ଭାରତ ପାଇଁ ସତର୍କଘଣ୍ଟି ! ପାକିସ୍ତାନକୁ ଅତ୍ୟାଧୁନିକ ଯୁଦ୍ଧ ଜାହାଜ ଯୋଗାଇଲା ଚୀନ
ବେଜିଂ : ପାକିସ୍ତାନକୁ ବିଭିନ୍ନ ଅତ୍ୟାଧୁନିକ ଅସ୍ତ୍ରଶସ୍ତ୍ରରେ ସଜ୍ଜିତ କରିବାରେ ଲାଗିଛି ଚୀନ । ଏହା ଫଳରେ ଭାରତ ପାଇଁ ଦିନକୁ ଦିନ ଅଧିକ ବିପଦ ସୃଷ୍ଟି ହେବାରେ ଲାଗିଛି । ନିକଟରେ ଚୀନ ପାକିସ୍ତାନକୁ ଏକ ଅତ୍ୟାଧୁନିକ ବୃହତ ଯୁଦ୍ଧ ଜାହାଜ ପ୍ରଦାନ କରିଛି । ଏହି ଯୁଦ୍ଧ ଜାହାଜ ପାକିସ୍ତାନ ନୌସେନାର ଶକ୍ତିବୃଦ୍ଧି କରିବାର ସମ୍ଭାବନା ରହଛି ।
Sambad is now on WhatsApp
Join and get latest news updates delivered to you via WhatsApp
ଚୀନର ସରକାରୀ ନିୟନ୍ତ୍ରିତ ଗଣମାଧ୍ୟମ ଗ୍ଲୋବାଲ ଟାଇମ୍ସର ରିପୋର୍ଟ ଅନୁସାରେ ଏହି ଯୁଦ୍ଧ ଜାହାଜ ଚାଇନା ଷ୍ଟେଟ୍ ସିପବିଲଡିଂ କର୍ପୋରେସନ ପକ୍ଷରୁ ନିର୍ମାଣ କରାଯାଇଛି । ଗତ ସୋମବାରଦିନ ସାଂଘାଇଠାରେ ଅନୁଷ୍ଠିତ ଏକ ସମାରୋହରେ ଏହି ଜାହାଜର ଜଳାବତରଣ କରାଯାଇଥିଲା । ଏହି ଟାଇପ୍ ୦୫୪ଏ/ପି ଫ୍ରିଗେଟର ନାମ ରଖାଯାଇଛି ପିଏନଏସ ଟୁଘରିଲ । ଏହି ଯୁଦ୍ଧ ଜାହାଜ ଆକାଶକୁ ନିକ୍ଷେପ କରିହେଉଥିବା କ୍ଷେପଣାସ୍ତ୍ର ଓ ସମୁଦ୍ର ତଳେ ନିକ୍ଷେପ କରିହେଉଥିବା କ୍ଷେପଣାସ୍ତ୍ର ଓ ଟର୍ପେଡୋରେ ସଜ୍ଜିତ ରହିଛି । ଏଥିରେ ଅତ୍ୟାଧୁନିକ ରାଡାର ଓ ଗୁପ୍ତଚର ଉପକରଣ ଲାଗିଛି । ଏଥିରେ ମଧ୍ୟ ଇଲେକ୍ଟ୍ରୋନିକ ଓ୍ବାରଫେୟାର ପାଇଁ ଉପକରଣ ଲାଗିଛି । ଏହି ଯୁଦ୍ଧ ଜାହାଜ ଏକ ଜଟିଳ ଯୁଦ୍ଧ ପରିସ୍ଥିତିର ସଫଳ ମୁକାବିଲା କରିପାରିବ ବୋଲି ଗ୍ଲୋବାଲ ଟାଇମ୍ସ କହିଛି । କୌଣସି ବିଦେଶୀ ରାଷ୍ଟ୍ରକୁ ଏତେ ବୃହତ ଯୁଦ୍ଧ ଜାହାଜ ରପ୍ତାନି କରିବାରେ ଏହା ଚୀନ ପାଇଁ ପ୍ରଥମ ଘଟଣା । ଏହି ଯୁଦ୍ଧ ଜାହାଜ ଯୋଗାଣ ପାକିସ୍ତାନ-ଚୀନ ବନ୍ଧୁତ୍ବର ଏକ ବଡ଼ ଉଦାହରଣ ବୋଲି ଗ୍ଲୋବାଲ ଟାଇମ୍ସ କହିଛି ।