ନୂଆଦିଲ୍ଲୀ: ମାଳଦ୍ୱୀପ ସଂକଟକୁ ନେଇ ଭାରତ ସହ ସଂପର୍କକୁ ଖରାପ ହେବାକୁ ଦିଆଯିବ ନାହିଁ । ସେଠାକାର ସମସ୍ୟାର ସମାଧାନ କିପରି ବାହାରିବ ସେ ନେଇ ନୂଆଦିଲ୍ଲୀ ସହ ଆଲୋଚନା କରାଯାଉଛି ବୋଲି ଚୀନ କହିଛି ।
Sambad is now on WhatsApp
Join and get latest news updates delivered to you via WhatsApp
ଭାରତ ମହାସାଗରୀୟ ଦ୍ୱୀପ ରାଷ୍ଟ୍ର ମାଳଦ୍ୱୀପ ପରେ ଏବେ ଜରୁରୀପରିସ୍ଥିତି ଜାରି ହୋଇଥିବାବେଳେ ସେଠାକାର ବିରୋଧୀ ଦଲ ଭାରତର ସାମରିକ ହସ୍ତକ୍ଷେପ ଚାହୁଁଛନ୍ତି । କିନ୍ତୁ ଚୀନ ଏହାକୁ ବିରୋଧ କରୁଛି । ମାଳଦ୍ୱୀପରେ ଦେଖାଦେଇଥିବା ସଂକଟକୁ ଉକ୍ତ ଦେଶବାସୀ ନିଜେ ସମାଧାନ କରିବା ଆବଶ୍ୟକ,କୌଣସି ବାହାର ଦେଶ ଏଥିରେ ମୁଣ୍ଡପୁରାଇବା ଉଚିତ ନୁହେଁ ବୋଲି ବେଜିଂ କହିଆସୁଛି । ମାଳଦ୍ୱୀପ ସୁପ୍ରିମକୋର୍ଟ ରାୟକୁ ଭାରତ, ବ୍ରିଟେନ ଓ ଆମେରିକା ସମର୍ଥନ କରୁଥିବାବେଳେ ରାଷ୍ଟ୍ରପତି ଅବଦୁଲ୍ଲା ୟାମିନଙ୍କୁ ସମର୍ଥନ କରିଛି ଚୀନ । ମୁଖ୍ୟ କଥା ହେଉଛି ଚୀନ ମାଳଦ୍ୱୀପ ସରକାରଙ୍କୁ ହାତ କରି ଭାରତ ମହାସାଗରୀୟ ଅଂଚଳରେ ନିଜର ପ୍ରଭାବ ବୃଦ୍ଧି ଓ ଭାରତର ପ୍ରଭାବ କମାଇବାକୁ ଉଦ୍ୟମ କରୁଛି । ଏହା ଫଳରେ ଏହି ପ୍ରସଙ୍ଗରେ ଭାରତ-ଚୀନ ମୁହାଁମୁହିଁ ହୋଇଛନ୍ତି । କିନ୍ତୁ ମାଳଦ୍ୱୀପକୁ ଆଳକରି ପୁଣି ଥରେ ଚୀନ ଭାରତ ସହ ବିବାଦରେ ଫସିବାକୁ ଚାହୁଁନାହିଁ ବୋଲି ଚୀନ ବୈଦେଶିକ ମନ୍ତ୍ରାଳୟର ଜଣେ ଅଧିକାରୀ କହିଛନ୍ତି ।
ଡୋକଲାମ ଓ ପାକିସ୍ତାନି ଆତଙ୍କବାଦୀ ମାସୁଦ ଆଜାର ପ୍ରସଙ୍ଗରେ ଭାରତ ଓ ଚୀନ ମଧ୍ୟରେ ସମ୍ପର୍କ ଗତ କିଛି ବର୍ଷ ଧରି ଖରାପ ଅବସ୍ଥା ରହିଛି । ମାଳଦ୍ୱୀପ ପ୍ରସଙ୍ଗରେ ଏହି ସଂପର୍କକୁ ଆହୁରି ଖରାପ କରିବାକୁ ଚାହୁଁନାହିଁ ଚୀନ । କିନ୍ତୁ ବିଶେଷଜ୍ଞମାନଙ୍କ ମତରେ ମାଳଦ୍ୱୀପ ପ୍ରସଙ୍ଗରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତୀୟ ପ୍ରଧାନମନ୍ତ୍ରୀ ମୋଦିଙ୍କ ସହ କଥାହେବା ପରେ ଚୀନ ଟିକିଏ ନରମ ପଡିଛି । ତେବେ ଅନ୍ତର୍ଜାତୀୟ ସମୁଦାୟ ମାଳଦ୍ୱୀପର ସାର୍ବଭୌମତ୍ୱ ପ୍ରତି ସମ୍ମାନ ଜଣାଇ ତାହାକୁ ସହାୟତା କରିବା ଆବଶ୍ୟକ ବୋଲି ଚୀନ ସରକାର କହିଛନ୍ତି ।