ଭାରତ ବିରୁଦ୍ଧରେ ବିଶ୍ୱ ବାଣିଜ୍ୟ ସଂଗଠନରେ ଅଭିଯୋଗ କରିପାରେ ଚୀନ, କିନ୍ତୁ ନଇଁବନି ଭାରତ
ନୂଆଦିଲ୍ଲୀ : ନିଜର ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶ (ଏଫଡିଆଇ) ନିୟମରେ ସଂଶୋଧନ ଆଣିଥିବାରୁ ଚୀନ ଭାରତ ବିରୁଦ୍ଧରେ ବିଶ୍ୱ ବାଣିଜ୍ୟ ସଂଗଠନ (ଡବ୍ଲୁଟିଓ)ରେ ଅଭିଯୋଗ କରିବାର ସମ୍ଭାବନା ରହିଛି । ତେବେ ଏଥିପାଇଁ ଭାରତ ପ୍ରସ୍ତୁତ ରହିଛି ବୋଲି ଜଣେ ବରିଷ୍ଠ ଅଧିକାରୀ କହିଛନ୍ତି ।
ସେ କହିଛନ୍ତି ଯେ ଏଥିରେ ସଂଦେହ ନାହିଁ ଯେ ଚୀନ ଭାରତ ବିରୁଦ୍ଧରେ ଡବ୍ଲୁଟିଓରେ ଅଭିଯୋଗ କରିବ । କିନ୍ତୁ ସଂଗଠନର ବିବାଦ ସମାଧାନ ବ୍ୟବସ୍ଥାକୁ ଆମେରିକା ଅଚଳ କରିଦେଇଥିବାରୁ ଏଥିରୁ ଭାରତ ପାଇଁ କୌଣସି ବିପଦ ନାହିଁ ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ କମ୍ପାନିମାନଙ୍କୁ ଚୀନ କବଳରୁ ମୁକ୍ତ ରଖିବାକୁ ଭାରତ ସରକାର କିଛି ଦିନ ତଳେ ନିଜର ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶ (ଏଫଡିଆଇ) ନିୟମରେ ସଂଶୋଧନ ଆଣିଥିଲେ । ଏହା ଫଳରେ ଭାରତର ପଡ଼ୋଶୀ ଦେଶମାନେ ସରକାରଙ୍କ ବିନା ଅନୁମତିରେ ଭାରତରେ ନିବେଶ କରିପାରିବେ ନାହିଁ । ତେବେ ଚୀନ ଏହାର ତୀବ୍ର ବିରୋଧ କରୁଛି । ଚୀନ ପକ୍ଷରୁ କୁହାଯାଇଛି ଯେ ଭାରତ ସରକାରଙ୍କ ଏହି ବାଛବିଚାର ମୂଳକ ପଦକ୍ଷେପ ବିଶ୍ୱ ବାଣିଜ୍ୟ ସଂଗଠନ (ଡବ୍ଲୁଟିଓ) ନିୟମର ବିରୋଧୀ । ଏହା ମଧ୍ୟ ଜଗତିକରଣ ଓ ଉଦାରିକରଣ ନୀତିର ବିରୁଦ୍ଧାଚରଣ କରୁଛି ।
ଭାରତ ପରି ଆଉ କେତେକ ଦେଶ ମଧ୍ୟ ନିଜର ବିଦେଶୀ ପୁଞ୍ଜି ନିବେଶ ନିୟମକୁ ବଦଳାଇବାକୁ ବିଚାର କରୁଛନ୍ତି ।