ପ୍ରଦାନ କରିଛନ୍ତି। ବିଜ୍ଞପ୍ତି ଅନୁଯାୟୀ, ବର୍ତ୍ତମାନ ପ୍ରଧାନମନ୍ତ୍ରୀ ପୋଷଣ ଯୋଜନାରେ ପିଲାମାନଙ୍କୁ ମଧ୍ୟାହ୍ନ ଭୋଜନରେ ଭାତ, ଆଳୁ, ସୋୟାବିନ୍ ଏବଂ ଅଣ୍ଡା ବ୍ୟତୀତ ଚାରି ମାସ ଧରି ପ୍ରତି ସପ୍ତାହରେ ଚିକେନ୍ ଏବଂ ଫଳ ଦିଆଯିବ। ତେବେ ଏପ୍ରିଲ ପରେ ଏହି ବ୍ୟବସ୍ଥା ଜାରି ହେବାର ସମ୍ଭାବନା ନାହିଁ ବୋଲି ବିଦ୍ୟାଳୟ ବିଭାଗର ଜଣେ ଅଧିକାରୀ କହିଛନ୍ତି।

ଜାନୁୟାରୀ ୩ ରେ ଜାରି କରାଯାଇଥିବା ବିଜ୍ଞପ୍ତି ଅନୁଯାୟୀ ପ୍ରତ୍ୟେକ ଛାତ୍ରଙ୍କୁ ଅତିରିକ୍ତ ପୁଷ୍ଟିକର ଖାଦ୍ୟ ଯୋଗାଇବା ପାଇଁ ସପ୍ତାହକୁ ୨୦ ଟଙ୍କା ଖର୍ଚ୍ଚ ହେବ ଏବଂ ଏହି ପ୍ରକ୍ରିୟା ୧୬ ସପ୍ତାହ ପର୍ଯ୍ୟନ୍ତ ଚାଲିବ ବୋଲି ଜଣାପଡିଛି । ପଶ୍ଚିମବଙ୍ଗରେ ୧.୧୬ କୋଟିରୁ ଅଧିକ ଛାତ୍ରଛାତ୍ରୀ ମଧ୍ୟାହ୍ନ ଭୋଜନ ଖାଉଥିବାବେଳେ ଏଥିପାଇଁ ଏହି ଖର୍ଚ୍ଚର ୬୦ ପ୍ରତିଶତ ରାଜ୍ୟ ସରକାର ବହନ କରୁଥିବାବେଳେ ୪୦ ପ୍ରତିଶତ କେନ୍ଦ୍ର ସରକାର ବହନ କରୁଛନ୍ତି। ତଥାପି ୩୭୧ କୋଟି ଟଙ୍କା ଅତିରିକ୍ତ ଆବଣ୍ଟନ ରାଜ୍ୟ ଦ୍ୱାରା କରାଯାଇଛି। ଚାରିମାସ ପରେ ରାଜ୍ୟ ସରକାର ଆଉ ଥରେ ରାଶି ଆବଣ୍ଟନ କରିବେ କି ବୋଲି ପଚରାଯିବାରୁ ସ୍କୁଲ ବିଭାଗର ଅଧିକାରୀ କହିଛନ୍ତି ଯେ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇ ନାହିଁ। ତେବେ ଏହି ପଦକ୍ଷେପ ଏକ ରାଜନୈତିକ ବିବାଦ ସୃଷ୍ଟି କରିଛି। ଚଳିତ ବର୍ଷ ପଞ୍ଚାୟତ ନିର୍ବାଚନ ଏବଂ ୨୦୨୪ ଲୋକସଭା ନିର୍ବାଚନ ପୂର୍ବରୁ କାହିଁକି ଏପରି ନିଷ୍ପତ୍ତି ନିଆଗଲା ବୋଲି ବିଜେପି ପ୍ରଶ୍ନ କରିଛି |

ସମ୍ବନ୍ଧିତ ଖବର