ନୂଆଦିଲ୍ଲୀ : ଗୋଟିଏ ପଟେ ସୀମାରୁ ସୈନ୍ୟ ପ୍ରତ୍ୟାହାର ପାଇଁ ଭାରତ ଓ ଚୀନ ମଧ୍ୟରେ ଆଲୋଚନା ଚାଲିଥିବାବେଳେ ଅନ୍ୟପଟେ ଚୀନ ତିବ୍ବତରେ ନିଜର ଶକ୍ତି ବୃଦ୍ଧି କରିଚାଲିଛି । ଏକ ଗୋପନ ସାମରିକ ଯୋଜନାର ଅଂଶବିଶେଷ ଭାବେ ତିବ୍ବତରେ ବହୁ ସଂଖ୍ୟକ ଲଢୁଆ ବିମାନ, ହେଲିକପ୍ଟର, ଏୟାର ସତର୍କତା ପ୍ରଣାଳୀ ମୁତୟନ କରିଚାଲିଛି । ଏହା ଭାରତ ପାଇଁ ଏକ ସତର୍କ ଘଣ୍ଟି ସଦୃଶ ହୋଇଛି ।
Sambad is now on WhatsApp
Join and get latest news updates delivered to you via WhatsApp
ଗଣମାଧ୍ୟମ ରିପୋର୍ଟ ଅନୁସାରେ ତିବ୍ବତର ୩ଟି ଏୟାରଫିଲଡରେ ଚୀନର ୧୨ଟି ଲଢୁଆ ବିମାନ, ୪୦ଟି ହେଲିକପ୍ଟର, ପ୍ରାୟ ଏକ ଡଜନ ୟୁଏଭି (ଡ୍ରୋନ), ପରିବହନ ଓ ଇନ୍ଧନ ବିମାନ ଆଦି ମୁତୟନ କରିଛି । ଭାରତକୁ ଦୃଷ୍ଟିରେ ରଖି ଚୀନ ଏହା କରିଥିବା ସଂଦେହ କରାଯାଉଛି । ଏସବୁ ବିମାନ ମଧ୍ୟରେ ରହିଛି ଜେ-୧୦ ଭିଗୋରସ ଡ୍ରାଗନ ଲଢୁଆ ବିମାନ, ମଲଟି-ରୋଲ ଫାଇଟର, ୧୦ଟି ସେନୟାଙ୍ଗ ଜେ-୧ ଫାଇଟର, ଗୋଟିଏ ଟ୍ବିନ ଇଂଜିନ ବିଶିଷ୍ଟ ବିମାନ ଓ ଦୁଇଟି ଜେ-୭ ରହିଛି । ଲାସାଠାରେ ଏକ ସାନସି କେଜେ-୫୦୦ ବିମାନ ରହିଛି । ଏହା ଏକ ଆର୍ଲି ଓ୍ବାର୍ଣ୍ଣିଂ ଏଣ୍ଡ କଣ୍ଟ୍ରୋଲ ଏୟାରକ୍ରାଫ୍ଟ । ଏହା ଦୂରରୁ ଭାରତୀୟ ଲଢୁଆ ବିମାନଗୁଡ଼ିକୁ ଠାବ କରିପାରିବ, ଯେପରିକି ଚୀନ ବିମାନଗୁଡ଼ିକ ସତର୍କ ହୋଇପାରିବେ । ତିବ୍ବତର ସିଗାସିଠାରେ ୧୨ଟି ହେଲିକପ୍ଚର, କେଜେ ୫୦୦ ଆର୍ଲି ଓ୍ବାର୍ଣ୍ଣିଂ ଏଣ୍ଡ କଣ୍ଟ୍ରୋଲ ଏୟାରକ୍ରାଫ୍ଟ ମୁତୟନ କରାଯାଇଛି । ସେହିପରି ଏକ ବୃହତ୍ ମିଲିଟାରି ପରିବହନ ବିମାନ ବି ରଖାଯାଇଛି ।
ଗଲଓ୍ବାନ ସଂଘର୍ଷ ପରେ ଦୁଇ ଦେଶର ସେନା ସୀମାରେ ମୁହାଁମୁହିଁ ଅବସ୍ଥାରେ ଥିବାବେଳେ ଚୀନର ଏପରି ପଦକ୍ଷେପକୁ ନେଇ ଭାରତୀୟ ସେନା ଓ ବାୟୁସେନା ସତର୍କ ହୋଇଯାଇଛି ।