ପାକ ଅଧିକୃତ କାଶ୍ମୀରରେ ପହଞ୍ଚିଲେ ଚୀନ ସୈନିକ

ନୂଆଦିଲ୍ଲୀ: ପାକ ଅଧିକୃତ କାଶ୍ମୀରରେ ଆଜି ଚୀନ୍ ସୈନିକ ପଇଁତରା ମାରୁଥିବାର ଦେଖିବାକୁ ମିଳିଛି | ଚୀନ ଏବଂ ପାକିସ୍ତାନ ମଧ୍ୟରେ ବନ୍ଧୁତ୍ୱ ଏତେ ବଢିଯାଇଛି ଯେ ବର୍ତ୍ତମାନ ଚୀନ୍ ସୈନିକମାନେ ପାକିସ୍ତାନ ଅଧିକୃତ କାଶ୍ମୀରରେ ବୁଲୁଛନ୍ତି। ଖବର ଅନୁଯାୟୀ, ଚୀନ୍ ସୈନିକମାନେ ପାକିସ୍ତାନ ଅଧିକୃତ କାଶ୍ମୀରର ସୀମା ପୋଷ୍ଟ ଏବଂ ଗ୍ରାମଗୁଡ଼ିକୁ ଯାଞ୍ଚ କରୁଛନ୍ତି। କାଶ୍ମୀର ଅବଜର୍ଭରର ଏକ ରିପୋର୍ଟରେ କୁହାଯାଇଛି ଯେ ଏକ ମାସ ପୂର୍ବରୁ ପାକିସ୍ତାନ ଅଧିକୃତ କାଶ୍ମୀରର କେଲ, ଜୁରା ଏବଂ ଲିପା ସେକ୍ଟରରେ ପ୍ରାୟ ୬୦ ଜଣ ସୈନିକ ପହଞ୍ଚିଛନ୍ତି ।

ରିପୋର୍ଟ ଅନୁଯାୟୀ, ପାକିସ୍ତାନୀ ସୈନିକ ଏବଂ ପାକିସ୍ତାନୀ ଗୁପ୍ତଚର ଏଜେନ୍ସି ଆଇଏସଆଇର ଅଧିକାରୀଙ୍କ ସହ ଚୀନ୍ ସୈନିକମାନେ ୫ରୁ ୬ଟି ଦଳରେ ବିଭକ୍ତ ହୋଇଛନ୍ତି। ସେମାନେ ପିଓକେର ଗାଁଗୁଡିକୁ ଯାଇ ତଥ୍ୟ ସଂଗ୍ରହ କରିଛନ୍ତି | ଚୀନ୍ ସୈନିକମାନେ ପାକିସ୍ତାନୀ ସେନା ପୋଷ୍ଟ ଏବଂ କାଶ୍ମୀର ଉପତ୍ୟକାକୁ ପହଞ୍ଚିବା ପାଇଁ ଆତଙ୍କବାଦୀଙ୍କ ଦ୍ୱାରା ବ୍ୟବହୃତ ଅନୁପ୍ରବେଶ ମାର୍ଗ ଉପରେ ମଧ୍ୟ ସର୍ଭେ କରିଛନ୍ତି।

ରିପୋର୍ଟ ଅନୁଯାୟୀ, ପାକିସ୍ତାନ ଅଧିକୃତ କାଶ୍ମୀରର ଗ୍ରାମଗୁଡିକ ପରିଦର୍ଶନ କରୁଥିବା ଚୀନ୍ ସୈନିକମାନେ ଏହି ଗ୍ରାମଗୁଡ଼ିକୁ ଆଦର୍ଶ ଗ୍ରାମ କରିବା ପାଇଁ ସଂକେତ ଦେଇଛନ୍ତି, ଯାହାକୁ ଉଭୟ ସାଧାରଣ ନାଗରିକ ଏବଂ ସୈନ୍ୟମାନେ ବ୍ୟବହାର କରିପାରିବେ। ତେବେ ପ୍ରତିରକ୍ଷା ବିଶେଷଜ୍ଞ କହିଛନ୍ତି ଯେ ଭାରତକୁ ଚାପରେ ପକାଇବାକୁ ଓ ଚୀନ୍-ପାକିସ୍ତାନ ଅର୍ଥନୈତିକ କରିଡର ପାଇଁ ଚୀନ ସୈନିକ ପଇଁତରା ମାରୁଛନ୍ତି |