ମହିଳାଙ୍କ ସହମତିରେ ଛାଡ଼ପତ୍ର ପାଇଁ ପ୍ରଧାନ ବିଚାରପତିଙ୍କ ପରାମର୍ଶ

ନୂଆଦିଲ୍ଲୀ: ଏକ ବୈବାହିକ ବିବାଦ ମାମଲାର ଶୁଣାଣି କରି ପ୍ରଧାନ ବିଚାରପତି ଡିଵାଇ ଚନ୍ଦ୍ରଚୂଡ଼ ଏକ ଦମ୍ପତିଙ୍କୁ ପାରସ୍ପରିକ ସହମତିରେ ଛାଡ଼ପତ୍ର ପାଇଁ ରାଜି ହେବାକୁ ପରାମର୍ଶ ଦେଇ କହିଛନ୍ତି ଯେ ଲମ୍ବା ଆଇନଗତ ଲଢ଼େଇ କେବଳ ଓକିଲମାନଙ୍କ ପାଇଁ ଲାଭଦାୟକ ହେବ। ପ୍ରଧାନ ବିଚାରପତି ମହିଳାଙ୍କୁ ତାଙ୍କର ଶିକ୍ଷାଗତ ଯୋଗ୍ୟତା ପଚାରିଥିଲେ। ମହିଳା ଜଣକ ଉତ୍ତର ଦେଇଥିଲେ ଯେ ସେ ଆମେରିକାର ଏକ ବିଶ୍ୱବିଦ୍ୟାଳୟରୁ ଏମ୍‌ଟେକ୍ ଓ ଡକ୍ଟରେଟ୍ ଡିଗ୍ରି ହାସଲ କରିଛନ୍ତି। ପ୍ରଧାନ ବିଚାରପତି ପଚାରିଥିଲେ ଯେ ସେ କେଉଁଠି କାମ କରୁଛନ୍ତି। ମହିଳା ଜଣକ ଉତ୍ତର ଦେଇଥିଲେ ଯେ ସେ ଏହି ସମୟରେ କେଉଁଠି କାମ କରୁନାହାନ୍ତି। ଏହାପରେ ପ୍ରଧାନ ବିଚାରପତି କହିଥିଲେ, ତୁମେ ଏତେ ଉଚ୍ଚଶିକ୍ଷିତ କିନ୍ତୁ ତୁମର ଚାକିରି ନାହିଁ। ତୁମେ ନିଜ ପାଇଁ ଚାକିରି ଖୋଜିବା ଦରକାର।

ପାରସ୍ପରିକ ସହମତିରେ ଛାଡ଼ପତ୍ରର ବିକଳ୍ପ ଉପରେ ବିଚାର କରିବାକୁ ପରାମର୍ଶ ଦେଇ ପ୍ରଧାନ ବିଚାରପତି କହିଛନ୍ତି, ଆପଣ ୧୦ ବର୍ଷ ଜୀବନ ମାମଲା ଲଢ଼େଇରେ ବିତାଇପାରିବେ। ଏଥିରେ କେବଳ ଓକିଲମାନେ ଖୁସି ହେବେ। ଆପଣ ଦୁହେଁ କାହିଁକି ବାସ୍ତବତାକୁ ବୁଝି ପାରସ୍ପରିକ ସହମତିରେ ଛାଡ଼ପତ୍ର ପାଇଁ ରାଜି ହେଉ ନାହାନ୍ତି? ଯଦି ଆପଣ ପାରସ୍ପରିକ ସହମତିରେ ଛାଡ଼ପତ୍ର ପାଇଁ ରାଜି ହୁଅନ୍ତି, ତେବେ ଆମେ ମାମଲାଗୁଡ଼ିକୁ ବନ୍ଦ କରିପାରିବୁ। ବର୍ତ୍ତମାନ ଯଦି ଆପଣ ଅଶିକ୍ଷିତ ଓ ନିରକ୍ଷର ହୋଇଥାନ୍ତେ, ତେବେ କଥା ଭିନ୍ନ ହୋଇଥାନ୍ତା। କିନ୍ତୁ ଆପଣ ଯୋଗ୍ୟ ଓ ଚାକିରି ପାଇପାରିବେ।