ଅରୁଣାଚଳରେ ଭାରତର ଟନେଲ ନିର୍ମାଣକୁ ଚୀନର ବିରୋଧ
ବେଜିଂ: ଚୀନ ସୀମାରେ ନିଜର ଭିତ୍ତିଭୂମିକୁ ସୁଦୃଢ କରିବାକୁ ଭାରତ ସରକାର ଅନେକ ପ୍ରକଳ୍ପ କାର୍ଯ୍ୟକାରୀ କରୁଛନ୍ତି । ଏହି ଅଞ୍ଚଳର ସାମରିକଦୃଷ୍ଟିକୋଣରୁ ଗୁରୁତ୍ୱ ଥିବାରୁ ସରକାର ଏହି ପ୍ରକଳ୍ପ ଗୁଡ଼ିକର ନିର୍ମାଣକୁ ତ୍ୱରାନ୍ଵିତ କରିଛନ୍ତି । ବିଶେଷକରି ଅରୁଣାଚଳ ପ୍ରଦେଶରେ ଭାରତ ଏକ ବୃହତ ଟନେଲ ନିର୍ମାଣ କାର୍ଯ୍ୟ ଆରମ୍ଭ କରିବାକୁ ଯାଉଛି । ଏହାକୁ ଚୀନ ବିରୋଧ କରିବା ଆରମ୍ଭ କରିଛି ।
Sambad is now on WhatsApp
Join and get latest news updates delivered to you via WhatsApp
ଭାରତର ଅର୍ଥମନ୍ତ୍ରୀ ଅରୁଣ ଜେଟଲୀ ଏହି ପ୍ରକଳ୍ପ ନିର୍ମାଣ ସଂପର୍କରେ ଗତ ବଜେଟରେ ଘୋଷଣା କରିବା ପରେ ଚୀନର ସରକାର ସମର୍ଥିତ ସମ୍ବାଦପତ୍ର ଗ୍ଲୋବାଲ ଟାଇମ୍ସରେ ଏହାକୁ ବିରୋଧ କରି ଲେଖା ପ୍ରକାଶ ପାଇଛି । ଭାରତ ବିବାଦୀୟ ଅଞ୍ଚଳରେ ସ୍ଥିତାବସ୍ଥାକୁ ବଦଳେଇବାକୁ ଚେଷ୍ଟାକଲେ ଚୀନ ଚୁପ ହୋଇ ବସିରହିବ ନାହିଁ । ଚୀନ ମଧ୍ୟ ବିଭିନ୍ନ ଉପାୟରେ ଏହାର ଜବାବ ଦେବ । ଏଥିଲାଗି ଚୀନ ପାଖରେ ଅନେକ ବିକଳ୍ପ ରହିଛି । ସେଗୁଡିକ ହେଉଛି ଆର୍ଥିକ , ରାଜନୈତିକ ଓ ସାମରିକ ଉପାୟ । ଭାରତର ଉତ୍ତରପୂର୍ବାଞ୍ଚଳ ରାଜ୍ୟଗୁଡ଼ିକର ଲୋକମାନେ ଚୀନ ସାମଗ୍ରୀକୁ ଭଲ ପାଆନ୍ତି । ଏଣୁ ଚୀନ ନେପାଳ, ବାଂଲାଦେଶ ଓ ମ୍ୟାମାର ମାଧ୍ୟମରେ ଏସବୁ ରାଜ୍ୟଗୁଡ଼ିକୁ ଅଧିକରୁ ଅଧିକ ସାମଗ୍ରୀ ପଠାଯିବ, ଯଦ୍ୱାରା ଭାରତ ସରକାରଙ୍କ ଉପରେ ଚାପ ପଡିବ ବୋଲି ଗ୍ଲୋବାଲ ଟାଇମ୍ସ କହିଛି ।
ସୂଚନାଯୋଗ୍ୟ ଯେ ସରକାରଙ୍କ ଯୋଜନା ମୁତାବକ ଅରୁଣାଚଳ ପ୍ରଦେଶରେ ସମୁଦ୍ରପତନଠାରୁ ୧୩,୭୦୦ ଫୁଟ ଉଚ୍ଚତାରେ ଏକ ଗୋପନ ଟନେଲ ନିର୍ମାଣ କରାଯିବ । ଏହି ଟନେଲଟିର ନାଁ ହେଉଛି ସିଲା ପାସ୍ । ଏହାକୁ ଅରୁଣାଚଳପ୍ରଦେଶର ତଓ୍ଵାଙ୍ଗଠାରୁ ପଶ୍ଚିମ କାମେଙ୍ଗ ପର୍ଯ୍ୟନ୍ତ ନିର୍ମାଣ କରାଯିବ । ଏହି ଟନେଲଟିର ଲମ୍ବ ହେବ ପ୍ରାୟ ଦେଢଶହ କିଲୋମିଟର । ଏହା ସମ୍ପୂର୍ଣ୍ଣ ହେଲେ ଭାରତୀୟ ସେନାର ଓଜନିଆ ଯୁଦ୍ଧଯାନ ସହଜରେ ଯାଇପାରିବ ।