ଶେଷରେ ମାନିଲା ଚୀନ୍; ଗଲଓ୍ଵାନରେ ବି ଆମର ସୈନ୍ୟ ହୋଇଛନ୍ତି ନିହତ: ହେଲେ ସଂଖ୍ୟା କମ୍
ବେଜିଂ : ଗତ ଜୁନ ୧୫ ରାତିରେ ଲଦାଖର ଗଲଓ୍ଵାନ ଘାଟିରେ ଭାରତ ଓ ଚୀନ ସୈନ୍ୟଙ୍କ ମଧ୍ୟରେ ହୋଇଥିବା ସଂଘର୍ଷରେ ଚୀନ ସେନାର କିଛି ଯବାନ ମୃତ୍ୟୁବରଣ କରିଥିବା ଚୀନ ସରକାର ସ୍ୱୀକାର କରିଛନ୍ତି । ଆଜି ଚୀନ ବୈଦେଶିକ ମନ୍ତ୍ରାଳୟର ଏକ ସାମ୍ବାଦିକ ସମ୍ମିଳନୀ ଅବସରରେ ଚୀନ ପକ୍ଷରୁ ଏହା ସ୍ୱୀକାର କରାଯିବା ସହ ମୃତକଙ୍କ ସଂଖ୍ୟା ସେମିତି କିଛି ଅଧିକ ନୁହେଁ ବୋଲି କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଚୀନ ପକ୍ଷରୁ ବିଭିନ୍ନ ଦେଶର କୂଟନୀତିଜ୍ଞମାନଙ୍କୁ ଡକାଇ ଏହି ସୂଚନା ଦିଆଯିବା ସହ କୁହାଯାଇଛି ଯେ ଏହି ଉତ୍ତେଜନା ବଢିବା ପାଇଁ ଭାରତ ଦାୟୀ । କାରଣ ଭାରତୀୟ ସୈନ୍ୟ ପୂର୍ବ ବୁଝାମଣାର ଉଲ୍ଲଙ୍ଘନ କରି ଚୀନ ସୈନ୍ୟଙ୍କ ଉପରେ ଆକ୍ରମଣ କରିଥିଲେ । ଚୀନ ସରକାରଙ୍କ ସୀମା ଓ ସମୁଦ୍ର ବ୍ୟାପାର ମହାନିର୍ଦ୍ଦେଶକ ହେ ସିଆଙ୍ଗକି କହିଛନ୍ତି ଯେ ଏହି ସଂଘର୍ଷରେ ଚୀନର କମ ଯବାନ ନିହତ ହୋଇଛନ୍ତି । ତେବେ ଉତ୍ତେଜନା ବଢିବା ଆଶଙ୍କାରେ ପ୍ରକୃତ ସଂଖ୍ୟାକୁ ପ୍ରକାଶ କରାଯାଉନାହିଁ ।
ଗତକାଲି ଚୀନ ବୈଦେଶିକ ମନ୍ତ୍ରାଳୟର ମୁଖପାତ୍ର ଝାଓ ଲିଜାନ କହିଛନ୍ତି ଯେ ଏହି ସଂଘର୍ଷରେ ୪୦ ଚୀନ ସୈନ୍ୟ ମରିଥିବା କଥା ଏକ ମିଛ ଖବର । ସୂଚନାଯୋଗ୍ୟ ଯେ ଗତ ୧୫ ତାରିଖ ରାତିରେ ଗଲଓ୍ଵାନ ଘାଟିରେ ଭାରତ ଓ ଚୀନ ସୈନ୍ୟଙ୍କ ମଧ୍ୟରେ ହୋଇଥିବା ରକ୍ତାକ୍ତ ସଂଘର୍ଷ ଯୋଗୁଁ ଭାରତର ୨୦ ସୈନ୍ୟ ସହିଦ ହୋଇଥିଲେ । ତେବେ ଚୀନ ପକ୍ଷର ସୈନ୍ୟ ନିହତ ହୋଇଥିଲେ ମଧ୍ୟ ଚୀନ ଏପର୍ଯ୍ୟନ୍ତ ସେହି ତଥ୍ୟ ପ୍ରକାଶ କରୁନାହିଁ ।