ଭୁଟାନ ସୀମାବର୍ତ୍ତୀ ଅଞ୍ଚଳରେ ଗାଁ ପରେ ଗାଁ ବସାଇ ଚାଲିଛି ଚୀନ, ସାଟେଲାଇଟ୍ ଚିତ୍ରରୁ ୬ଟି ଗାଁ ଚିହ୍ନଟ
ନୂଆଦିଲ୍ଲୀ : ଭୁଟାନ ଅଞ୍ଚଳରେ ଚୀନର ନିର୍ମାଣ କାର୍ଯ୍ୟ ଜାରି ରହିଛି । ଯେଉଁ ସବୁ ଅଞ୍ଚଳକୁ ନେଇ ଚୀନ ଓ ଭୁଟାନ ମଧ୍ୟରେ ମତଭେଦ ରହିଛି, ସେସବୁ ଅଞ୍ଚଳରେ ଚୀନ ନୂଆ ନୂଆ ଗ୍ରାମ ନିର୍ମାଣ କରିଚାଲିଛି ବୋଲି ସର୍ବଶେଷ ସାଟେଲାଇଟ୍ ଫଟୋରୁ ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଏକ ଅନ୍ତର୍ଜାତୀୟ ସମ୍ବାଦ ସରବରାହ ଏଜେନ୍ସିର ରିପୋର୍ଟ ଅନୁସାରେ ଭୁଟାନ ଅଞ୍ଚଳରେ ଚୀନ ପକ୍ଷରୁ ନିର୍ମାଣ କରାଯାଉଥିବା ଗ୍ରାମ ସଂଖ୍ୟା ୬ରେ ପହଞ୍ଚିଛି । ଗତ ନଭେମ୍ବର ମାସରେ ଉତ୍ତୋଳିତ ସାଟେଲାଇଟ୍ ଫଟୋ ଅନୁସାରେ ଏହି ଗ୍ରାମ ସଂଖ୍ୟା ୪ ଥିଲା । ଅର୍ଥାତ ଏହି ଦୁଇ ମାସରେ ଚୀନ ଆଉ ଦୁଇଟି ନୂଆ ଗ୍ରାମ ନିର୍ମାଣ କରିଛି । ସିପେଲା ସ୍ପେଶ୍ ପକ୍ଷରୁ ଉତ୍ତୋଳନ କରାଯାଇଥିବା ନୂଆ ସାଟେଲାଇଟ୍ ଚିତ୍ର ଅନୁସାରେ ବିବାଦୀୟ ସ୍ଥାନରେ ଚୀନ ପକ୍ଷରୁ ପ୍ରାୟ ୨୦୦ରୁ ଅଧିକ ଢାଞ୍ଚାର ନିର୍ମାଣ କାର୍ଯ୍ୟ କରାଯାଉଛି । ଏପରିକି କେତେକ ସ୍ଥାନରେ ଦୁଇ ମହଲା ଘର ବି ନିର୍ମାଣ କରାଯାଉଥିବା ଦେଖାଯାଉଛି । ଚିନ୍ତାଜନକ ବିଷୟ ହେଉଛି ଏସବୁ ଅଞ୍ଚଳଗୁଡ଼ିକରେ ଲୋକ ରହୁନଥିବାବେଳେ ଚୀନ ଗ୍ରାମ ପରେ ଗ୍ରାମ ବସାଇଚାଲିଛି । ଅନ୍ୟ ଅଞ୍ଚଳରୁ ଲୋକମାନଙ୍କୁ ଆଣି ଏଠାରେ ଥଇଥାନ କରିବାକୁ ଚୀନ ଯୋଜନା କରୁଥିବା ସଂଦେହ କରାଯାଉଛି ।
ତେବେ ଭାରତ ପାଇଁ ଚିନ୍ତାଜନକ ବିଷୟ ହେଉଛି ଏସବୁ ଗ୍ରାମ ଗୁଡ଼ିକ ଭାରତ-ଭୁଟାନ-ଚୀନ ଟ୍ରାଇ-ଜଙ୍କସନ ବା ତ୍ରିଛକ ଅଞ୍ଚଳରେ ଅବସ୍ଥିତ । ଏହା ଭାରତର ସଂବେଦନଶୀଳ ଚିକେନ ନେକ ଅଞ୍ଚଳ ନିକଟରେ ଥିବାରୁ ଆଗକୁ ଭାରତର ସୁରକ୍ଷା ପାଇଁ ଆହ୍ବାନ ସୃଷ୍ଟି କରିପାରେ ବୋଲି ସଂଦେହ କରାଯାଉଛି ।