ବଢିବ ଚୀନର ସାମରିକ ଶକ୍ତି, ନିଜର ୨ୟ ବିମାନବାହୀ ଜାହାଜକୁ କାର୍ଯ୍ୟକ୍ଷମ କଲା
ବେଜିଂ : ଚୀନ ନିଜର ଦ୍ୱିତୀୟ ବିମାନବାହୀ ପୋତକୁ କାର୍ଯ୍ୟକ୍ଷମ କରିଛି । ଏହାର ନାଁ ରଖାଯାଇଛି ସାଙ୍ଗଡଙ୍ଗ୍ । ଗୁରୁତ୍ୱପୂର୍ଣ୍ଣ କଥା ହେଉଛି ଏହି ବିମାନବାହୀ ପୋତଟି ସଂପୂର୍ଣ୍ଣ ସ୍ୱଦେଶୀ ଜ୍ଞାନକୌଶଳରେ ନିର୍ମିତ ହୋଇଛି । ସାଙ୍ଗଡଙ୍ଗ୍ କାର୍ଯ୍ୟକ୍ଷମ ହେବା ପରେ ଚୀନ ନୌସେନାର ଶକ୍ତି ଆହୁରି ବୃଦ୍ଧି ପାଇବା ଆଶା କରାଯାଉଛି । ମଙ୍ଗଳବାରଦିନ ଦକ୍ଷିଣ ଚୀନର ହାଇନାନ ରାଜ୍ୟରେ ଥିବା ସାନ୍ୟା ବନ୍ଦରଠାରେ ଏହାର ଜଳାବତରଣ କରାଯାଇଛି । ଏହି ଅବସରରେ ଚୀନ ରାଷ୍ଟ୍ରପତି ସି ଜିନ ପିଂ ଉପସ୍ଥିତ ଥିଲେ । ଗତ ୨୦୧୭ରୁ ଏହାର ପରୀକ୍ଷଣ ଚାଲିଥିଲା । ଏହି ବିମାନବାହୀ ପୋତର ନିର୍ମାଣକାର୍ଯ୍ୟ ନଭେମ୍ବର ୨୦୧୩ରେ ଆରମ୍ଭ ହୋଇଥିଲା ଓ ଏପ୍ରିଲ ୨୦୧୭ରେ ଶେଷ ହୋଇ ଏହାର ପରୀକ୍ଷଣ ଆରମ୍ଭ କରାଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ବିମାନବାହୀ ପୋତ ବା ଏୟାରକ୍ରାଫ୍ଟ କ୍ୟାରିୟର ଆଧୁନିକ ଯୁଗରେ ଗୋଟିଏ ଦେଶର ସାମରିକ ଶକ୍ତିର ଏକ ବଡ଼ ସଂକେତ ଭାବେ ଗଣାଯାଉଛି । ଚୀନର ୨ଟି ବିମାନବାହୀ ପୋତ ଥିଲେ ମଧ୍ୟ ଆମେରିକାଠାରୁ ଏହା ଢେର ପଛରେ ରହିଛି । ଆମେରିକାର ପ୍ରାୟ ୨୪ଟି ବିମାନବାହୀ ପୋତ ରହିଛି । ଜାପାନର ୪ଟି ଓ ବ୍ରିଟେନର ୨ଟି ରହିଛି । ଭାରତର ଗୋଟିଏ ବିମାନବାହୀ ପୋତ ଏବେ କାର୍ଯ୍ୟକ୍ଷମ ରହିଥିବାବେଳେ ଆଉ ଏକ ଋଷିଆରେ ନିର୍ମାଣାଧୀନ ରହିଛି ।