ଚନ୍ଦ୍ରଗ୍ରହଣ ବେଳେ ନରବଳି ଦିଆଯାଇଥିଲା କି ? ପୁଲିସର ତଦନ୍ତ ଜାରି
ହାଇଦ୍ରାବାଦ: ଗତ ବୁଧବାର ଦିନ ହୋଇଥିବା ବିରଳ ଚନ୍ଦ୍ର ଗ୍ରହଣରେ କଣ ହାଇଦ୍ରାବାଦରେ ନରବଳି ଦିଆଯାଇଥିଲା ? ଏପରି ଏକ ମାମଲାକୁ ନେଇ ହାଇଦ୍ରାବାଦ ପୁଲିସ୍ ତଦନ୍ତ ଆରମ୍ଭ କରିଛି ।
Sambad is now on WhatsApp
Join and get latest news updates delivered to you via WhatsApp
ହାଇଦ୍ରାବାଦର ଚିଲୁକାନଗରଠାରେ ରହୁଥିବା ବାଳାଲକ୍ଷ୍ମୀ ଗୁରୁବାରଦିନ ସକାଳେ ଉଠିବାପରେ ନିଜ ଘର ଛାତ ଉପରେ ଏକ ଶିଶୁ ମୁଣ୍ଡ ପଡ଼ିଥିବା ଦେଖିବାକୁ ପାଇଥିଲେ । ଆଖପାଖରେ ରକ୍ତ ପଡିନଥିଲା ଓ ଶିଶୁମୁଣ୍ଡରେ ସିନ୍ଦୁର ଲାଗିଥିଲା । ସେ ତୁରନ୍ତ ପୁଲିସ୍କୁ ଖବର ଦେବାପରେ ଆଖପାଖ ଲୋକ ଜମାହୋଇ ଯାଇଥିଲେ ଓ ପୁଲିସ ମଧ୍ୟ ଆସିଯାଇଥିଲା । ଏନେଇ ତଦନ୍ତ ଆରମ୍ଭ କରି ପୁଲିସ୍ ଉକ୍ତ ମହିଳାଙ୍କ ଜ୍ୱାଇଁ ରାଜଶେଖର ଓ ଦୁଇଜଣ ପଡ଼ୋଶୀ ନରହରି ଓ ତା ପୁଅ ରଂଜିତକୁ ପଚରାଉଚୁରା ପାଇଁ ଅଟକ ରଖିଛି । ପୁଲିସ କୁକୁର ନରହରି ଘରଆଡକୁ ଇଂଗିତ କରିବାରୁ ତା ଉପରେ ସଂଦେହ ଦୃଢୀଭୂତ ହୋଇଛି । ସ୍ଥାନୀୟ ଲୋକମାନେ ମଧ୍ୟ ନରହରି ଓ ରଂଜିତ ଅନେକ ସମୟରେ ତନ୍ତ୍ର ପୂଜା କରୁଥିବା ପୁଲିସକୁ ଜଣାଇଛନ୍ତି ।
ଏଥରର ଚନ୍ଦ୍ରଗ୍ରହଣ ଏକ ବିରଳ ସଂଯୋଗ ଥିଲା । କେବଳ ବୈଜ୍ଞାନିକ ଦୃଷ୍ଟିକୋଣରୁ ନୁହେଁ ଆହୁରି ଅନେକ ଦୃଷ୍ଟିକୋଣରୁ ଏହା ଥିଲା ଏକ ଦୁର୍ଲ୍ଲଭ ସଂଯୋଗ । ତନ୍ତ୍ରପୂଜା ପାଇଁ ଏହାକୁ ଏକ ଦୁର୍ଲ୍ଲଭ ଅବସର ବୋଲି କେତେକ ତାନ୍ତ୍ରିକ ମନେ କରନ୍ତି । ଏହି ଅନ୍ଧବିଶ୍ୱାସର ବଶବର୍ତ୍ତି ହୋଇ କେତେକ ଉପରୋକ୍ତ କାଣ୍ଡ ଘଟାଇଥାଇପାରନ୍ତି ବୋଲି ପୁଲିସ ସଂଦେହ କରୁଛି ।