ଚୀନ୍ର କୋଭିଡ୍ ସଂକ୍ରମଣ ଉଦ୍ବେଗଜନକ, କିନ୍ତୁ ଭାରତ ଭୟଭୀତ ହେବା ଅନାବଶ୍ୟକ: ଅଦାର ପୁନାୱାଲା
ନୂଆଦିଲ୍ଲୀ: ପଡ଼ୋଶୀ ଦେଶ ଚୀନ୍ରେ କୋଭିଡ୍-୧୯ ସଂକ୍ରମଣ ମାମଲା ବୃଦ୍ଧି ଉପରେ ଚିନ୍ତା ପ୍ରକଟ କରି ‘ସିରମ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆ’ର (ଏସ୍ଆଇଆଇ) ‘ସିଇଓ’ ଅଦାର ପୁନାୱାଲା ଆଜି କହିଛନ୍ତି ଯେ, ଭାରତର ଟିକାକରଣ ଓ ଟ୍ରାକ୍ ରେକର୍ଡ ଚମତ୍କାର। ତେଣୁ, ଲୋକେ ଭୟଭୀତ ହେବା ଅନାବଶ୍ୟକ।
Sambad is now on WhatsApp
Join and get latest news updates delivered to you via WhatsApp
ଏଥିସହ ସେ ଜନସାଧାରଣଙ୍କୁ ମଧ୍ୟ ନିବେଦନ କରିଛନ୍ତି ଯେ, ଲୋକେ ଭାରତ ସରକାର ଓ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟଦ୍ବାରା ପ୍ରଣିତ ଗାଇଡ୍ଲାଇନ୍ ମାନିବା ଉଚିତ।
ଟୁଇଟ୍ କରି ପୁନାୱାଲା ଲେଖିଛନ୍ତି: ଚୀନ୍ରେ କୋଭିଡ୍ ସଂକ୍ରମଣ ବୃଦ୍ଧି ଘଟିବା ଖବର ଚିନ୍ତାଜନକ। ଆମର ଟିକାକରଣ ଓ ଟ୍ରାକ୍ ରେକର୍ଡ ଉନ୍ନତ ଥିବାରୁ ଆମେ ଭୟଭୀତ ହେବା ଅନାବଶ୍ୟକ। ଭାରତ ସରକାର ଏବଂ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଜାରି କରିଥିବା ଗାଇଡ୍ଲାଇନ୍ ଅନୁଯାୟୀ ଆମେ ଚଳିବା ଉଚିତ।
ସୂଚନାଯୋଗ୍ୟ, ଅଦାର ପୁନାୱାଲା ହେଉଛନ୍ତି, କୋଭିଡ୍-୧୯ ନିରୋଧୀ ଟିକା ‘କୋଭିସିଲ୍ଡ୍’ର ନିର୍ମାତା ‘ସିରମ୍ ଇନ୍ଷ୍ଟିଚ୍ୟୁଟ୍ ଅଫ୍ ଇଣ୍ଡିଆ’ର ‘ସିଇଓ’।
ଉଲ୍ଲେଖଯୋଗ୍ୟ, ‘ହଙ୍ଗ୍କଙ୍ଗ୍ ପୋଷ୍ଟ୍’ ରିପୋର୍ଟ ଅନୁସାରେ, ସରକାରୀ ଗଣନା ଅନୁସାରେ, ଦୈନିକ ୨୦୦୦ ସଂକ୍ରମିତ ହେଉଥିବା କଥା ଦର୍ଶାଯାଉଥିଲେ ବି ଚୀନ୍ରେ ଅସୁମାରୀ କୋଭିଡ୍-୧୯ ଆକ୍ରାନ୍ତ ଥିବା କଥା ଚୀନ୍ବାସୀ କହୁଛନ୍ତି।
ଚୀନ୍ ସମେତ ଆଉ କେତେକ ରାଷ୍ଟ୍ରରେ କୋଭିଡ୍-୧୯ ସଂକ୍ରମଣ ବୃଦ୍ଧି ପାଉଥିବା ଦୃଷ୍ଟିରୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ମଙ୍ଗଳବାର ଦିନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ସରକାରମାନଙ୍କୁ କହିଛନ୍ତି ଯେ, ନୂଆ ଭେରିଏଣ୍ଟ୍ ଚିହ୍ନଟ କରିବା ଲାଗି ସେମାନେ ସମସ୍ତ କୋଭିଡ୍ ପଜିଟିଭ୍ ମାମଲା ‘ଇନ୍ସାକଗ୍’ ଲ୍ୟାବ୍କୁ ପଠାନ୍ତୁ।
ଦେଶରେ କୋଭିଡ୍-୧୯ ପରିସ୍ଥିତି ସଂକ୍ରାନ୍ତରେ ଆଜି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମଣ୍ଡଭୀୟ ବରିଷ୍ଠ ସରକାରୀ ଅଧିକାରୀ ଓ ବିଶେଷଜ୍ଞମାନଙ୍କ ସହିତ ବୈଠକ କରିବେ।