ବେଜିଂ: ଅନେକ ଅନ୍ତର୍ଜାତୀୟ ପ୍ରସଙ୍ଗରେ ଭାରତ ସହ ଏକମତ ହେଉନଥିବା ଚୀନ ଆଜି ଗୋଟିଏ ପ୍ରସଙ୍ଗରେ ଭାରତକୁ ସମର୍ଥନ କରିଛି । ଜଗତିକରଣ ପ୍ରସଙ୍ଗରେ ପ୍ରଧାନମନ୍ତ୍ରୀ ମୋଦିଙ୍କ ବକ୍ତବ୍ୟକୁ ଚୀନ ପ୍ରସଂଶା କରିବାସହ ଭାରତ ସହ ମିଶି ଜଗତିକରଣ ପାଇଁ କାମ କରିବାକୁ ପ୍ରସ୍ତାବ ଦେଇଛି ।
Sambad is now on WhatsApp
Join and get latest news updates delivered to you via WhatsApp
ଗତ କାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ୱିଜରଲାଣ୍ଡର ଡାଭୋସଠାରେ ଅନୁଷ୍ଠିତ ବିଶ୍ୱ ଅର୍ଥନୈତିକ ଫୋରମରେ କହିଥିଲେ ଯେ ଜଗତିକରଣ ପ୍ରକ୍ରିୟାଟି ଧୀରେ ଧୀରେ ଦୂର୍ବଳ ହେଉଛି । ଦେଶମାନେ ସାରା ବିଶ୍ୱର ବିକାଶ ପାଇଁ କାର୍ଯ୍ୟକରିବା ଅପେକ୍ଷା କେବଳ ନିଜ ସ୍ୱାର୍ଥ ପାଇଁ କାମ କରୁଛନ୍ତି । ଦେଶମାନଙ୍କ ଆତ୍ମକୈନ୍ଦ୍ରୀକ ସୁରକ୍ଷାବାଦୀ ନୀତି ଆତଙ୍କବାଦଠାରୁ ଅଧିକ ବିପଦ ବୋଲି ମୋଦି କହିଥିଲେ ।
ଏହାକୁ ସମର୍ଥନ କରି ଚୀନ ବୈଦେଶିକ ମନ୍ତ୍ରାଳୟର ମୁଖପାତ୍ର ହୁଆ ଚୁନଇଙ୍ଗ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦି ସୁରକ୍ଷାବାଦ ଉପରେ ଏକ ମନ୍ତବ୍ୟ ଦେଇଛନ୍ତି । ଜଗତିକରଣ ହିଁ ବିଶ୍ୱର ବିକଶିତ ଓ ବିକାଶଶୀଳ ଆଦି ସବୁଦେଶଙ୍କ ବିକାଶରେ ସହାୟକ ହେଉଛି । ଏଣୁ ବିଶ୍ୱରେ ଜଗତିକରଣକୁ ଆହୁରି ସୁଦୃଢ କରିବାକୁ ଭାରତ ସହ ମିଶି କାର୍ଯ୍ୟ କରିବାକୁ ଚୀନ ପ୍ରସ୍ତୁତ ବୋଲି ସେ କହିଛନ୍ତି ।
କେବଳ ଚୀନ ସରକାର ନୁହେଁ ମୋଦିଙ୍କ ବକ୍ତବ୍ୟକୁ ବେଶ ଗୁରୁତ୍ୱ ଦେଇଛି ଚୀନର ଗଣମାଧ୍ୟମ । ଓ୍ଵାର୍ଲଡ ଇକନୋମିକ ଫୋରମରେ ମୋଦିଙ୍କ ବକ୍ତବ୍ୟକୁ ଚୀନର ମୁଖ୍ୟ ସମ୍ବାଦପତ୍ର ଗ୍ଲୋବାଲ ଟାଇମ୍ସ ପ୍ରଥମ ପୃଷ୍ଠାରେ ଫଟୋ ସହିତ ପ୍ରକାଶ କରିଥିଲା ।
ଏଠାରେ ଉଲ୍ଲେଖଯୋଗ୍ୟ ଯେ ଜଗତିକରଣ ଯୋଗୁଁ ଚୀନ ହିଁ ବିଶ୍ୱରେ ସବୂୁଠାରୁ ଅଧିକ ଲାଭାବାନ ହୋଇଛି । ବିଭିନ୍ନ ଦେଶକୁ ରପ୍ତାନି କରି ଚୀନ ଅର୍ଥନୀତି ସମୃଦ୍ଧ ହୋଇଛି । ଏଣୁ ଜଗତିକରଣ ବଜାୟରହିଲେ ଚୀନର ହିଁ ଲାଭ ।