ବ୍ଲାକ୍ଆଉଟ୍ ବୋମା ପ୍ରଦର୍ଶନ କଲା ଚୀନ୍‌: ଶତ୍ରୁର ଶକ୍ତିକେନ୍ଦ୍ରଗୁଡ଼ିକୁ ଧ୍ୱଂସ କରିପାରେ

ବେଜିଂ: ଚୀନ୍ ଗୁରୁବାର (ଜୁନ୍ ୨୬) ଏକ ନୂଆ ପ୍ରକାରର ଗ୍ରାଫାଇଟ୍ ବୋମା ବା ବ୍ଲାକ୍ଆଉଟ୍ ବୋମା ପ୍ରଦର୍ଶନ କରିଛି। ଦାବି କରାଯାଇଛି ଯେ ଏହା ଶତ୍ରୁର ଶକ୍ତିକେନ୍ଦ୍ରଗୁଡ଼ିକୁ ଧ୍ୱଂସ କରିପାରେ ଏବଂ ଟାର୍ଗେଟ୍ ଅଞ୍ଚଳକୁ ସମ୍ପୂର୍ଣ୍ଣ ବିଜୁଳିବିହୀନ କରିଦେଇପାରେ। ଯଦିଓ ଚୀନ୍‌ ସେଣ୍ଟ୍ରାଲ ଟେଲିଭିଜନ (ସିସିଟିଭି) ଏହି ଅସ୍ତ୍ରକୁ ଗ୍ରାଫାଇଟ୍ ବୋମା ବୋଲି ସ୍ପଷ୍ଟ ଭାବେ ଚିହ୍ନଟ କରିନାହିଁ, କିନ୍ତୁ ଏଥିରେ ଗ୍ରାଫାଇଟ୍ ଯୁଦ୍ଧାସ୍ତ୍ର ସହ ସମାନ ବୈଶିଷ୍ଟ୍ୟ ଦେଖିବାକୁ ମିଳିଥିଲା। ଦେଶର ସରକାରୀ ପ୍ରସାରଣ ସଂସ୍ଥା ପକ୍ଷରୁ ଏକ ଭିଡିଓ ପ୍ରକାଶ ପାଇଥିଲା, ଯେଉଁଥିରେ ଏହି ବୋମାକୁ ଦର୍ଶାଯାଇଥିଲା। ଭିଡ଼ିଓରେ ଦେଖାଯାଉଥିବା କାନିଷ୍ଟରଗୁଡ଼ିକ ମଝି ଆକାଶରେ ବିସ୍ଫୋରିତ ହେବା ପୂର୍ବରୁ ତଳେ ପଡ଼ି ବାଉନ୍ସ ହୋଇଥିଲା। 

ସେଗୁଡ଼ିକ ରାସାୟନିକ ଭାବରେ ପରିଶୋଧିତ କାର୍ବନ ଫିଲାମେଣ୍ଟଗୁଡିକୁ ବିସ୍ତାର କରିଥିଲା ଯାହା ହାଇ-ଭୋଲ୍ଟେଜ୍ ଶକ୍ତି ଭିତ୍ତିଭୂମିକୁ ଟାର୍ଗେଟ୍ କରିବା ପାଇଁ ଡିଜାଇନ୍ କରାଯାଇଛି। ସୋସିଆଲ ମିଡିଆରେ ଏହି ଭିଡିଓ ଏବେ ଭାଇରାଲ ହେବାରେ ଲାଗିଛି। ସିସିଟିଭି ପକ୍ଷରୁ କୁହାଯାଇଛି ଯେ ଏହି ବ୍ଲାକ୍‌ଆଉଟ୍ ବୋମାର ଉଦ୍ଦେଶ୍ୟ ଶତ୍ରୁ କମାଣ୍ଡ ଓ ନିୟନ୍ତ୍ରଣ ପ୍ରଣାଳୀକୁ ବ୍ୟାହତ କରିବା ଏବଂ ଅତି କମ୍‌ରେ ୧୦,୦୦୦ ବର୍ଗମିଟର ଅଞ୍ଚଳରେ ବ୍ୟାପକ ବିଜୁଳି ବିଚ୍ଛିନ୍ନତା ସୃଷ୍ଟି କରିବା। ତେବେ ଏହି ଅସ୍ତ୍ରଶସ୍ତ୍ର କିମ୍ବା ଏହାର ସ୍ଥିତି ସମ୍ପର୍କରେ ଚ୍ୟାନେଲ ଅଧିକ କିଛି ସ୍ପଷ୍ଟ କରିନାହିଁ। ସିସିଟିଭି ଏହି ବୋମାକୁ ଏକ ରହସ୍ୟମୟ ପ୍ରକାରର ଘରୋଇ କ୍ଷେପଣାସ୍ତ୍ର ବୋଲି ଦର୍ଶାଇଛି। ସେୟାର ହୋଇଥିବା ଭିଡିଓ ଅନୁଯାୟୀ, ଏହି ଅସ୍ତ୍ରଶସ୍ତ୍ରର ରେଞ୍ଜ ୨୯୦ କିଲୋମିଟର ଏବଂ ଓଜନ ୪୯୦ କିଲୋଗ୍ରାମ୍। ଏହି ସମସ୍ତ ବୈଶିଷ୍ଟ୍ୟ ବୋମାକୁ ସାମରିକ ସବ୍‌ଷ୍ଟେସନ ଓ ଅନ୍ୟାନ୍ୟ ବୈଦ୍ୟୁତିକ ଭିତ୍ତିଭୂମି ଉପରେ ଆକ୍ରମଣ ପାଇଁ ଉପଯୁକ୍ତ କରିଥାଏ। ଏହି ଭିଡିଓ ପୋଷ୍ଟ ହେବା ପରେ ସୋସିଆଲ ମିଡିଆରେ ଅନେକେ ଏହି ବୋମା ତାଇୱାନର ପାୱାର ଗ୍ରିଡ୍ ପାଇଁ ବିପଦ ବୋଲି କହିଥିଲେ। ଚୀନ୍‌ର ବ୍ଲାକଆଉଟ୍ ବୋମା ଏବେ ଚର୍ଚ୍ଚାର ବିଷୟ ପାଲଟିଛି।