ନୂଆଦିଲ୍ଲୀ: ପାକିସ୍ତାନକୁ ଚୀନ୍ ୪୦ଟି ଶେନୟାଙ୍ଗ ଜେ-୩୫ ପଞ୍ଚମ ପିଢ଼ିର ଷ୍ଟେଲ୍‌ଥ ଲଢୁଆ ବିମାନ ଯୋଗାଇବ ବୋଲି ଜଣାପଡ଼ିଛି। ଜେ-୩୫ ହାସଲ କରିବା ପରେ ଷ୍ଟେଲ୍‌ଥ ଟେକ୍ନୋଲୋଜି ଚଳାଉଥିବା ଦେଶମାନଙ୍କର ଏକ ଛୋଟ ଗୋଷ୍ଠୀରେ ପାକିସ୍ତାନ ସାମିଲ ହେବାକୁ ଯାଉଛି। ଭାରତୀୟ ବାୟୁସେନା (ଆଇଏଏଫ୍) ନିଜର ସ୍ୱଦେଶୀ ପଞ୍ଚମ ପିଢ଼ିର ଷ୍ଟେଲ୍‌ଥ ଯୁଦ୍ଧବିମାନ ଆଡଭାନ୍ସଡ୍‌ ମିଡିୟମ୍ କମ୍ବାଟ୍ ଏୟାର୍‌କ୍ରାଫ୍ଟ (ଏଏମ୍‌ସିଏ)କୁ ସାମିଲ କରିବାକୁ ଆଉ ପ୍ରାୟ ଏକ ଦଶନ୍ଧି ବାକି ରହିଛି। ସରକାରୀ ଆକଳନ ଅନୁଯାୟୀ ୨୦୩୫ ବେଳକୁ ଏଏମ୍‌ସିଏକୁ ଆମ ବାୟୁସେନାରେ ସାମିଲ କରାଯିବ। ପାକିସ୍ତାନର ପଞ୍ଚମ ପିଢ଼ିର ଷ୍ଟେଲ୍‌ଥ ଲଢୁଆ ବିମାନର ମୁକାବିଲା ପାଇଁ ଭାରତର ଅପରେସନାଲ ପ୍ରସ୍ତୁତିର ଆକଳନ କରିବା ପାଇଁ ସାମ୍ବାଦିକମାନେ ବାୟୁସେନାର ଜଣେ ବରିଷ୍ଠ ଭେଟେରାନଙ୍କ ସହ କଥା ହୋଇଥିଲେ।

Advertisment

ଭାରତୀୟ ବାୟୁସେନାର ପୂର୍ବତନ ପାଇଲଟ୍ ତଥା ପ୍ରତିରକ୍ଷା ବିଶ୍ଳେଷକ ଗ୍ରୁପ୍ କ୍ୟାପଟେନ୍ ଅଜୟ ଅହ୍ଲାୱତ୍ (ଅବସରପ୍ରାପ୍ତ) ଚୀନ୍‌ରେ ପାକିସ୍ତାନୀ ପାଇଲଟ୍‌ଙ୍କ ପ୍ରଶିକ୍ଷଣ ସମ୍ପର୍କରେ ସୂଚନା ଦେଇଛନ୍ତି। ସେ କହିଛନ୍ତି, ପାକିସ୍ତାନକୁ ଏହି ବିମାନ ମିଳିବା ଆଦୌ ଆଶ୍ଚର୍ଯ୍ୟଜନକ ନୁହେଁ, କାରଣ ସେମାନଙ୍କ ମନୋନୀତ ଲଢୁଆ ପାଇଲଟ୍‌ଙ୍କ ଟିମ୍ ୬ ମାସରୁ ଅଧିକ ସମୟ ଧରି ଚୀନ୍‌ରେ ପ୍ରଶିକ୍ଷଣ ନେଉଛନ୍ତି। ତେବେ ଚୀନ୍ ପାକିସ୍ତାନକୁ ଯେଉଁ ସଂସ୍କରଣ ଦେବ ତାହା ହେଉଛି ଏଫ୍‌ସି-୩୧, ଯାହା କି ଜେ-୩୫ର ସାମାନ୍ୟ ଟୋନ୍‌ଡ-ଡାଉନ୍ ଭର୍ସନ। ସମ୍ପୂର୍ଣ୍ଣ ସଂସ୍କରଣ କେହି ଦେଉନାହାନ୍ତି। ଏଫ୍‌ସି-୩୧ ହେଉଛି ଜେ-୩୫ର ଏକ ରପ୍ତାନି ଭାରିଆଣ୍ଟ ଏବଂ ପିପୁଲ୍ସ ଲିବରେସନ ଆର୍ମି ନେଭି ଏୟାର୍‌ଫୋର୍ସ (ପ୍ଲାନାଫ୍‌)ରେ ସେବା କରୁଥିବା ଆଗଧାଡ଼ିର ବିମାନ ତୁଳନାରେ ଏହାର କ୍ଷମତା କମ୍। ଗ୍ରୁପ୍ କ୍ୟାପଟେନ୍ ଅହ୍ଲାୱତ୍ କହିଛନ୍ତି, ଏକମାତ୍ର ଆଶ୍ଚର୍ଯ୍ୟଜନକ କଥା ହେଉଛି ସେଗୁଡ଼ିକ ନିର୍ଦ୍ଧାରିତ ସମୟଠାରୁ ଟିକେ ଆଗରୁ ପାକିସ୍ତାନକୁ ମିଳିବାକୁ ଯାଉଛି। 

ଉନ୍ନତ ପ୍ରଶିକ୍ଷଣ, ରଣକୌଶଳ ଓ ଅଧିକ ବିବିଧ ତାଲିମ ଆଧାରରେ ଭାରତୀୟ ବାୟୁସେନା ଦୀର୍ଘ ଦିନ ଧରି ପାକିସ୍ତାନ ଉପରେ ଶ୍ରେଷ୍ଠତା ବଜାୟ ରଖିଛି। ପାକିସ୍ତାନକୁ ଜେ-୩୫ ମିଳିଲେ ସେହି ଶ୍ରେଷ୍ଠତା ସାମାନ୍ୟ ହ୍ରାସ ପାଇବାର ଆଶଙ୍କା ରହିଛି। ଗ୍ରୁପ୍ କ୍ୟାପଟେନ୍ କହିଛନ୍ତି, ଏହା ଏକ ଚିନ୍ତାଜନକ ଖବର। ସ୍ୱାଧୀନତା ପରଠାରୁ ଚୀନ୍ ନୁହେଁ, ଅନ୍ତତଃ ପାକିସ୍ତାନ ଉପରେ ଶ୍ରେଷ୍ଠତା ବଜାୟ ରଖିବା ପାଇଁ ଆମେ ଚେଷ୍ଟା କରି ଆସିଛୁ। ପାକିସ୍ତାନୀ ରଙ୍ଗରେ ଜେ-୩୫ର ଯେ କୌଣସି ସଂସ୍କରଣ ଆମର ଚିନ୍ତା ବଢାଇବ। ଦୁର୍ଭାଗ୍ୟବଶତଃ ଆମ ପାଖରେ କେବଳ ଦୁଇଟି ଖରାପ ବିକଳ୍ପ ରହିଛି, ଏଫ୍-୩୫ ଓ ସୁ-୫୭। ଏକମାତ୍ର ଭଲ ବିକଳ୍ପ ହେଉଛି ଏଏମ୍‌ସିଏ। ଆମେ ଏହି ସମସ୍ୟାକୁ ଅତିକ୍ରମ କରିବାର ଏକମାତ୍ର ଉପାୟ ହେଉଛି ଏହାକୁ ଏକ ଜାତୀୟ ମିସନ ମୋଡ୍ ପୁସ୍ ଦେବା ଏବଂ ଯଥାଶୀଘ୍ର ଏହାକୁ ହାସଲ କରିବା।
ବାୟୁସେନା ଓ ନୌସେନାର ମିଳିତ ସହଯୋଗରେ ଭାରତର ଏରୋନଟିକାଲ ଡେଭଲପ୍‌ମେଣ୍ଟ ଏଜେନ୍ସି (ଏଡିଏ) ଦ୍ୱାରା ବିକଶିତ ହେଉଥିବା ଏକ ମହତ୍ତ୍ୱାକାଂକ୍ଷୀ ଦୁଇ ଇଞ୍ଜିନ ବିଶିଷ୍ଟ ଷ୍ଟେଲ୍‌ଥ ଲଢୁଆ କାର୍ଯ୍ୟକ୍ରମ ଏଏମ୍‌ସିଏ ଏବେ ବି ବିକାଶର ପ୍ରାରମ୍ଭିକ ପର୍ଯ୍ୟାୟରେ ରହିଛି। ୨୦୨୮-୨୯ ସୁଦ୍ଧା ଏହାର ପ୍ରାରମ୍ଭିକ ମଡେଲ ନିର୍ମାଣ ପାଇଁ ଲକ୍ଷ୍ୟ ରଖାଯାଇଛି ଏବଂ ୨୦୩୫ ପୂର୍ବରୁ ପୂର୍ଣ୍ଣାଙ୍ଗ ବିକଶିତ ମଡେଲ ଆଶା କରାଯାଉନାହିଁ।

ବାୟୁସେନାରେ ପ୍ରମୁଖ ଯୋଜନା ଭୂମିକାରେ କାର୍ଯ୍ୟ କରିଥିବା ଏୟାର୍ ମାର୍ଶାଲ ସଞ୍ଜୀବ କପୁର (ଅବସରପ୍ରାପ୍ତ) ଏହି ଚ୍ୟାଲେଂଜ୍‌ର ଗମ୍ଭୀରତାକୁ ସ୍ୱୀକାର କରିବା ସହ ଏକ ଅନ୍ତରୀଣ ସମାଧାନ ପ୍ରସ୍ତାବ ଦେଇଛନ୍ତି। ସେ କହିଛନ୍ତି, ଚଳିତ ବର୍ଷ ଡିସେମ୍ବର ସୁଦ୍ଧା ପାକିସ୍ତାନୀମାନଙ୍କୁ ୪୦ଟି ବିମାନ ମିଳିବାର ସମ୍ଭାବନା ରହିଛି। ଆମେ ଏଏମ୍‌ସିଏକୁ ସାମିଲ କରିବା ବେଳକୁ ୯ରୁ ୧୦ ବର୍ଷ ଲାଗିଯିବ। କିନ୍ତୁ ଶତ୍ରୁମାନେ ବଳବାନ୍ ହେଉଥିବା ବେଳେ ଆମେ କ’ଣ ଏଥିପାଇଁ ଆଉ ଦଶ ବର୍ଷ ଅପେକ୍ଷା କରିପାରିବା? ତା’ ପୂର୍ବରୁ ଆମେ ରୁଷିଆର ସୁଖୋଇ ଏସ୍‌ୟୁ-୫୭ କିଣିବା ଉଚିତ। ଅନେକ ଦୃଷ୍ଟିରୁ ଏହା ଏଫ୍-୩୫ଠାରୁ ଭଲ। ତେବେ ଗ୍ରୁପ୍ କ୍ୟାପଟେନ୍ ଅହ୍ଲାୱତ୍ ଏହି ପ୍ରସ୍ତାବରେ ଅସହମତି ପ୍ରକାଶ କରିଥିଲେ। ରୁଷ୍ ସହ ବର୍ତ୍ତମାନ ବନ୍ଦ ହୋଇଥିବା ଏଫ୍‌ଜିଏଫ୍ଏ (ପଞ୍ଚମ ପିଢ଼ିର ଲଢୁଆ ବିମାନ) କାର୍ଯ୍ୟକ୍ରମରେ ଭାରତୀୟ ବାୟୁସେନାର ପୂର୍ବ ସମ୍ପୃକ୍ତି ବିଷୟରେ ସେ ଉଲ୍ଲେଖ କରିଥିଲେ, ଯେଉଁଥିରୁ ଭାରତ ସୁ-୫୭ର ପ୍ରାରମ୍ଭିକ ମୂଲ୍ୟାଙ୍କନ କରିବା ପରେ ପ୍ରତ୍ୟାହାର କରିନେଇଥିଲା। ରୁଷ୍ ପାଖରେ ସୁ-୫୭ର ଗୋଟିଏ ବି ପୂର୍ଣ୍ଣ କାର୍ଯ୍ୟକ୍ଷମ ରେଜିମେଣ୍ଟ ନାହିଁ। ସେମାନେ ନିଜ ପାଇଁ ଯାହା ଦରକାର ତାହା ମଧ୍ୟ ଉତ୍ପାଦନ କରିନାହାନ୍ତି ବୋଲି ଜଣାପଡ଼ିଛି।