ଭାରତ-ଚୀନ ସେନା ସ୍ତରୀୟ କଥାବାର୍ତ୍ତାର ଦିନକ ପୂର୍ବରୁ ନିଜର କମାଣ୍ଡର ବଦଳାଇଲା ଚୀନ
ନୂଆଦିଲ୍ଲୀ : ସୀମାରେ ଚାଲିଥିବା ବିବାଦୀୟ ପରିସ୍ଥିତିର ସମାଧାନ ଲାଗି ଶନିବାରଦିନ ଭାରତ ଓ ଚୀନ ମଧ୍ୟରେ ସେନା ଅଧିକାରୀସ୍ତରୀୟ ବୈଠକ ହେବାକୁ ଯାଉଥିବାବେଳେ ତାହାର ଦିନକ ପୂର୍ବରୁ ଚୀନ ନିଜର ପଶ୍ଚିମ ଥିଏଟର କମାଣ୍ଡ ପାଇଁ ନୂଆ ଆର୍ମି କମାଣ୍ଡର ନିଯୁକ୍ତ କରିଛି । ଚୀନର ପିପୁଲସ ଲିବରେସନ ଆର୍ମିର ୱେଷ୍ଟର୍ଣ୍ଣ ଥିଏଟର କମାଣ୍ଡ ୱେବସାଇଟରେ ଘୋଷଣା କରାଯାଇଛି ଯେ ଲେପ୍ଟନାଣ୍ଟ ଜେନେରାଲ ସୁ କିଲିଂ ଙ୍କୁ ନୂଆ କମାଣ୍ଡର ନିଯୁକ୍ତ କରାଯାଇଛି । ଏହା ପୂର୍ବରୁ ସେ ଚୀନର ଇଷ୍ଟର୍ଣ୍ଣ କମାଣ୍ଡର ଦାୟିତ୍ୱରେ ଥିଲେ ।
Sambad is now on WhatsApp
Join and get latest news updates delivered to you via WhatsApp
ପିପୁଲସ ଲିବରେସନ ଆର୍ମିର ୱେଷ୍ଟର୍ଣ୍ଣ ଥିଏଟର କମାଣ୍ଡ ଭାରତକୁ ଲାଗିଥିବା ୩୪୮୮ କିଲୋମିଟର ଲମ୍ବ ସୀମାର ସୁରକ୍ଷା ଦାୟିତ୍ୱରେ ରହିଛି । ଏହି ସେନା ଅଧିନରେ ରହିଛି ସେନା, ବାୟୁସେନା ଓ ରକେଟ ଫୋର୍ସ । ଭାରତ-ଚୀନ ସେନା କମାଣ୍ଡର ସ୍ତରୀୟ ଗୁରୁତ୍ୱପୂର୍ଣ୍ଣ ବୈଠକର ଦିନକ ପୂର୍ବରୁ ନୂଆ କମାଣ୍ଡରଙ୍କ ନିଯୁକ୍ତିକୁ ବିଶେଷଜ୍ଞମାନେ ବେଶ ଗୁରୁତ୍ୱର ସହ ଦେଖୁଛନ୍ତି ।
ଶନିବାରଦିନ ହେବାକୁ ଥିବା ଲେପ୍ଟନାଣ୍ଟ ଜେନେରାଲ ସ୍ତରୀୟ ବୈଠକଟି ଲଦାଖ ସୀମାକୁ ଲାଗିଥିବା ଚୀନର ମାଲଡୋଠାରେ ଅନୁଷ୍ଠିତ ହେବ । ଭାରତ ପକ୍ଷରୁ ୧୪-କର୍ପସ କମାଣ୍ଡର ଲେପ୍ଟନାଣ୍ଟ ଜେନେରାଲ ହରିନ୍ଦର ସିଂ ଏହି ଆଲୋଚନାରେ ଅଂଶଗ୍ରହଣ କରିବେ । ଚୀନ ତରଫରୁ ଲେପ୍ଟନାଣ୍ଟ ଜେନେରାଲ ସୁ କିଲିଂ ଏଥିରେ ଯୋଗ ଦେବେ ।